(E plotësuar) - ORA 15:53 - Të hënën, pak para orës 10, në ndërtesën e re të komunës së Prishtinës, është vrarë Drejtori i Arsimit të Prishtinës, Remzi Salihu, në zyrën e tij.

Sipas burimeve të “Zërit”, mësohet se dorasi i kësaj vepre makabre është arsimtari i Biologjisë, Gani Sahiti, nga fshati Graxhenik, komuna e Kamenicës, i cili ka pretenduar të jetë Drejtor i shkollës në fshatin Dabishevc.

Sipas njoftimeve, thuhet se Sahiti, me të hyrë në ndërtesën e Komunës së Prishtinës, ka kërkuar takim me tashmë të ndjerin, Salihu, mirëpo asistentja e tij nuk e ka pranuar kërkesën e tij.

Megjithatë, ai ka hyrë me dhunë në zyrën e tij dhe e ka qëlluar të nderin Salihu me 5 plumba.

Menjëherë pas këtij veprimi, dorasi ka lajmëruar policinë dhe është vetë-dorëzuar.

Mësohet gjithashtu se i dyshuari për vrasjen e Salihut, Gani Sahiti, ka qenë mjek në UÇPMB (Ushtria Çlirimtare për Preshevë, Medvegjë dhe Bujanovc).

Zëdhënësi i Policiisë për rajonin e Prishtinës, Agron Borovci, ka konfirmuar se dorasi Gani Sahiti është dërguar në qendrën e paraburgimit dhe po zhvillohen hetimet për rastin.

Ndërkaq, mësohet se në vendngjarje shkuan menjëherë deputetë të Lidhjes Demokratike të Kosovës, Ismet Beqiri, Arben Gashi dhe zyrtarë të tjerë.

Vrasja ndodhi në një kohë që kryetari i komunës së Prishtinës, Isa Mustafa ndodhet për një vizitë zyrtare në Shtetet e Bashkuara të Amerikës.

Ndërkaq, mësohet se ndërtesa e Komunës së Prishtinës nuk posedon pajisje për detektimin e mjeteve metalike të personave që hyjnë dhe dalin nga ky objekt.

Posedimi i kësaj pajisjeje do të mund të kishte parandaluar vrasjen e drejtorit Salihu.

Komuna e Prishtinës është thellë e tronditur me rastin tragjik të vrasjes së Remzi Salihut, drejtor i Drejtorisë për Arsimit në Komunën e Prishtinës.

“Remzi Salihu u vra sot, më 3 tetor 2011, rreth orës 10:00, në vendin e punës, në zyrën e tij. Remzi Salihu ka kryer me nder dhe përkushtim të pashoq punën e drejtorit të Drejtorisë së Arsimit në Komunën e Prishtinës”, thuhet mes tjerash në reagimin e Komunës së Prishtinës.

Më tej në reagim thuhet se Komuna e Prishtinës i shpreh ngushëllimet me të sinqerta familjes Salihu, duke u bërë thirrje organeve të hetuesisë dhe gjyqësisë që sa më parë ta zbardhin rastin dhe kryesi i kësaj vrasje të rëndë të merr dënimin e merituar. /zëri/