Janë bërë 12 vite kur nga kriminelët serbë në prezencën e forcave ndërkombëtare, më 3 dhe 4 shkurt të vitit 2000, në shtëpitë e tyre vranë Niman Sejdiun, Bashkim Rrukeci,Sebiha Abrashin, Selime Berishën (boshnjake, Muharrem Sokolin, Nderim Ajetin, Nerimane Xhakën e Remzije Canhasin, kurse qindra të tjerë u plagosën dhe u rrahën në “natën e thikave të gjata” në veri të Mitrovicës.

Masakra sikur është harruar edhe pse pos vrasjeve e plagosjeve nga ajo pjesë u përzunë shumë familje me mbi 12 mijë shqiptarë dhe ajo pjesë u shndërrua në çerdhe kriminelësh serbë që ende e mbajnë peng atë pjesë të Kosovës.

Halit Barani, kryetar i KMDLNJ-së në Mitrovicë thotë se vrasjet që janë bërë në prani të ushtarëve të KFOR-it dhe të policisë ndërkombëtare nuk mund të presim t’i kryejnë hetimet, pasi ata vetë nuk kanë bërë asgjë që t’i parandalonin. Sipas tij ka dëshmitarë që pohojnë se në mesin e vrasësve ishin edhe njerëz që paraqiten publikisht si liderë politikë të serbëve të Kosovës.

Se operacioni ishte udhëhequr nga kriminelë serbë është argumentuar edhe me një dokument të policisë së UNMIK-ut, por përkundër kësaj as që është ngritur ndonjë aktakuzë.

Atë natë u vranë tetë veta ndërsa katër të tjerë vdiqën më pas nga plagët me armë dhe granatat e përdoruara gjatë sulmit.

Ish-kryeprokurori i Qarkut, Jusuf Mejzini, ka thënë se rastet janë hetuar nga policë dhe prokurorë ndërkombëtarë dhe se vendorët nuk kanë pasur qasje. Ata ndërkombëtarë e kanë përfunduar misionin por nuk kanë dorëzuar asnjë lëndë për këto raste.

Burime në kushte anonimiteti kanë thënë se vendorët kanë pasur qasje vetëm në lëndën e çiftit të vrarë Nezir e Shqipe Voca. Është vetëm një fletëparaqitje kundër personit N.N dhe ajo i është dërguar policisë që të gjejnë vrasësit, ka thënë burimi.

E rastet në të cilat të dyshuarit janë ditur janë marrë nga prokurorët ndërkombëtarë e vendorët nuk dinë gjë. Sipas ish-kryetarit të Gjykatës së Qarkut, Kapllan Baruti, në gjykatën në veri nuk ka asnjë lëndë të inicuar e as të proceduar për këtë çështje.