Tre të dyshimtë se kanë kryer disa plaçkitje dhe vjedhje të rënda në lokalitete të ndryshme në komunë të Shtimes janë vënë në pranga.

Sipas zëdhënësit rajonal, rreshter Agim Gashi, të prangosuri janë G. K., E. M. dhe

B. S., të moshës 19-22 vjeçare. Ai ka vlerësuar punën e hetuesve të Shtimes, të cilët në bashkëpunim me njësitin e hetimeve rajonale, kanë arritur t’i fusin në kurth dhe të arrestojnë këta persona përgjegjës për disa vjedhje të rënda, përfshirë edhe plaçkitjen e postës, të një pike të "Western Unionit" dhe disa shitoreve në Shtime.

Të dyshuarit G. K. i është gjetur edhe një pistoletë e tipit, “Fuh pistole”, model 27 me kalibër 7,65 mm me një karikator me gjashtë fishekë. Mësohet se tre të arrestuarit gjatë intervistimit në polici, kanë pranuar se në bashkëveprim kanë kryer plaçkitje në postën e qytetit, filialin e “Western Union” ,vjedhjet e rënda në marketet "Penny" e "Nazi" dhe "Dardani", kafenenë "Home PUB", biznese në Shtime.

Sipas toger Gashit, gjatë bastisjeve të shtëpive të këtyre personave të dyshuar janë gjetur dhe konfiskuar, si prova materiale, 10.402 euro.

Të arrestuarit, kanë treguar se gjësendet e vjedhura si stoli ari, artikujt të ndryshëm nga marketet në Shtime i kanë shitur kryesisht në Prizren, andaj hetimet janë në vazhdim.

Të arrestuarit po mbahen në polici deri në procedimin e rastit.

Në rajonin e Ferizajt, Kaçanikut dhe Shtimes, vetëm gjatë tre muajve të fundit kanë ndodhur një sërë plaçkitjesh, në pika të karburanteve, në objekte të lojërave të fatit si dhe një rast në bankë. H. Rexhepi