Gjëja më e palakmueshme me të cilën mund të merret sot njeriu në Kosovë është prognoza e gjërave. Parashikimi...

Pse?

Sepse, jo që nuk të dalin kurrë të sakta ato parashikime, por Kosova tashmë është bërë e njohur edhe si vend ku thyhen edhe teoritë, e lëre më prognozat. Thjesht, në Kosovë nuk ka teori që nuk thyhet.

As definicion. As ekuacion...

As ato që i njeh dhe që i pranon bota prej se di për vetveten.

Bile, po të jetonin këtu Einstein e Darwin, edhe atyre do t’u thyheshin teoritë. Dhe, jo vetëm atyre...

Teoria e Relativitetit, e njohur si teori fizike e matjes në pikat inerciale të referimit E=mc² e Albert Einsteinit, në Kosovë do të bëhej E=mc3 ose dreqi e di qysh! Me rëndësi është se edhe Einsteinit do t’i thyhej teoria!

Edhe tezave të gradualizmit dhe seleksionimit natyror të Teorisë së Evolucionit të Charles Darwinit do t’u ndërrohej kahu.

Plus do të shpikeshin edhe teza të tjera. Me rëndësi të mos i dalë Darwinit ashtu si ka menduar!...

Në politikën kosovare të pasluftës janë thyer të gjitha prognozat. Edhe teoritë...

Kur u thye një teori, menjëherë pas luftës, në një objekt të madh në Prishtinë u shkrua: “Mos e prek! Pronar: Skënderbeu!”.

Kur u thye teoria tjetër, disa vjet më vonë, u bënë bashkë në koalicion “macja” e “miu”!

Pas shpalljes së pavarësisë së shtetit më të ri në botë, u thye teoria për njohjet që do t’i bëhen Kosovës, e njohur si “shtetet po presin në radhë për të na njohur!”.

U thye edhe teoria: me shpalljen e pavarësisë, gjithçka ka marrë fund! Shtatori është afër! Serbia në një këmbë! Paralajmërohen sërish bisedime...

Një teori tjetër e thyer u quajt riformatim!

Pastaj, u thye edhe ajo që quhej “zero tolerancë...”.

Pas thyerjes së teorisë së radhës, të asaj që quhet sundim i ligjit, policia e EULEX-it vendosi të hyjë derë më derë!

Dhe, natyrisht se këtu nuk ka vend të mjaftueshëm për numërimin e të gjitha teorive të thyera në Kosovë. Por, më e reja, assesi nuk mund të anashkalohet.

Më thoni: sipas cilës prognozë, ose edhe sipas cilës teori, pas teorisë së thyer të quajtur riformatim, do të mund të ndodhte ajo që ndodhi: i hequri nga një post për, siç u tha atëherë, paaftësi menaxhuese, apo edhe për ndonjë gjë tjetër (ama i njohur për teorinë: “Qeveri më të pakorruptuar se kjo jona nuk ka në tërë rruzullin tokësor!”) , të caktohet në postin me emër të njëjtë, veçse të ndryshojë dikasteri?

Edhe sa u përket medieve, gazetarëve dhe gjurmimit të së vërtetës, në Kosovën e pasluftës janë thyer të gjitha teoritë! Ju kujtohet kualifikimi: “ata/ato janë armiq të shtetit!”...

Kështu, me gjasë, nuk do të jetë edhe kësaj radhe, sepse mediet, duke e dashur të vërtetën, njëra pas tjetrës reaguan në lajmin për kalimin e kolltukxhiut në kolltukun tjetër, me bekimin e thyerësve të teorive në Kosovë!

Dy ditë më vonë, kolltukxhiu shkarkohet sërish! Edhe nga kolltuku i ri në të cilin zor se është ulur ndonjë minutë!

Kush ka mundur ta prognozojë këtë? Apo edhe të merret me teorizime të tilla?

Në Kosovë thyhen prognozat, teoritë, ekuacionet!

A thua, deri kur?

Deri atëherë sa të ekzistojmë ne, të këtillë si jemi sot!

Të mirë a të këqij, gjykoni vetë!

P. S. Këshillë (pa të drejtë ankese): Në Kosovë mos prognozo, as mos teorizo! Hallku t’i ... (lexo: thyejnë!) teoritë!

(Autori është zëvendëskryeredaktor i gazetës “Zëri”)