Naser Sertolli

Pasi ka kaluar krizën e animit politik, atë se për kënd të votojë, se kush ishte tradhtar e kush patriot, dilemë që e ka shoqëruar në vitet dhe zgjedhjet e para pas luftës, qytetari i Kosovës tani e ka kokën më të qetë. Ai ka pasur kohë të mjaftueshme të peshojë “për” dhe “kundër” dhe tani ka një përfytyrim më të qartë për secilin subjekt politik. Po ashtu, ai ka krijuar në mendje edhe heroin politik.

E di shumë mirë se cili politikan ka kontribuar për të mirën e komunitetit ku jeton, e cili ka qenë i përqendruar kryekëput për fryrjen e xhepit personal. Gjithashtu, ai është impresionuar për të mirë ose për të keq për ndonjërin të zgjedhur. I ka bërë përshtypje sjellja e tij, këmbëngulja, karakteri, njerëzia apo edhe pafytyrësia e ndonjërit.

Për shembull, mund t’i ketë lënë mbresa lidershipi i ministrit Rexhepi, i cili është për çdo lavdatë meqë është njeri i fjalës, është i përgjegjshëm në maksimum për detyrën që ka.

Po marrim disa situata hipotetike për të cilat po qe se nuk do t’i dilnin hesapet, ministrit të Brendshëm do t’i shembej toka nën këmbë e qielli në kokë nëse nuk do ta bënte atë që e ka për obligim në këso rastesh - të jepte dorëheqje.

Së pari, po e zëmë, shefi do ta urdhëronte ministrin ta shkarkonte drejtorin e policisë në një situatë të dhënë, sado e mjegullt të jetë ajo. Ministri Rexhepi, si i përgjegjshëm që është, do t’ia bënte një telefonatë drejtorit dhe me eufemizma do t’i tregonte për situatën, pra për lajmin e hidhur se nuk duhet ta konisderojë më veten në krye të forcave të rendit. Më mirë ta njoftoj unë, do të mendonte ministri, se drejtori të marrë vesh nga bota.

Situata tjetër, hipotetike po ashtu, kur ministri Rexhepi do të jepte dorëheqje është nëse do të urdhëronte policinë speciale ose të trafikut, nuk është fort me rëndësi, për ndonjë operacion dhe nga ky operacion të ktheheshin më pak policë me frymë. Ministri Rexhepi më parë do të vdiste se ta shihte dikush në publik, e sidomos duke u mburrur me “suksesin” e operacionit.

Ministri Rexhepi do të ikte dhe do të mbyllej në shtëpi po ta shihte se nuk po i respektoheshin vendimet për tabelat e veturave, të përdorura nga serbët kosovarë. Ani po t’i ndodhte të mos i respektoheshin nja dhjetë ultimatume për këto tabela, ai do të fshihej diku ku nuk do t’ia shihte surratin asnjë qytetar i vendit për muaj të tërë.

Ruana Zot po të ndodhte ndonjë skandal, sikur po e zëmë, për përfitime materiale policia, në kreun e saj, të falsifikonte dokumente nga blerja e armëve dhe municionit.

Aq më keq sikur kjo aferë ta lemeriste qeverinë e një vendi mik, ku blihen këto pajisje, duke e detyruar atë që të shkëpusë kontratat e kësaj natyre me policinë tonë të re dhe totalisht të papërgjegjshme. Përballë një situate të ngjashme, ministri ynë pa asnjë dyshim do të përfundonte në Kardiokirurgji.

Janë edhe shumë ngjarje të ngjashme për nga natyra (sikur këto të 14 janarit), që mund të ndodhin, por shyqyr që nuk po ndodhin, për të cilat ministri i Brendshëm nuk do të përtonte ta linte detyrën meqë, po e theksojmë, ai është i përgjegjshëm dhe me karakter. Diçka që e ka dëshmuar.

AI KA DHËNË DORËHEQJE më 12 shkurt 2007. Fatmir Rexhepi është i pari dhe i vetmi ministër në historinë e re të Kosovës, që ka dhënë dorëheqje (si akt moral) për një ngjarje të hidhur me të cilën ai dhe vartësit e tij nuk kishin kurrgjë të bënin. Dhe, në fund, pavarësisht performancës në krye të resorit dhe pozitës që kishte (e që nuk e ka) në hierarkinë e partisë së tij, për gjestin e treguar, ai e meriton t’i hiqet kapela.

naser.sertolli@zeri.info