Ju kujtohen drekat e darkat që shtronte jo fort moti kryeministri i Kosovës për punonjësit e arsimit parauniversitar nëpër të gjitha komunat e Kosovës. Ishin dreka e darka të nevojës. Kutitë e votimit i kishin fajet. Opozita thoshte: “Po harxhohen paratë e buxhetit të Kosovës! Nuk bën më kështu!”. Kaq.

Ju kujtohen edhe pamjet nga televizori. Diku, ku kryeministri konsideronte se kutia e votimit do të bëhej më e madhe me “kokrra”, rrinte e hante bashkë me punonjësit e arsimit. Diku, atë e prisnin me orë të tëra. Vetëm vinte me eskortë, u thoshte: “Ju bëftë mirë!” dhe ikte për t’i thënë po këto fjalë në komunën tjetër... Kaq.

Kjo kohë ishte dhe shkoi!

Sot po këndohet këngë tjetër!

Ama, kjo këngë sot po këndohet jo nga kryeministri, veçse nga sindikalistët e arsimit!

Jo kënga e drekave dhe darkave, por kënga e rritjes së pagave!

Sindikalistët e arsimit, nesër, do të dalin me qëndrimin zyrtar se a do të ketë grevë në të gjitha nivelet e arsimit parauniversitar.

Sepse, nuk arritën t’i bindin as kryeministri i Kosovës e as ministri i Arsimit.

Këta u premtuan rritje pagash “substanciale” që nga 1 janari i vitit 2011. Ndërsa sindikalistët i duan pagat e rritura që nga 1 shtatori 2010.

Bile, sipas raportimeve në media, në takimin e kryeministrit dhe të ministrit me sindikalistët, këta të fundit thanë zëshëm se mësimdhënësit në Kosovë janë duke u injoruar dhe janë lënë anash nga Qeveria e Kosovës, se disa shërbime vetëm me greva kanë arritur qëllimin e tyre në rritjen e pagave dhe se, nëse nuk ndodhin rritje pagash edhe në arsim, ka gjasë që mësimi parauniversitar të mos fillojë më 1 shtator.

Ministri i Arsimit u ngut menjëherë dhe doli në opinion, sikur të mos kishte ndodhur gjë, duke deklaruar se gjithçka është gati për fillimin e vitit të ri shkollor. Ai, po ashtu, dha sqarimin se pagat e punëtorëve të arsimit nuk mund të rriten katër muaj pa mbaruar viti kalendarik, se pagat e punëtorëve të arsimit nuk mund të rriten pa u planifikuar me buxhet, dhe pagat e punëtorëve të arsimit nuk mund të rriten pa e thënë mendimin e vet edhe Fondi Monetar Ndërkombëtar.

Çka i bie kjo shqip!

“Nisjani ju shkollës dhe ne do të shohim se çka do të bëjmë!”...

Kur?

Më 2011!

E, këtu ndaluni pak!

A ka zgjedhje në Kosovë më 2011?

Ka!

Në vjeshtë të vitit 2011!

E gjetaaaaaaaaaaaaa!

Më 2011 do të ketë jo veç rritje pagash, por edhe dreka e darka!

Ju garantoj!

Mirupafshim më 2011!