Krerët e Prokurorisë së këtushme komunale, kanë raportuar të arriturat, por edhe vështirësitë e punës njëvjeçare, si institucion i drejtësisë, të vetëdijshëm se përkundër angazhimit të stafit, mbetet shumëçka për t’u dëshiruar.

Kryeprokurori Shukri Jashari, bëri të ditur se vetëm gjatë vitit paraprak janë pranuar 2.642 lëndë, përderisa rreth 900 të tjera kanë qenë të bartura nga vitet e kaluara dhe, sipas tij, pjesa dërrmuese e tyre janë kryer, pa llogaritur edhe ato që kanë të bëjnë me të mitur.

Sipas Jasharit, janë veprat penale kundër pasurisë që kanë dominuar numrin e përgjithshëm të lëndëve për harkun kohor njëvjeçar (725), pasojnë ato kundër mjedisit, kafshëve, bimëve dhe objekteve kulturore (510) si dhe kundër sigurisë në trafik (349), kundër trupit dhe jetës së njeriut (356), kundër rendit dhe veprimit juridik 293, kundër të drejtave dhe lirive të njeriut (175) dhe lëndë të tjera me numër më të vogël.

Gjithashtu edhe në strukturën e lëndëve penale për të mitur dominojnë ato kundër pasurisë.

Duke iu referuar shqiptimit të dënimeve nga ana e gjykatave, Shukri Jashari vlerëson se ato kanë qenë nën minimumin e paraparë me ligj, prandaj PK në shumë raste është dashur të ushtrojë ankesa për procedura të mëtutjeshme, përderisa 375 gjykime janë pezulluar për shkak të parashtrimit.

Ndër vështështërsitë më të mëdha të punës në Prokurorinë Komunale, Shukri Jashari ka nënvizuar mungesën e numrit të nevojshëm të prokurorëve si dhe hapësirën tepër të ngushtë të lokalit, kushte që, sipas tij, po refektojnë domosdo si në kualitet, ashtu edhe në kuantitet të volumit të punëve të përgjithshme këtu.

"Kjo prokurori mbulon tri gjykata dhe degët e tyre në pesë komuna: Ferizaj, Kaçanik, Shtime, Shtërpcë dhe Hani i Elezit, me vetëm katër prokurorë, dhe staf ndihmës të pamjaftueshëm administrativ, bashkëpunëtorëve profesionalë dhe referentëvë", ka thënë kryeprokurori Jashari, duke shtuar se në një hapësirë prej 12 metrash katrorë, punojnë tetë zyrtarë.

Jashari kujton se është koha e fundit që organet përgjegjëse të drejtësisë në Kosovë të ndërhyjnë për të gjetur zgjidhje rreth objektit të prokurorisë në Ferizaj, sepse katër zyra, sa janë gjithësej në shfrytëzim në ndërtesën e Gjykatës, janë fare të pamjaftueshme për një funksionim normal të këtij institucioni.