Prokuroria Speciale e Kosovës ka ngritur aktakuzë, pranë Gjykatës së Qarkut në Prishtinë, kundër dhjetë avokatëve nën akuzat për vepër penale ‘keqpërdorim të besimit nga neni 269 i Kodit Penal të Kosovës’.

Të akuzuarit janë Sadik Tanyol nga Prizreni, Shefqet Ibrahimi nga Skenderaj, Prenk Pepaj nga Gjakova, Mustafë Musa nga Gjilani, Xhafer Maloku nga Klina, Fahire Qeko Kabashi nga Prizreni, Muharrem Ramadani nga Mitrovia, Xhavit Krreku nga Gjakova dhe Haxhe Nikqi nga Peja.

Ndër ta, Xhafer Maloku akuzohet edhe për verat penale të mashtrimit dhe raste të posaçme të falsifikimit të dokumenteve, ndërsa, Xhavit Krreku dhe Haxhë Nikqi akuzohen edhe për veprën penale Shmangie nga tatimi.

Të pandehurit akuzohen pasi që nga viti 2003, duke përfaqësuar klientët e tyre, disa me autorizim e disa pa autorizim, pas përfundimit të procedurës lidhur me kompensimin e dëmit pranë Kompanisë së sigurimit “Kosova në Likuidim” në Prishtinë, të njëjtës i kanë sugjeruar që mjetet financiare t’i transferonin në llogaritë e avokatëve e jo të klientëve. “Avokatët e pandehur në shumë raste kanë falsifikuar autorizimet në emër të klientëve të tyre”, thuhet komunikatën e Prokurorisë Speciale.

Ndërkohë, kryeprokurori i Shtetit dhe njëherësh kryetar i Këshillit Prokurorial të Kosovës, Ismet Kabashi, ka mbledhur sot në një takim përfaqësues të Këshillit Prokurorial të Kosovës, Prokurorit të Shtetit, Këshillit Gjyqësor, Policisë, Doganave, Administratës Tatimore, Njësisë së Inteligjencës Financiare dhe Agjencionit Kundër Korrupsionit. Qëllimi i këtij takimi ishte hartimi i Strategjisë së Këshillit Prokurorial të Kosovës për ngritjen dhe koordinimin e bashkëpunimit në mes Prokurorit të Shtetit dhe agjencive përgjegjëse për zbatimin e ligjit për Luftimin e Krimit të Organizuar dhe Korrupsionit, ashtu siç kërkohet nga Raporti i Progresit të Komisionit Evropian-së për Vitin 2011.

Përfaqësuesit e të gjitha këtyre institucioneve brenda dhjetë ditësh duhet t’i dërgojnë rekomandimet e tyre Këshillit Prokurorial të Kosovës dhe bashkërisht ta hartojnë këtë draft-strategji, e cila duhet të jetë gati deri më 31 mars.