Prej muajsh po vërtitet sërish ideja e ndarjes së Kosovës dhe shkëputjes së veriut. Pasiviteti i jashtëzakonshëm i qeverive të njëpasnjëshme të Kosovës ndaj veriut po krijon bindjen tek ndërkombëtarët se veriu në vetvete nuk është aq i rëndësishëm për kosovarët kështu që mund edhe të ndahet. Ka ardhur momenti që Qeveria e Kosovës të veprojë intensivisht për të krijuar tek të huajt bindjen se veriu është jashtëzakonisht i rëndësishëm për Kosovën.

Një mënyrë për të dëshmuar rëndësinë e veriut është rritja e buxhetit në investime për integrimin e plotë të veriut të Kosovës. Fatkeqësisht, investimet nuk kanë shkuar ku është interesi më i madh shtetëror, por janë përqendruar atje ku ka qenë më e lehtë të vidhet apo atje ku qeveritarëve iu ka leverdisur politikisht (zona me interes elektoral ose me përqendrim militantësh që shpërblehen për zellin). Serbia është e vetëdijshme që e ka humbur Kosovën dhe prapëseprapë investon fuqimisht aty, kurse Prishtina ka boll shanse ta mbajë veriun e gjithsesi nuk investon në mënyrë domethënëse aty.

Për integrimin e veriut duhen të ndërmerren një sërë investimesh strategjike infrastrukturore për të përmbushur dy objektiva. Së pari, këto pjesë të Kosovës duhet të lidhen më mirë me rrugë me pjesën tjetër të vendit dhe jo si tani kur Mitrovica është shndërruar në nyjën gordiane sepse është ura e vetme e lidhjes me jugun. Së dyti, për t'i bërë serbët e veriut që të ndihen më rehat në Kosovë duhet që zona ku banojnë ata të shndërrohet nga një ishull i izoluar në një zonë transiti të rrugëve ndërkombëtare.

Për të përmbushur objektivin e parë është e nevojshme që komunat e veriut të lidhen me pjesën perëndimore të Kosovës nëpërmjet ndërtimit të një rruge të re në trajektoren Istog-Rakosh-Uçë-Cërkolez-Drenë-Zagul-Jabukë-Zubin Potok. Ndërsa, për ta lidhur me pjesën lindore nevojitet ndërtimi i rrugës automobilistike Podujevë-Pakashticë e Poshtme-Repë-Pollatë-Brecë-Murgullë-Borçan-Moshnicë-Soçanicë-Leposaviq. Duhet që edhe Trepça të lidhet më mirë me Podujevën, duke ndërtuar një rrugë automobilistike cilësore Podujevë-Dobratin-Kaçandoll-Bajgorë-Trepçë.

Përpos kësaj, integrimi i veriut kërkon rishqyrtimin e planeve aktuale. Është e vërtetë që autostrada Prishtinë-Merdar është më e leverdishme ama për arsye strategjike do të ishte më i nevojshëm ndërtimi i autostradës veriu-jug, që do të lidhte Hanin e Elezit me pikën kufitare të Jarinjës. Ndërkohë që Beogradi nuk rresht investimet për infrastrukturën e serbëve të Kosovës është e pafalshme që Qeveria e Kosovës i ka lënë enklavat shqiptare në veri në mëshirë të fatit. Ndërtimi i rrugëve Lisicë-Lipë-Boletin-Zhazhë-Vllahi-Zijaçë-Maxherë-Vidishiq si dhe Vidishiq-Bistricë e Shalës-Koshtovë-Cerajë-Kamenicë do të mundësonin nxjerrjen e shumë shqiptarëve të veriut nga getoizimi.

Rivënia në funksion dhe modernizimi i linjës hekurudhore veri-jug është një domosdoshmëri për reintegrimin e veriut. Qeveria e Prishtinës duhet të ushtrojë sa më shumë presion tek KFOR dhe EULEX që të vihet nën kontroll të plotë dhe rifunksionalizohet linja hekurudhore Hani i Elezit-Kaçanik-Gurëz-Ferizaj-Lipjan-Fushë Kosovë-Obiliq-Vushtrri-Mitrovicë-Zveçan-Leposaviq-Leshak. Prishtina zyrtare duhet të ketë kurajën që të bëjë presion ndaj të huajve duke qenë se treni transporton udhëtarët jo vetëm shpejt por edhe në mënyrë më të sigurt.

Objektivi i dytë synon riintegrimin dhe uljen e tensionit etnik duke e shndërruar veriun në arterie kryesore të transitit të trafikut automobilistik ndërkombëtar. Nëse ndërtohet autostrada Prishtinë-Jarinjë, qytetarët e Shqipërisë mund ta përdornin këtë drejtim si rrugën kryesore drejt Beogradit dhe Evropës Qendrore. Serbia qendrore e perëndimore do të lidhej më shpejt me Shkupin nëpërmjet kësaj autostrade sesa nëpërmjet Nishit. Në kuadër të këtij objektivi të dytë, Republika e Kosovës strategjikisht duhet të bëjë çmos të përfshihet në rrjetet ballkanike të transportit e të shndërrohet në një udhëkryq për vendet fqinje.

Për këtë arsye duhet nxitur Tirana për të realizuar dy projekte rajonale me vlerë për Kosovën. Së pari, është me shumë rëndësi për Kosovën që të nxitet Tirana dhe Shkupi që të realizojnë sa më shpejt ndërtimin e hekurudhës Lin-Strugë-Kërçovë në kuadër të Korridorit VIII. Studimet e fizibilitetit tregojnë se Shqipërisë i duhen 10 milionë euro për të ndërtuar 2.8 kilometrat e hekurudhës nga Lini deri në kufi, Maqedonisë i duhen rreth 200 milionë euro për 66 kilometrat prej kufirit e deri tek linja ekzistuese në Kërçovë.

Nëse kjo lidhje hekurudhore realizohet, Kosova ka për t'u lidhur edhe me hekurudhë me Shqipërinë dhe ka për t'u shndërruar në pikë transiti të komunikimit hekurudhor prej Durrësit drejt Serbisë e Evropës Qendrore. Së dyti, nëse ndërtohet me bashkëpunim me Shqipërinë dhe Malin e Zi, rruga Deçan-Plavë-Vermosh-Tamarë-Podgoricë atëherë një pjesë e mirë e Serbisë do të lidhej më shpejtë me Podgoricën duke kaluar nëpër Kosovë sesa duke kaluar nga krahina e Sanxhakut apo Zllatiborit.