Behxhet Haliti

Me Ligjin për Protokollin e Shtetit të Republikës së Kosovës, neni 48, pika 3, Presidenti i Republikës së Kosovës, me vendim, shpall ditë zie shtetërore.

Ditë zie shtetërore, me Ligj, Presidenti shpall: për personalitete të larta shtetërore e publike; për personalitete të shquara të komunitetit ndërshtetëror me origjinë kosovare; për njerëz që sakrifikojnë jetën e tyre në krye të detyrës; dhe, për fatkeqësi të rënda njerëzore, që prekin thellë ndërgjegjen e kolektivitetit.

E hëna, 13 shkurt 2012, ishte ditë zie në territorin e Republikës së Kosovës.

Sepse, Republika e Kosovës përjetoi fatkeqësi të rëndë njerëzore.

Nga 11 familjarët e vëllezërve Fehim e Rexhep Reka në Restelicë të Dragashit, shpëtoi vetëm një: vajza 5 vjeç Amsera, 9 kufoma u gjetën, për të dhjetën po kërkohet ende.

15 shtëpitë e një lagjeje në Restelicë u goditën të shtunën, më 11 shkurt 2012, nga një ortek i madh bore, i trashësisë 10 metra dhe i gjerësisë 500 metra...

Presidentja e Republikës së Kosovës, Atifete Jahjaga, bëri mirë që shpalli ditë zie, por nuk bëri mirë kryeministri i Republikës së Kosovës, Hashim Thaçi, i cili vetëm disa minuta pas vendimit të Presidentes, edhe ai shpalli ditë zie! Nejse! Kjo nuk është temë për bisedë në ditë zie!...

Në Kosovë, të hënën, pati zi e muzikë!

Sipas “Adresari i subjekteve transmetuese Radio dhe TV të licencuara në KPM 2011”, pra të Komisionit të Pavarur për Medie të Kosovës, në vendin tonë veprojnë 84 radio lokale: 50 emetojnë program në gjuhën shqipe, 26 në gjuhën serbe, 3 në gjuhën boshnjake, 2 në gjuhën turke, 2 në gjuhën gorane, 1 në gjuhën rome, dhe 22 radio, pos emisioneve në gjuhën për të cilën kanë marrë licencë, emetojnë programe të kombinuara: edhe në gjuhën turke, boshnjake, rome, gorane, ashkali etj.

Kush i kontrollon këto medie me frekuenca transmetuese që janë burim publik që i përket gjithë shoqërisë së Kosovës?

Do të më thoni: Komisioni i Pavarur i Medieve!

Pajtohem!

A i kontrollon?

Po ju them: jo!

Nëse Presidenti i Republikës së Kosovës merr vendim për shpalljen e ditës së zisë në tërë territorin e Republikës, ndërsa radiot që emetojnë program në gjuhën serbe brenda territorit të Kosovës gjithë ditën emetojnë muzikë popullore e argëtuese, çfarë kontrolli ka KPM mbi këto medie?

Qe vetëm tri radiostacione me program në gjuhën serbe në Kosovë që, të hënën, në ditë zie të shpallur, emetuan muzikë popullore e argëtuese: Radio Antenna, që si adresë ka Çagllavicën afër Prishtinës; Radio Vitez nga Preoci i Fushë-Kosovës, dhe Radio Kontakt Plus e Mitrovicës...

Se a bënë kështu edhe të tjerat, le të kujdeset KPM.

Sepse e ka për detyrë!

Ato radiostacione të Kosovës të hënën vepruan jashtë kontrollit shtetëror të Kosovës!

Për më tepër: marrin edhe donacione nga Qeveria e Republikës së Kosovës!...

Në letra të KPM-së thuhet se “nëse një subjekt transmetues shkel Ligjin për Komisionin e Pavarur për Medie dhe Transmetim, kushtet e licencës së vet apo cilëndo rregullore të KPM-së, atëherë KPM-ja ka autoritetin që të ndërmarrë një numër masash disiplinore, prej vërejtjeve formale deri te sanksionet financiare. Në raste të jashtëzakonshme, KPM-ja mund të suspendojë apo të anulojë licencat transmetuese”.

KPM, merrua licencat atyre që të hënën nuk respektuan shtetin e Kosovës!

Është njerëzore kjo, në instancë të fundit, sepse ata nuk respektuan as njerëzoren!