Milaim Shefkiu

Kuvendi i Kosovës ka disa muaj që është shndërruar në një arenë përplasjesh ndërmjet deputetëve të pozitës dhe opozitës. Këto përleshje, kohën e fundit janë bërë modë, kryesisht ndërmjet deputetëve të Partisë Demokratike të Kosovës dhe atyre të Lëvizjes “Vetëvendosje”. Akuzat që shfaqin ata në Kuvend nuk i ngjasojnë as odave ta katundeve, sepse debatet që ata i zhvillojnë në institucionin më të lartë ligjvënës, shpeshherë janë banale, të pavlera dhe të pakuptimta.

Nuk merret asnjëri prej tyre me hallet e njerëzve, por merren me atë se kush ma shumë është i lidhur me Serbinë e kush më pak. Kush ka ma shumë “jarana” në Beograd e kush s’ka asnjë, apo kanë pasur disa më herët e tash i kanë shkëputur relacionet.

Ky lloj debati në Kuvendin e Kosovës është bërë aq i pakuptimtë, aq i pavlerë dh aq i pamoralshëm, sa që duhet t’i vihet pikë.

A është më shumë e rëndësishme për qytetarët e Kosovës që të dinë se sa kile suxhuk i janë zënë një deputeti në bagazh të veturës, se sa të merren më çështjen se pse nuk po pastrohen rrugët nga bora dhe kush i ka fajet për këtë.

Pse nuk merren ligjvënësit me hallet e votuesve të tyre, një pjesë e madhe e të cilëve kanë mbetur të ngujuar nëpër shtëpi, sikur të jenë në “gjak”.

A e dinë ligjvënësit e Kosovës se vetëm dy kilometra prej Prishtinës, në lagjen “Veternik”, qytetarët kanë mbetur të bllokuar nëpër shtëpi, e të mos flasim për zonat rurale, ku qytetarët i ngjasojnë “vikingëve” të parahistorisë.

Natyrisht që shumicës së deputetëve nuk u bën përshtypje kjo, sepse i kanë “xhypat” që shpërthejnë “malet”, por për njerëzit e rëndomtë, të cilët i kanë manipuluar gjatë zgjedhjeve, është hendikep moskujdesja institucionale, apo të paktën qarja e halleve për ta.

Edhe nëpër kuvendet e vendeve më demokratike në botë ndodhin përplasjet ndërmjet ligjvënësve, madje edhe me shkëmbim grushtesh e shqelmash, por jo për suxhuk, as për verë as për patriotizëm, por për ndryshimin e ndonjë ligji, që dëmton ose mbron interesin e qytetarëve.

Kjo nomenklaturë e Kuvendit duket se është më e pamësuar për ligjbërje dhe marrje vendimesh. Nuk është vetëm seanca e djeshme ku “Kamishi” ka sulmuar liderin e “Vetëvendosjes”, Albin Kurtin, për mbajtjen e relacioneve me serbët e Kosovës dhe me ata të Serbisë. Këto akuza janë bërë modë në Kuvend, sepse asnjëra palë nuk dallon nga tjetra. Një javë më parë ishte Albin Kurti ai që kërkoi nga kryeministri Hashim Thaçi që të përgjigjet për takimet e tij me presidentin serb, Tadiq.

Në kuvend shpesh dëgjohen fjalët: “mbylle gojën kur flas unë”. Tjetri shan me nanë, një i thotë: “je sa një buburrec për mua”. Një deputet tjetër akuzon për takime të fshehta me serbë dhe për tradhti kombëtare...“ju jeni idiotë” etj. Pra kësilloj “perlash” të natyrës kush-kujt, janë frazeologjitë më të shpeshta që deputetët i përdorin gjatë debateve në Kuvend.

Me siguri këto sharje nuk i kanë bërë përshtypje atyre qytetarëve që kanë mbetur në “burg shtëpiak” për shkak të borës, e as atyre qytetarëve që luftojnë për ekzistencë. Secili qytetar që e ka parë dje “live” Kuvendin ka lëshuar një ofshamë dhe sharje në drejtim të deputetëve, të cilët livadhisin si në “bahçe t’babës” nëpër korridoret e Kuvendit.

Prandaj shumë më parimore, më objektive dhe më e natyrshme, është që deputetët të merren me probleme me të cilat ballafaqohen qytetarë, me hallet, papunësinë, me skamjen, se sa kush është më patriot e kush me pak, ose kush ka lidhje me Serbinë.

Për të gjithë ato personazhe që kanë kaluar nëpër periudhat vendimtare, do të vendosë historia. Por, jo sot, pas disa vitesh.

Kështu të gjithë deputetët duhet të rrini pa gajle për të kaluarën, sepse siç ka thënë Ismail Qemajli, “nderi i secilit qëndron në vend të vetin”.