Vera po kalon... Edhe me kalendar...

Ato kolona automjetesh të kosovarëve, që në fillim të verës u regjistruan duke shkuar drejt detit, këto ditë janë parë në anën tjetër të udhës...

Dhe, kolona automjetesh nga Kosova gjatë gjithë verës pati drejt Shqipërisë. Jo të gjithë kishin destinacion bregdetin e Shqipërisë. Kishte edhe të atillë që udhëtuan drejt Shqipërisë, por mësynë Ulqinin. Qejfi i tyre...

Statistika ka edhe sot për këto lëvizje, por për statistikat përfundimtare ende është herët. Kalkulatorët le të pushojnë edhe pak. Sepse, ka ende të atillë që i përmbahen, në këtë rast edhe figurativisht thënies së moçme “Një herë vjen vera kah dera”...

Ama, nga Ulqini, edhe zyrtarisht është bërë publik fakti: vera 2010 është verë rekorde në dhjetë vjetët e fundit.

Atje pati turistë nga gjithkah. Edhe nga vetë Shqipëria, por prijnë kosovarët.

A thua, pse?

Shumëkush ia pati zënë për të madhe një kryeministri të Kosovës, kur para disa vjetësh pati deklaruar pa takt në Sarandë se ka ardhur koha kur turistët kosovarë duhet t’i thonë “stop” shkuarjes për pushime në Ulqin, ndaj ata duhet t’ia mësyjnë bregdetit të Shqipërisë. (Ishte magjepsur me bukuritë e bregdetit të Shqipërisë dhe me pritjen që i ishte bërë, të cilat gjëra sigurisht i përjetonte për të parën herë. Vetëm kështu arsyetohej deklarata e tij e atëhershme jo fort e matur, në asnjë aspekt). Por, asokohe i qe thënë atij kryeministri (edhe publikisht) se edhe Ulqini është i shqiptarëve. Jo për të shitur patriotizëm, më besoni...

Çka ndodhi pastaj?

Doli një kryeministër tjetër. Ky i sotmi, i Shqipërisë, Sali Berisha, i cili në mënyrë të tërthortë, duke bërë Autostradën e Kombit, vërtetoi se edhe Ulqini është qytet i shqiptarëve. I shqiptarëve të Kosovës, i shqiptarëve të Luginës së Preshevës, i shqiptarëve të Maqedonisë, por edhe i vetë shqiptarëve të Shqipërisë...

Kjo verë, me Autostradën e Salës, na bindi të gjithëve për këtë fakt. Më së shumti i bindi vetë ulqinakët...

Kosovarët, shumica prej tyre, nuk udhëtuan më drejt Ulqinit nëpër Podgoricë, Kolashin e Tivar, ku automjetet e tyre gjuheshin me gurë. Por, udhëtuan Autostradës së Kombit. Më shpejt dhe – më sigurt.

Nëpër Autostradën e Kombit e ndjenë veten shumë më rehat. Për të gjitha. Plus kësaj, hasën në patrulla të përbashkëta policore të Shqipërisë dhe të Kosovës. Kënaqësi. Ëndërr. Quajeni si të doni!

Taksisti në Ulqin, ditë më parë, i ka thënë një djaloshi të ri kosovar: “Le të rrojë Sali Berisha! Na e mbushi Ulqinin me turistë si kurrë më parë! Ulqini është i tij!”...

Kjo, sigurisht, sepse Sali Berisha, me Autostradën e Kombit, bëri me dije edhe faktin tjetër se në Ballkan ka boll shqiptarë edhe për bregdetin e Shqipërisë, por edhe për bregdetin e Ulqinit.

Hasmi le të plasë!