Behxhet Haliti

Amerika nuk i dha vizë për të vizituar SHBA-në (nuk i dhanë përgjigje për vizën amerikane, edhe pse atje ishte ftuar për një fjalim, në rolin e kryetarit të Komisionit për Punë të Jashtme në Kuvendin e Kosovës).

Shqipëria e shpalli personazh të vitit 2011 (në sondazhin e Top-Channelit e la prapa edhe Kreshnik Spahiun e Aleancës Kuq e Zi, edhe Edi Ramën e Partisë Socialiste, edhe historianin Kristo Frashëri, edhe presidentin Bamir Topi, edhe kryebashkiakun e Tiranës Lulzim Basha, edhe futbollistin Lorik Cana...).

Në Kosovë, herë flet në Kuvend e herë vepron në rrugë!...

Thonë se “ia ka lagur” edhe Amerikës, e cila “deshi ta fuste në Kuvend, për të mos rrotulluar vetura të EULEX-it”...

Ka thyer shabllonet!

Viti që shkoi, pra viti 2011, duhet të mbahet mend në Kosovë edhe për këtë!

Për thyerje shabllonesh!

Lëvizja e tij, Lëvizja Vetëvendosje, vepron “përmes aktivizimit qytetar, por edhe atij institucional!”.

Kështu thonë vetë!

Kjo i bie shqip: paradite në Parlament, pasdite në rrugë!

Ose e kundërta!

Besa, ka ndodhur të dilet edhe nga seanca plenare e Parlamentit për të folur në rrugë me megafon!

Apo, në pamundësi për të hequr flamurin shtetëror të Kosovës në sallën e Kuvendit, në seancë plenare u betuan si deputetë me flamurin kuqezi para vetes, në tavolinë, ndërsa në çdo festë e hoqën në hyrje të Prishtinës flamurin e madh shtetëror të Kosovës dhe në vend të tij e vendosën flamurin kombëtar shqiptar...

Megjithatë, kujtoj se në rrugë kishin më shumë imagjinatë!

Lëvizje e imagjinatës, me imagjinatë, për imagjinatë!...

Kush nuk pajtohet me mua, le t’i kujtojë dy aksionet më të reja të Lëvizjes Vetëvendosje: Hashimdimri (Babadimri, i maskuar me fytyrën e kryeministrit Hashim Thaçi, duke u dhënë qytetarëve para Qeverisë 500 pako me 13 dhurata-dëme që ia ka bërë Kosovës!) dhe Nënadimri (zëvendëskryeministrja Edita Tahiri, me të gjitha “dhuratat” e “Nënadimrit” që gjatë vitit 2011, përmes negociatave me Serbinë, i dhuroi popullit të Kosovës).

Por, edhe të tjerat!

Ju kujtohet “Doctor Korrupsionis Causa” (çmim ky që iu dha rektorit të Universitetit të Prishtinës, Mujë Rugova, për korrupsionin “që ka prekur çdo sektor të UP-së”).

Një tjetër aksion i Lëvizjes ishte “Hajmali për Bajram Rexhepin” (ia dërguan simbolikisht ministrit të Brendshëm një hajmali para Qeverisë, sepse pati deklaruar se ata që frikësohen në veri të Mitrovicës janë për hajmali, e vetëm një javë më vonë u rrahën atje tre shqiptarë!).

E diplomuan edhe Edita Tahirin, duke ia dërguar para Qeverisë së Kosovës diplomën, me notën 10, të Universitetit të Hajnisë dhe të kompromiseve me Serbinë!

Në sheshin “Nëna Tereze” organizuan aksionin simbolik “Pasarela e Turpit”, me fotografitë e Yjeve të hajnisë së pronës publike, të mirëqenies së qytetarëve dhe të së ardhmes së Kosovës: Hashim Thaçi, Besim Beqaj, Edita Tahiri, Bredri Hamza, Hajredin Kuçi, Bajram Rexhepi.

Kjo nuk ishte Walk of Fame, por Walk of Shame!

Kishte edhe “Kujdes xhepat! Qeveria afër!”, rrotullime kamionësh me mall të Serbisë, ngjyrë të kuqe rektorit të UP-së...

Ama, është keq që kur vendos të futesh në institucione, të dalësh më kreativ në rrugë se sa në institucione!

Më me imagjinatë në rrugë se sa në institucione...

Unë, për rrugën, do ta mbaj mend vitin 2011 te Vetëvendosja!

Për 39 aksionet simbolike, për demonstratat gjithëpopullore “Kundër Hajnisë”, për 10 tribunat e për 5 tryezat e organizuara gjatë vitit 2011!

Jo për 422 diskutimet e deputetëve të Lëvizjes në Kuvendin e Kosovës!

Keq!