Meqë edhe zyrtarisht pushimet verore kanë marrë fund, atëherë është me vend që në këtë fillim të sezonit politik vjeshtor duhet ta shënojmë një fakt më se interesant:

Qeveria dhe përgjithësisht institucionet e Republikës së Kosovës nuk kanë pushuar fare! Përpos Kuvendit të Kosovës, i cili edhe ashtu njihet si një nga më përtacët- për të mos thënë më përtaci në Evropë, si presidenti ashtu edhe kryeministri, zyrtarisht nuk kanë pushuar.

A duhet ta shënojmë edhe këtë si një sukses të "shkëlqyeshëm" të prijësve dhe institucioneve të këtij vendi? Në dhe me logjikën e tyre: Po. Sepse narracioni i bërjes së politikës protokollare të të dyve na flet për atë që kanë pasur shumë punë, kanë bërë edhe më shumë punë dhe me po këtë punë do të vazhdojnë.

Fakt është që si njëri ashtu edhe tjetri nuk kanë bërë ndonjë gjë që do të mund të shënohej. S'ka shtim të shënueshëm njohjesh pas vendimit të GJND-së. Mungojnë investimet e huaja. Papunësia është në rritje. Korrupsioni është si edhe më parë veçse tash me nga pak frikë nga EULEX-i. Varfëria po thellohet. Pakënaqësia popullore me këtë qeverisje po ashtu.

Derisa Sejdiun kanë filluar ta kapin ethet e pritjes së vendimit të Gjykatës Kushtetuese të Kosovës por edhe të matematikës së bërjes së politikës partiake në rezidencën që është për dhe e të gjithë qytetarëve të Republikës së Kosovës, e jo vetëm e LDK-së, është kryeministri i Kosovës, Hashim Thaçi, ai i cili edhe pse nuk ka pushuar duket që së paku këta gati dy muajt e fundit i ka shijuar si asnjëherë më parë prejse ka marrë timonin e drejtimit të vendit.

Pas shumë vuajtjesh dhe drithërimash që e përshkuan këtë lider pas më në fund fitores së Prizrenit e me këtë edhe mbylljes së zgjedhjeve lokale dhe "riformatizimit" të Qeverisë- ngjau ajo që vdekatarët e zakonshëm s'e prisnin: kthimi i pllakës dhe fjalorit të Hashim Thaçit nga "luftëtar" kundër Feithit e Sparksit dhe me këtë edhe EULEX-it në "bashkëluftëtar" të tyre kundër korrupsionit. Për të vijuar më pas me ndalimin e (papritur të) liderit të opozitës Ramush Haradinjat në Hagë ("kur ta do- ta do"!!!); vendimin e qartë të GJND-së në favor të Kosovës; huqet e AAK-së rreth bisedimeve për pozitën e pakicës serbe në Kosovë dhe përgjithësisht lansimi i kësaj teme në opinion nga kjo parti, e cila pa liderin e saj duket dhe është kaq e plogësht; grushtimi dhe shkelmimi i Kushtetutës në rastin e kthimit të kryetarit të Rahovecit; përforcimi i medieve dhe bërësve të opinionit, të cilët dita-ditës shtohen ashtu sikurse arkitektura e përçudnuar e Prishtinës; afrimi i zorshëm por për këtë i sigurt me segmente të caktuara të shoqërisë civile te të cilët Thaçi sheh edhe aleatë për zgjedhjet e ardhshme vendore; pritja e mbajtjes së mbledhjes së Asamblesë së Përgjithshme të OKB-së, ku nuk ka si të jetë ndryshe pos edhe një "fitore e Kosovës dhe miqve të saj" dhe së fundi edhe "Express" lasnimi i temës së zgjedhjeve në LDK- lansim ky i cili s'ka si të mos shkojë në drejtim tjetër pos në një telenovelë me narracion "Esmeralde" e ku regjisori dihet se ku(sh) është!

Prandaj, nuk kemi si të mos konstatojmë që këta janë muajt e mjaltit të Hashim Thaçit. Dhe atë vetëm të tij dhe askujt tjetër!

Sidoqoftë, nëse nisemi nga sekreti publik që këshilltarët e Thaçit janë disa hebrenj me nam... dhe të cilët kohëve të fundit janë duke e këshilluar "vetëm nga larg", atëherë do të duhej të jemi bukur të sigurt që ata do t'ia tregojnë atë thënien e moçme pikërisht hebraike. "Kur në jetë (dhe me këtë edhe politikë) je më së miri nisja të mërzitesh e nëse do edhe vajto"... sepse nuk do të të shkojë gjatë.

Prandaj, pushoi a jo kryeministri i vendit, i shijoi ai muajt e mjaltit në vend a jashtë tij, do të duhej t'ia kujtojmë që EULEX-i do ta vazhdojë punën këtë shtator- pas një pushimi të mirëfilltë njëmujor. Pas kësaj vijnë edhe stuhitë si ajo e Raportit të Progresit, apo të raporteve tjera ndërkombëtare. Pa lënë anash këtu as kthimin e shpejt të mundshëm të kryeoponentit të tij nga Haga. E edhe po qe se krejt këto nuk ngjajnë- të vjetrat do dalin sërish në shesh: varfëria, papunësia, sërish korrupsioni dhe sërish jeta nën çdo nivel e qytetarit të Kosovës, i cili do ta presë këtë dimër- edhe më të rëndë se i kaluari... E këtu nuk bëjnë punë as muajt e mjaltit as RTK-ja!