Behxhet Haliti

Ata i kanë lexuar, sikur unë, të dhënat në internet!

Sepse, edhe kanë pasur më shumë interesim për t’i lexuar!

Për të ditur “sa po shkon pazari”!

Apo, “për t’ia rritur pazarin” vetes!

“Ata” janë deputetët e Kuvendit të Kosovës...

Në Itali, deputeti merr rrogë mujore 12.000 euro (pa taksa). 4.000 euro i rimbursohen për akomodim në kryeqytet. Udhëton gratis në autostradë, tren të klasit të parë, traget, avion në gjithë territorin e Italisë. Në fund të mandatit të vetëm merr 46.000 euro, dhe në fund të tri mandateve 140.000 euro.

Në Francë, deputeti merr rrogë mujore 7.100 euro (pa taksa). Fle në zyrë, apo në rezidenca qeveritare. I paguhen 40 udhëtime me avion gjatë vitit. Shpërblimet pas aktivitetit parlamentar janë të përjetshme, por në nivelin e 1.000-2.000 eurove.

Në Gjermani, deputeti merr rrogë mujore 6.350 euro. 4.000 euro merr në muaj për “ushtrim të mandatit”. Udhëton lirisht e gratis me të gjitha mjetet e mundshme mbi gjithë territorin e Gjermanisë. Në fund të mandatit nuk merr asgjë. Shpërblimet e përjetshme pas përfundimit të aktivitetit fillojnë pas moshës 67 vjeç.

Në Britaninë e Madhe deputeti merr rrogë mujore 6.350 euro (pa taksa). Merr dieta deri në 2.000 euro në muaj. Nuk mund të flejë në hotele, ku nata kushton më shumë se 150 euro. Mund të udhëtojë gratis kudo, por në avion duhet të jetë në klasën ekonomike. Shpërblimi i përjetshëm pas përfundimit të aktivitetit fillon pas moshës 65 vjeç, e edhe është në shuma minimale (500-800 euro)...

E deputetët e Kuvendit të Republikës së Kosovës?

Votuan Ligjin për të drejtat dhe përgjegjësitë e deputetit. U ankua Avokati i Popullit. Gjykata Kushtetuese tha se privilegjet e deputetëve shkelin dispozitat kushtetuese...

Thonë se paga që merr një përfaqësues i popullit në Kosovë varet nga funksionet që mban në Kuvendin e Kosovës: a është shef i grupit parlamentar, a është kryetar, a është nënkryetar, apo qëndron në krye të ndonjë komisioni.

Kosovës, mesatarisht, një deputet i kushton rreth 30 mijë euro në vit.

Një analizë e Iniciativës për Progres (INPO) ka treguar se paga e deputetit të Kuvendit të Kosovës është rreth 1.500 euro. Por, deputetët e Kuvendit të Kosovës, për pjesëmarrje në seanca, paguhen plus 240 euro. Dhe, nuk mbaron me kaq! Për pjesëmarrje në mbledhjet e komisioneve, deputetët e Kuvendit marrin edhe nga 160 euro në muaj.

Pagat hallall! Por, pas Ligjit të kontestuar për të drejtat dhe përgjegjësitë e deputetit, në opinion u bë publik skandali i 74 deputetëve të Kuvendit të Kosovës, nga të gjitha subjektet politike, që gjatë vitit 2011 kanë marrë shpenzime udhëtimi nga vendlindja e deri në Prishtinë!

Kjo do të ishte krejtësisht në rregull dhe në pajtim me rregulloren që ka Kuvendi i Kosovës për kompensim të udhëtimeve ditore për deputetët që jetojnë në distancë 15 e më shumë kilometra nga Kuvendi i Kosovës, po të mos ishin në listë ata që jetojnë “denbabaden” në Prishtinë, e thonë se jetojnë aty e këtu, sall për të marrë para!

Nuk është puna te shuma: të gjithë 74 deputetët, për tërë vitin 2011, kanë marrë afër 11.000 euro! E rëndësishme është logjika: Merr çka të mundesh! Gllabëro!...

Unë, nga lista, njoha 3-4 deputetë që keqpërdorin para të taksapaguesve kosovarë! Thonë se udhëtojnë, ndërsa jetojnë në Prishtinë! Kanë shtëpi a banesa!

Edhe dikush nga ju njeh të tjerë. I keni fqinj në Prishtinë!

Një propozim: kur t’i takoni duke dalë nga dera e banesës a e oborrit, thuajuni atyre, në vend të “mirëmëngjesi!” a “mirëdita!”, këtë fjali: “E fortë është Kosova!”...

Ka duruar shumë më shumë!

Ju duron edhe juve!

Njëmend, Kosova nuk është Itali, Francë, Gjermani e Britani e Madhe, por “e fortë është”!