Adrian Çollaku

Përplasen kudo. Në Kuvend, në komisione parlamentare, në medie, në rrugë... Tash e sa kohë thuajse vetëm ata janë gjallë. Bëhet fjalë për Lëvizjen “Vetëvendosje” të Albin Kurtit dhe për Partinë Demokratike të Kosovës të Hashim Thaçit. Mbizotërimi i tyre jo vetëm në skenën politike, por edhe në tërë opinion publik, është më se evident, sidomos në muajin e fundit.

Polarizimi i skenës politike nga këto dy subjekte politike ka bërë që të gjitha subjektet e tjera, përfshirë ato opozitare, si: Lidhja Demokratike e Kosovës, Aleanca për Ardhmërinë e Kosovës, si dhe ato në koalicion si Aleanca Kosova e Re dhe Partia e Drejtësisë, të jenë totalisht jashtë loje dhe nën hije.

Hiç më larg se të martën në Komisionin për Amendamentimin e Ligjit për Zgjedhjet pati përplasje ndërmjet përfaqësuesve të “Vetëvendosjes” dhe atyre të PDK-së. Madje, përfaqësuesja e “Vetëvendosjes”, Albulena Haxhiu, në shenjë revolte nga “dominimi” i PDK-së e lëshoi këtë mbledhje.

Ky nuk është rasti i vetëm i “luftës speciale” ndërmjet “Vetëvendosjes” dhe PDK-së. Gjatë tërë vitit këto dy subjekte janë përplasur vazhdimisht, qoftë për bisedimet, qoftë për veriun, qoftë për çështje të brendshme... Për të kulmuar me kalimin e mocionit të “Vetëvendosjes” në Kuvend për reciprocitet të plotë politik, ekonomik e tregtar me Serbinë, që si rrjedhojë pati dy protesta njëra pas tjetrës. Derisa protesta e parë e mbajtur më 14 janar pati dhunë dhe përplasje ndërmjet protestuesve që mbështesnin “Vetëvendosjen” dhe Policisë së Kosovës, e kundërta ndërkaq ndodhi më 22 janar, ku pati një protestë të qetë të “Vetëvendosjes”.

Të mos i numërojmë të gjitha aktivitetet e “Vetëvendosjes” në kundërshtim të Qeverisë Thaçi II, sepse vështirë se do të mundë t’i përfshinim në këtë shkrim.

As partia e Thaçit, që e udhëheq ekzekutivin, nuk qëndroi duarkryq. Gjatë gjithë kohës u përplas me Lëvizjen “Vetëvendosje”, duke zhvilluar një “luftë” speciale dhe duke u ndjerë e rrezikuar vetëm nga aktivistët që udhëhiqen nga Albin Kurti. Rasti më i freskët është ai i 20 janarit, kur PDK-ja në Kuvend arriti ta rrëzojë mocionin e miratuar vetëm një muaj më parë nga partitë opozitare, duke krijuar kështu një praktikë të paparë deri më tani parlamentare. Megjithatë, qëllimit ia arriti. “Vetëvendosje” më nuk mund të dalë në rrugë e të thirret në mbrojtje të vendimeve të organit më të lartë qeverisës në vend - Kuvendit.

Nga tërë këto përplasje një gjë është më se e sigurt - fuqizimi i PDK-së dhe i “Vetëvendosjes” është i padiskutueshëm. Siç është i padiskutueshëm edhe fakti se partitë opozitare LDK e AAK kanë mbetur nën hije totale. Këtë nuk mund ta mohojë askush.

Shumëkujt, përfshirë edhe përfaqësuesit e këtyre partive politike “outsajdere”, mund t’u duken tërë këto përplasje dhe debate të ashpra ndërmjet PDK-së dhe VV-së një asgjë hiç, megjithatë kjo nuk qëndron. Ata mund të mendojnë se nuk jemi në kohë zgjedhjesh dhe nuk ka shumë rëndësi nëse janë apo nuk janë aktivë e prezentë në politikat ditore, mirëpo politikanët çdo herë janë në kohë fushate paraelektorale.

Dhe, këtë më së miri po di ta shfrytëzojnë PDK-ja e Hashim Thaçit dhe “Vetëvendosja” e Albin Kurtit. Nuk do mend se kjo atyre shumë lehtë mund t’iu përkthehet në vota dhe në përkrahje politike.