Protesta e Lëvizjes Vetëvendosje përfundoi jo ashtu siç alarmuan Qeveria e Kosovës, partitë në pushtet e disa opozitare, ambasadorët e Quintit, përfaqësuesit e BE-së në Kosovë... Nuk u derdh as gjak, e nuk u bë as luftë. Nuk pati as zjarr e as vrasje.

Madje, për dallim nga protestat e kaluara, aktivistët e Vetëvendosjes janë treguar shumë më të qetë, më të “disiplinuar” dhe më të kujdesshëm. Ata të cilët janë treguar të dhunshëm janë pikërisht pjesëtarët e Policisë së Kosovës, të cilët ishin të parët që provokuan protestuesit.

Këtë e panë dhe e dëshmuan të gjithë: protestuesit, përfaqësuesit e medieve, kamerat si dhe përfaqësuesit e Këshillit për Mbrojtjen e Lirive dhe të Drejtave të Njeriut. Këtë nuk e pa vetëm Qeveria e Kosovës, e cila përmes një reagimi të lëshuar për medie “shpreh keqardhje për veprimet e dhunshme të Lëvizjes Vetëvendosje, të drejtuara kundër pjesëtarëve të policisë së Kosovës, të cilët janë në mbrojtje të rendit dhe ligjit”

Të urdhëruar nga Qeveria dhe nga ministri i Brendshëm, Bajram Rexhepi, Policia e Kosovës pos që arrestoi shumë nga protestuesit, përdori edhe dhunë brutale ndaj tyre, madje duke mos i kursyer as deputetët e Kuvendit të Kosovës.

Për të treguar se çfarë policie të fortë kanë dhe për t’i treguar ndërkombëtarëve se “ne për ju gjithçka bëjmë”, drejtuesit e Qeverisë, pos që lejuan hyrjen e disa mauneve me mallra nga Serbia në Kosovë, në kohën kur aktivistët e Vetëvendosjes protestonin, ata i përcollën ato me polici deri në terminal. Ishte ky një veprim shumë naiv dhe i pamatur i Qeverisë së Kosovës. Të kesh në dorë aparatin shtetëror të dhunës, nuk do të thotë se mund ta përdorësh atë kur të duash dhe kur të teket ndaj qytetarëve tu dhe paqësorë. Lejimi i kalimit të maunave serbe ishte edhe një provokim shumë i rëndë ndaj protestuesve përmes poshtrimit. Me këtë veprim drejtuesit e ekzekutivit të vendit janë munduar që me çdo kusht të nxisin protestuesit dhe të tregojnë para opinionit publik se Lëvizja Vetëvendosje është destabilizuese dhe e dhunshme, në mënyrë që të justifikojnë dhunën e përdorur të shtunën.

Protesta natyrisht se pas provokimit të Policisë nuk kaloi pa incidente. Pos arrestimeve, pati edhe të lënduar nga të dyja anët, si nga Vetëvendosja, ashtu edhe nga Policia e Kosovës. Për këta të fundit, Televizioni Publik i Kosovës vetëm sa nuk “qajti”. Gjatë tërë ditës derisa zhvillohej protesta e Vetëvendosjes, RTK policinë e paraqiste si viktimë, derisa vebfaqja e saj nga 9 nëntë lajme kryesore që i kishte në ballinë, në tetë prej tyre “vajtonte” policinë. Ky fakt nuk duhet të na çuditë, sepse tash e sa kohë televizioni publik po e udhëheq fushatën e qeverisë kundrejt kësaj proteste të Vetëvendosjes apo edhe kundër të gjithë atyre që mendojnë ndryshe nga Qeveria.

Ky aksion i Vetëvendosjes, që me gjasë mund të vazhdojë edhe gjatë ditëve në vijim e që ua ka futur frikën deri në palcë qeveritarëve të Kosovës, duket se ua “hodhi” poshtë teoritë e drejtuesve të Qeverisë së Kosovës dhe të shumë ndërkombëtarëve, për ndonjë eskalim të situatës. Alarmi i tyre ishte më tepër një justifikim i frikës së tyre dhe dhunës që do të përdorte eventualisht policia.

Protesta dhe aksione të ngjashme bëhen kudo nëpër vendet e botës demokratike. Kemi shumë e shumë raste, që të mos i përmendim këtu, qoftë nëpër Evropë, apo edhe në vende të ndryshme të botës, ku ka protesta të ndryshme për çështje të cilat një pjesë e shoqërisë nuk pajtohet. Prandaj, edhe kjo protestë nuk kishte asgjë kundërligjore.

Pa dashur të justifikojmë veprimet e askujt, protesta e Vetëvendosjes ka qenë për një çështje, për të cilën Qeveria e Kosovës është e obliguar që me Kushtetutën e vendit ta bëjë - implementimin e rezolutës së Kuvendit të Kosovës, për reciprocitet të plotë politik, ekonomik e tregtar me Serbinë. Tekefundit, ka qenë në të mirë të prodhuesve vendorë dhe kundër Serbisë.

Kjo qeveri që të mos e sjellë veten para një akti të kryer - nxjerrjen e popullit në rrugë, duhet që së pari të respektojnë Kushtetutën e vendit dhe të punojnë për interesa të qytetarëve, e jo që përmes propagandës të mundohet t’i fajësojë të tjerët. Ose në të kundërtën të pranojë se nuk është e aftë ta drejtojë vendin drejt një shteti ligjor, funksional dhe drejt një familjes së madhe evropiane. Duhet të zgjedhë! E jo të ndjellë frikë, dhunë e gjak!