Nuk jam i Kosovës! Deri më 2015!

Jam, nëse doni, i Somalisë a i Afganistanit! Deri më 2015!

Do të pyesni: pse?

Sepse m’i ftohu penjtë ministri i Transportit dhe Postë-Telekomunikacionit të Kosovës, të shtetit që ia kam marrë para do ditësh pasaportën, kur tha se punime nëpër rrugët e Kosovës do të ketë deri në vitin 2015!

Këtij limiti kohor, duke parë realitetin e përditshëm, do t’ia shtoja edhe nja 3-4 vjet të tjera! Nëse jo më shumë! Ministri e tha se atëherë do të kemi rrugët më të mira në rajon...

Nëse del kështu, atëherë do të them me gojën plot se jam i Kosovës! Dhe, do të mburrem me këtë fakt! Nuk dua të kuptohem se jam kundër ndërtimit të infrastrukturës rrugore në Kosovë, sepse vetëm i çmenduri do të dëshironte gropa e baltë aty nga shkel përditë.

Por, jam kundër kaosit që po krijohet rrugëve. Nisuni nga Prishtina drejt Mitrovicës! Nisuni nga Prishtina drejt Pejës! Hyni nga Veterniku në Prishtinë!...

Nisin punimet rrugëve, pastaj, duke kaluar ditët, përditë e më shumë, nëpër vendpunishte

sheh pak e më pak teknikë e punëtorë. Teknika rri, punëtorët e pakët mbështesin mjekrën në majë të bishtit të lopatës!

Pësojnë qytetarët nga kaosi në komunikacion, pësojnë automjetet e tyre... Po të thosha

se në vendet tjera (nuk po mendoj në Perëndim) punohet pak si më ndryshe, do të dilte se po moralizoj.

Ama, pse nuk punohet edhe natën, kur ka më së paku qarkullim rrugëve? Pse nuk punohet ditëve të vikendit?

Pse nuk ka sinjalizime të duhura, por përnjëherë të sharron rrota e automjetit në gropa e puseta nga të cilat vështirë nxirret automjeti pa të ndihmuar dikush?...

Pra, vërejtja është aty jo pse po punohet rrugëve, por pse po punohet si nuk duhet!

Nga kjo se punohet si nuk duhet, të krijohet përshtypja se dikush po e bën këtë me të vetmin qëllim: të tregohet se po punohet gjithkah!

Nuk jam as i Prishtinës! Deri më 2015! Jam, nëse doni, i Mogadishit a i Kabulit! Deri më

2015!

Do të pyesni: pse?

Sepse nga pompa e benzinës “Valoni Petrol” në Veternik, në hyrje të Prishtinës nga drejtimi i Shkupit, e deri te Grand Hotel Prishtina, në qendër të Prishtinës, që mund t’i ketë maksimumi 3 kilometra, nëse qëllon në kohë tollovie në komunikacion, e tollovi është gati gjithë ditën e lume, me automjet të ndodh të bësh edhe 40 minuta rrugë!

Dikur, në Shqipëri, kur nuk kishte rrugë të mira, ato mateshin me orë udhëtimi e jo me kilometra. Tash ka ardhur koha që edhe në Kosovë, pra jo vetëm në Prishtinë, rrugët të maten me orë e jo me kilometra! Shpresoj vetëm deri në vitin 2015!...