Një operacion i policisë së Sarandës ka bërë të mundur sekuestrimin e 253 kilogramë hashash, arrestimin e 7 personave dhe shpalljen në kërkim të një tjetër të dyshuari për trafikun e drogës. Operacioni i koduar “Sopoti” është realizuar nga efektivët e policisë së Vlorës dhe Sarandës

Personat e arrestuar janë; Aleks Çune Nanaj, vjeç 29, lindur në Delvinë dhe banues në Sarandë, Andrea Çune Nanaj , 27 vjeç, banues në Sarandë, Gjergji Shaban Nanaj, 45 vjeç, lindur dhe banues në fshatin Kopacëz Delvin, Maridon Merakli Dhuli, 22 vjeç, lindur dhe banues në fshatin Fterrë Sarandë, Besnik Ikmet Kasaj, 25 vjeç, lindur dhe banues në Lukovë, Afrim Ikmet Kasaj, 32 vjeç, lindur dhe banues në Lukovë, Petrit Xhevat Halimi, 21 vjeç, lindur e banues në Mallakastër. Në kërkim është shpallur Sobiel Merakli Dhuli, 19 vjeç lindur dhe banues ne Fterre Sarandë.

Arrestimi i u krye pasi nga kontrolli i ushtruar në banesën e shtetasit Andrea Nanaj në fshatin Kopacëz janë gjetur 253 Kg lëndë narkotike e ngjashme me atë llojit “Cannabis Sativa”.

Sipas të dhënave, droga ishte transportuar me kafshë nga fshati Lazarat nëpërmjet malit të Sopotit deri në fshatin Kopacëz, me qëllim për ta trafikuar më pas në drejtim të shtetit grek.

Policia po heton edhe aktivitetet e mëparshme që ka kryer ky grup. Nga hetimet ka rezultuar gjithashtu se ky grup ka kryer aktivitet kriminal edhe në raste të tjera të mëparshme dhe se organizatori i këtij trafikimi është Aleks Nanaj i cili, nëpërmjet vëllait të tij shtetasi Andrea Nanaj rekrutonte shtetas të ndryshëm kundrejt pagesës, 50 mijë lekë për të realizuar transportin e lëndë narkotike.

Veç drogës janë sekuestruar dhe 3 automjete që përdoreshin për kryerjen e veprimtarisë kriminale dhe aparate celulare me gjithë kartat telefonike. /NOA/