Gjykata e Qarkut në Prishtinë, duke vendosur në bazë të ankesës së prokurorit publik komunal të Prishtinës, në vendimin e shkallës së parë, Gjykatës Komunale në Drenas, ka dënuar me nga 6 muaj burg efektiv, 6 persona, në bazë të nenit 180 të Kodit Penal të Republikës së Kosovës, për mashtrim në votime.

Në mesin e të dënuarve janë edhe dy femra, L. M. (kryesuese e vendvotimit) dhe R.V. Janë dënuar L.M. (kryesyese e vendvotimit), F. Xh., I. I., R,V., N.A., dhe B.B., të gjithë nga Drenasi.

Gjykata Komunale në Drenas pati dënuar me 10 muaj me kusht që për dy vjet të mos kryejë vepër të njëjtë penale, L.M. (kryesuese e vendvotimit), ndërkaq, pesë të tjerët F. Xh., I. I., R,V., N.A., dhe B.B., komisionarë, i kishte dënuar me nga 8 muaj me kusht që për dy vjet të mos kryejnë vepër të njëjtë penale.

Ata ishin dënuar, sepse në zgjedhjet lokale të vitit 2009 dhe për kryetar komune, në vendvotimet në Poklek dhe në objektin e gjimnazit “Gjergj Kastrioti – Skënderbeu”, kishin manipuluar me vota dhe në këtë mënyrë kishin dëmtuar buxhetin e Kosovës. Por, ndaj këtij gjykimi ishte ankuar Prokuroria Publike e Prishtinës, duke kërkuar që dënimi me kusht të shndërrohet në burg efektiv për të gjithë personat e dënuar.

Duke vendosur sipas ankesës, Gjykata e Qarkut në Prishtinë, e ka ndryshuar aktgjykimin e Gjykatës Komunale në Drenas, në atë mënyrë që të 6 personat që ishin shpallur fajtorë t’i dënojë me nga 6 muaj burg efektiv.