Arbana Xharra

U arrestua një invalid, protestues në karrocë. Ai u xhirua me kamerë duke u tërhequr zvarrë nga Policia e Kosovës. Një fotoreporter u alivanos nga goditjet e policisë. U prangos një qytetar në oborrin e vet, edhe shumë të tjerë pa mëshirë u rrahën. Ky brutalitet i policëve të Kosovës, të shtunën, ndaj protestuesve nga Bashkimi Evropian u vlerësua si adresim i mirë nga Policia e Kosovë.

Michael Mann, zëdhënës i shefes për politikë të jashtme të BE-së, Catherine Ashton, tha se “është për keqardhje dhuna që ka ndodhur, por besojmë se, përgjithësisht, situata është adresuar mirë nga Policia e Kosovës”.

Ai protestat e këtilla i sheh si tërësisht të paarsyeshme, duke u shprehur kundër kësaj qasje që ata e vlerësuan si kundërshtim i parimit thelbësor të BE-së, për tregun e lëvizjes së lirë të mallrave. BE-ja mbështeti politikat e kryeministrit Hashim Thaçi, i cili është duke na dëshmuar haptazi se si ndërtohet pushteti paternalist antidemokratik.

Qëndrimi i Bashkimit Evropian bëri që ai të krijojë komoditet në pushtetin që është duke e shtrirë në format që i ngjajnë një autokrati. Edhe pse më 14 janar na e dëshmoi se çfarë është në gjendje të ushtrojë mbi popullin e tij, veprimet e Thaçit janë mbështetur nga Evropa duke i krijuar komoditet dhe siguri në konceptin e tij qeverisës që nuk mund të quhet demokratik.

Këto ditë na është shfaqur një politikë ndryshe e joparimore e BE-së e cila është në mbështetje edhe të veprimeve të Thaçit edhe të kërkesave të presidentit të Serbisë, Boris Tadiq, për të organizuar zgjedhje në Kosovë.

Kryeministri i Kosovës, të shtunën, mbështetjen e bashkësisë ndërkombëtare e ka shfrytëzuar për të ushtruar dhunë të ashpër ndaj qytetarëve të Kosovës. Deklaratat e zyrtarëve të BE-së kundër protestës janë politika të tyre ditore, por në thelb nuk janë qytetarët e Kosovës e në këtë rast protestuesit, ata që e kanë humbur autoritetin Kosovës, por është vetë kryeministri i cili madje është injoruar në vazhdimësi nga BE-ja.

Të hënën u mor vesh që mund të mbështetet nga Evropa kërkesa e Tadiqit për mbajtjen e zgjedhjeve në Kosovë, derisa para pak ditësh ministri i Qeverisë së Kosovës, Ibrahim Makolli nuk e lejua të futet në territorin e Luginës së Preshevës. Çfarë reagime do të kishte nga BE-ja po të kërkonte Thaçi zgjedhje të Kosovës në Luginë?

Shqiptarët janë ata që trajtohen nga BE-ja me standarde të dyfishta. Jo pse qytetarët e saj nuk kanë dëshmuar vlera pro evropiane, por është qeverisja e degraduar e cila është duke përmbysur perspektivat e qytetarëve të saj duke bërë që politikat ndërkombëtare më shumë të fokusohen te Serbia.

Kështu BE-ja është duke na e dëshmuar çdo ditë angazhimin e saj në avancimin e Serbisë, në reformat që ia bëjnë më të lehtë Serbisë integrimin e saj në Bashkimin Evropian. Ndërkohë Kosova nuk numëron në vend, por po ec prapa.