Të nderuar,

Do të ishte një gabim po qe se kjo letër do t'i drejtohej një individi a përgjegjësi nga radhët tuaja – përfshirë këtu edhe ata që janë kompetentë ta përcjellin punën tuaj. Sepse Radio-Televizioni i Kosovës është një prej institucioneve rreth të cilit e në të cilin pushtetin e vet e "ushtrojnë" struktura udhëheqëse shtetërore e partiake, klanore e farefisnore... Por, që fare në fund dihet se kush vulos a nënshkruan çdo gjë. Para, gjatë dhe pas emetimit.

Historiku i themelimit të këtij Radio-Televizioni është i gjatë dhe i dhembshëm. Nga largimi, përkatësisht mbyllja e ish-RTP-së, duke iu ofruar "mundësia" ish-punëtorëve të "rikandidojnë" e deri te spastrimet e fundit menjëherë pasi koalicioni i tashëm PDK-LDK erdhi në pushtet, më shumë i ngjajnë një filmi "triler" sesa një procesi normal të rrotacionit. Por, ajo që menjëherë pas zgjedhjes së bordit të ri dhe drejtorëve doli si vërtetim i paralajmërimeve të EBU-së për përzierje të pushtetit dhe sidomos të kryeministrit të Kosovës, Hashim Thaçit, në politikat programore të servisit publik, në ndërkohë në mënyrën më banale të mundshme edhe u vërtetua.

Ju, të nderuar të punësuar në RTK, keni bërë që sinjali juaj tashmë jo vetëm nuk është (në) shërbim publik, por më tepër i ngjet një rrufeje me amalgime e tone herë latino-amerikane e herë komuniste, herë protokollare e herë ashiqare... Një mishmash i paparë dhe i padëgjuar në Evropën e vitit 2010!

Është më tepër se për t'u revoltuar që pas "mëlmesave" të marrëveshjeve me Feithin për financimin – jo vetëm që keni humbur ndjenjën e të qenit të pavarur, por ato para që Kuvendi, përkatësisht Qeveria ua jep, kujtoni se janë të Qeverisë. Çfarë keqkuptimi! Sepse buxheti i Kosovës nuk është as i Kuvendit dhe as i Qeverisë. Ai duhet vetëm të mbikëqyret dhe të administrohet nga to. Ato para të cilat ju i merrni nga xhepi im dhe nga xhepi i çdo qytetari të Kosovës, juve ju paguhen që të jeni të pavarur dhe në shërbim të publikut – tonin!

Por, a është kështu? Jo. Sepse, po qe se njeriu shikon lajmet që ju emetoni, del se jo vetëm që jeni në shërbim të pushtetit – dhe sërish aspak të publikut, por në mënyrën më të vrazhdë të mundshme thyeni dhe fyeni inteligjencën e publikut dhe kodin e etikës në gazetari.

Pyes veten dhe ju pyes juve, si, si është e mundur që vetëm në një emision lajmesh (të datës 1 shtator) të emetoni dy blloqe lajmesh (të hapjes) me as më pak e as më shumë se 7 minuta e 35 sekonda Hashim Thaçin dhe Enver Hoxhajn – të dy përballë fëmijëve të manipuluar në mënyrën më antihumane të mundshme duke bërtitur "Thaçi-Thaçi" (sërish në vitin 2010!, në mes të Evropës!). Për të vazhduar më pas me edhe dy herë Hashim Thaçin – një herë me pamje e pamje me rastin e ndërrimit të Komandës së KFOR-it dhe më pas edhe një "o-ton" me imazhe nga Qeveria për "Rezolutën serbe".

Si është e mundur që të flisni për Sindikatën e PTK-së dhe në vend që të flasin sindikalistët – në emër të tyre flet shefi i tyre Shyqri Haxha. Si është e mundur që nga 37 minuta e 23 sekonda lajme në terminin kryesor kohor, të jepen 33 minuta e 45 sekonda lajme "vendore", që i bie lajme protokolli dhe lajme për "sukseset" e Qeverisë dhe Thaçit – përjashto 2 minuta "LDD" dhe vetëm 3 minuta e gjysmë të emetohen lajme "nga bota". Si është e mundur që vazhdojmë t'ju durojmë e durojmë e durojmë me këtë torturë të vazhdueshme, e cila është e paparë dhe e padëgjuar te ndonjë rrjet televiziv në ndonjë shtet demokratik. Ditë për ditë dhe natë për natë.

Jemi të vetëdijshëm që nuk kemi çfarë të bëjmë kundër jush. Por, nuk do të ishte keq t'ua themi që po ua shënojmë. Sepse, ju jeni ndihmëtarët kryesorë të shkëputjes nga realiteti i mirëfilltë dhe ndërtimit të botës së "Big Brother"-it.

Aktori e regjisori i madh amerikan Woody Alen ka thënë njëherë që "E vetmja gjë që televizionin e bën të besueshëm është se parashikimet e motit ndërrojnë në të".

Për ju, do të vlente: nëse shefi i shefave tuaj, që i bie, jo vetëm Kryeministri, por edhe Kryeredaktori Gjeneral i Republikës së Kosovës, ua bën me dije që parashikimi i motit duhet të jetë "kështu" e jo "ashtu" – ju do ta ndërroni edhe atë parashikim!