Një ministri e Qeverisë së Kosovës, udhëheqësit e së cilës jo fort larg shëtisnin nga një vend në vendin tjetër të Evropës dhe kur ktheheshin në Kosovë deklaronin triumfalisht: “Filan shteti do të pranojë kaq e kaq punëtorë sezonalë nga Kosova!”, sikur i ka harruar fjalët e veta!

Vera po shkon, punësime sezonale nuk pati askund, të varfrit po bëhen edhe më të varfër në Kosovë...

Për më tepër, kush më nuk i përmend premtimet e rreme të udhëheqësve të Ministrisë së Punës dhe Mirëqenies Sociale!

Po kjo ministri, edhe tash triumfalisht, propagandon nëpër media, me shumë zhurmë, aksionin jo vetëm të saj për hapjen e kuzhinave popullore për skamnorët.

Një kuzhinë e tillë u hap në Mitrovicë, një në Prishtinë. Thonë: tjetra do të hapet në Pejë...

Ajo e Mitrovicës është kuzhina e parë popullore në Republikën e Kosovës...

(Vlen të mbahet në mend: kuzhina e parë popullore në Republikën e Kosovës!).

Bile, në hapjen e këtyre kuzhinave, është vetë ministri i kësaj ministrie që, në shenjë solidariteti me qytetarët që në statistikat e Ministrisë së tij trajtohen me kategorinë “raste sociale”, merr shujtën e parë të ushqimit. Në Mitrovicë, pas tij, u renditën udhëheqësit lokalë, njësoj si në Prishtinë, plus dy-tre donatorë. Kështu sigurisht do të jetë edhe në Pejë...

Projekti i MPMS është emërtuar “Shujta për të gjithë”, por kuzhina e Prishtinës do të ofrojë 300 shujta në ditë. Ajo e Mitrovicës 200! Për të Pejës nuk dihet ende...

Nuk dua të besoj se në statistikat e MPMS, në kategorinë “raste sociale”, figuron ndonjë shifër e çmendur: 300 raste sociale në Prishtinë! Apo: 200 raste sociale në Mitrovicë!

Pse atëherë emërtimi “Shujta për të gjithë”?

Ministri premton gjithsej pesë kuzhina popullore në Kosovë...

A thua, në vetëm pesë komuna të Kosovës ka mjerim social?

Ministër, krejt Kosova është shndërruar në raste sociale!

Krejt Kosova është bërë për kuzhinë popullore!

Kjo është shenjë e keqe!

Nuk dua të përmend tash statistika se sa të papunë ka Kosova. Nuk dua të përmend as statistika se sa për qind të kosovarëve jetojnë në varfëri, pastaj sa jetojnë në varfëri të skajshme! Jo pse nuk i di këto shifra, por sepse ato ndërrojnë nga dita në ditë. Dëshmi e rëndimit të gjendjes në këtë aspekt, pra edhe të rritjes së shifrave, është edhe vetë aksioni i MPMS për hapjen e kuzhinave popullore!

Ministrit të kuzhinave popullore po i tregoj se, kinezët (nëse nuk gaboj), thonë: “Mos më jep peshk për të ngrënë! Më mëso si kapet peshku!”...

Në përkthim edhe më të lirë: “Nuk të ndihmon ai që të jep peshk për të ngrënë, por ai që të mëson si kapet peshku”!...

Ky popull, definitivisht, duhet të mësohet si kapet peshku!

Definitivisht!

Sa nuk është bërë vonë!