Kushtetuta e Republikës së Kosovës (2008) e përkufizon avokaturën (advocatura) si “profesion të pavarur që ofron shërbime sikur është e rregulluar me ligj” (neni 111.1.). Ndërkaq, Ligji mbi avokaturën dhe ndihmën juridike (2008), si “lex specialis”, duke detajuar funksionin e avokaturës (avokatisë), pretendon se kjo “ofron shërbime dhe ndihmë profesionale juridike personave fizikë dhe juridikë për mbrojtjen dhe realizimin e të drejtave dhe interesave të tyre në pajtim me rendin juridik në shoqëri” (neni 1.2.).

Në këtë linjë, është Statuti i Odës së Avokatëve të Kosovës (2007) ai akt juridik nënligjor i cili ngrit në shkallë të detyrave “me rëndësi të posaçme” edhe çështjen e - zhvillimit dhe përparimit të etikës së avokaturës (neni 4.4).

Ky Statut (statutum), prandaj, i qaset edhe çështjes së, siç emërtohet këtu, pllakës me mbishkrimin e avokatit prej nga rezultojnë dy obligime: i pari, që i referohet vendndodhjes së pllakës, sipas të cilit - ajo duhet të vendoset “në hyrjen e zyrës” dhe i dyti, që i referohet përmbajtjes së tekstit në pllakë, sipas të cilit - “pllaka duhet të përmbajë shenjën “Avokat”, emrin dhe mbiemrin e avokatit si dhe shkurtesën zyrtare të shoqatës, ose shenjën e zyrës së përbashkët” (neni 41).

Në këtë kontekst, Statuti mohon katërçipërisht marketingun përmes pllakës për ushtrimin e profesionit të avokaturës.

“Pllaka nga neni 41 i këtij Statuti, sipas pamjes, madhësisë dhe formës nuk duhet të ketë karakteristika reklamuese“, thuhet në të (neni 42).

Akti pasues, Kodi i etikës profesionale të avokatit (2007) obligon avokatin që “me ndërgjegje t’i plotësojë detyrat që dalin prej profesionit të avokatit dhe të ruajë ... dinjitetin ... gjatë kryerjes së profesionit të tij ...” (neni 8).

Kodi e quan se “është në kundërshtim me nderin ... e avokaturës, çdo jo lojalitet në afarizëm e veçanërisht tërheqja e klientëve nëpërmjet ... reklamave” (neni 13).

Përndryshe, edhe Kodi obligon vendosjen, përkatësisht ekspozimin e mbishkrimit të avokatit i cili, sipas këtij akti, mund të përmbajë këto atribute: (1) emrin e avokatit; (2) informata kontaktuese; (3) arsimimin paraprak; (4) anëtarësinë në ndonjë organizatë profesionale dhe (5) çfarëdo informate tjetër të lejuar nga Oda” (neni 96 pika (a) nënpikat 1)-5).

Mirëpo, në kuadër të kapitullit të parimeve themelore (I), Kodi mohon prerazi marketingun që i atribuohet mbishkrimeve të tjera përkrah atij të avokatit, mbishkrime këto të cilat aludojnë në punët që ligjërisht s’përkojnë me titullin e avokatit dhe dëmtojnë avokatinë.

Dhe, jo vetëm kaq. Edhe në kuadër të kapitullit (XIII) që i kushtohet reklamimit dhe kërkimit të klientëve, ky Kod, mohon shprehimisht marketingun e punëve që nuk inkorporohen në funksionin e avokatit.

“Avokatit nuk i lejohet ... të reklamojë zyrën për punët që nuk i përkasin profesionit të avokatit (fotokopjim, përkthime, ndërmjetësime, etj.)”, theksohet qartazi në këtë Kod (neni 96 pika (d) nënpika (4).

E vërteta është se, përkundër moslejimit të këtillë të marketingut, një numër i caktuar avokatësh, çuditërisht, dështojnë fare së respektuari këtë obligim juridik!

Ky fenomen i shpërfaqur mjaftueshëm në jetën avokatore kosovare, provohet pa ekuivoke me faktin se në hyrje të zyrave të tyre dhe të ambienteve të ndërtesave ku gjenden zyret e tyre – këta avokatë afishojnë, bëjnë publike shërbime të cilat nuk i promovon dot e drejta avokatore. Në të tilla mbishkrime shkruan, p.sh: “Fotokopje” (që i referohet profilit të fotokopjuesve), “Përkthime” (që i referohet profilit të përkthyesve, interpretëve gjuhësorë). Këto, sikundër edhe të tjera stereotipe janë me madhësi dhe forma nga më të ndryshme. Janë një apo shumëngjyrëshe. Të ndriçuara apo të pandriçuara. Vërehen nga çdo anë.

Kjo shumësi mbishkrimesh, (“Avokati” “Përkthime”, “Fotokopje” plus të tjera) vizualisht pasqyron një imazh paradoksal sepse shumë zor se të gjitha këto profesione i kanë të licencuar avokatët e caktuar dhe se në këtë pleksje cilësish profesionale këta mund t’i ofrojnë klientelës shërbime të mirëfillta profesionale dhe njëkohësisht me ndërgjegje mund ti plotësojnë “obligimet profesionale”, edhe si avokat, edhe si përkthyes, edhe si ndërmjetësues, edhe si fotokopjues edhe si ....

Mbi bazë të sipërthënave, intuita juridike më thotë se marketingu i tillë, pavarësisht justifikimeve të kësaj kategorie të komunitetit avokator, pasqyron haptazi atë veprim apo punë që pa mëdyshje bie ndesh drejtpërdrejt me parimin e dinjitetit avokator i dalë nga brendia e tekstit të betimit solemn që thotë: “Betohem se profesionin e avokatit do ta ushtroj me dinjitet, ndërgjegje ... duke respektuar rendin juridik dhe kushtetues” - neni 7.1 i Ligjit mbi avokatinë dhe ndihmën juridike.

(Autori është avokat – Mitrovicë)