Shpërthimi i një cisternë karburanti në ambientet e një biznesi në Lundër për pak sa i ka rrezikuar jetën 4 personave, ndërkohë që flakët rrezikuan biznesin pranë të cilit ndodhi shpërthimi.

Shpërthimi ku mbeten të plagosur 4 persona ndodhi mesditën e sotme, ndërkohë policia nga të dhëna paraprake bëri me dije se ka shpërthyer një cisternë nafte që ndodhet 3 metra larg biznesit në Lundër, shkëndijat e saldatriçes kanë shkaktuar shpërthimin, ndërkohë që mësohet se bëhej fjalë për një cisternë që furnizonte gjeneratorin e biznesit, përdorej për ngrohje dhe shërbime të tjera në biznes.

Të plagosurit, identiteti i të cilëve nuk bëhet ende i ditur janë dërguar menjëherë në Spitalin Ushtarak, ndërkohë që mjekët bëjnë me dije se 2 prej tyre kanë djegie në trup dhe gjendja e tyre është e rëndë, ndërkohë që dy të tjerët pasi kanë marrë mjekimet e nevojshme janë larguar.

Në vendngjarje shkuan 2 automjete zjarrfikëse dhe forca të shumta të komisariatit numër 1 në kryeqytet, ndërkohë që bashkë me personelin e biznesit vendosen në kontroll flakët, në mënyrë që të shmangin situatën e rendë.

Uniformat blu bëjnë me dije se kanë nisur hetimet për zbardhjen e plotë të rrethanave të shpërthimit. /BW/