Një nga segmentet që e karakterizon Prishtinën e parazgjedhjeve është edhe fushata e fidanëve. Fytyra nga më të ndryshmet nga subjekte nga më të ndryshmet kanë “lulëzuar” nëpër drunjtë e Prishtinës, duke premtuar një jetë më të mirë e më të qëndrueshme për të gjithë ne. Çfarë ironie?

Përderisa shumë njerëz gjithandej: politikanë, qytetarë, njerëz të biznesit, artistë e të tjerë premtojnë dhe promovojnë një jetë më të mirë e më të qëndrueshme përmes mbjelljes simbolike të një druri, një proces i njohur si fushata “Një qytetar, një dru”, të ne ndodh krejtësisht e kundërta. Tek ne edhe ata pak drunj që kanë mbetur në peizazhin “urban” prishtinas shfrytëzohen si arenë për një fytyrë politike që promovon jetën e re “e të mirë” të radhës në 4 vitet e ardhshme.

Prishtina, edhe ashtu e zymtë dhe e fragmentarizuar me copëza të vogla e shpesh edhe të padukshme gjelbërimi, ka marrë një pamje sa qesharake aq edhe tmerruese. Koka e fytyra të politikanëve që kanë mbështjellë trungjet e drunjve me degët e thara sipër tyre mund t’i interpretosh si ta dojë qejfi, por një e rëndësishme është që me sa pak e kuptojmë se si asnjëri nga ata nuk ka aspak konsideratë dhe respekt për mjedisin ku jeton. Ideja se sa më shumë ekspozohesh pavarësisht se ku dhe në çfarë forme është ajo që thekson thjeshtë e qartë nevojën e tyre për t’u qendërsuar në vëmendjen publike me imazhin e tyre pasi, jo shumë janë ata që me bagazhin dhe punët e tyre në të mirën publike na bëjnë t’i shpërblejmë me votën tonë pa u hamendur fare.

Dhe, po mendoja, imagjinojeni vetëm një moment nëse gjithë këta politikanë do ta rrokullisnin idenë e tyre të premtimeve nga rrafshi kozmetik në atë praktik, kur duke lënë nga vetëm 25 euro anash nga xhepi i tyre elektoral secili prej tyre do të mund të blinte dhe të mbillte një dru më shumë në qytet në vend se t’ia nxinte frymën një druri siç edhe kanë bërë gjithandej.

Nëse në shumë vende të botës kampanja “Një qytetar, Një dru” ndikoi në ndryshimin e peizazheve urbane dhe vetëdijes qytetare për rëndësinë e veprimeve në harmoni me natyrën, në Kosovë kjo kampanjë do ishte mirë të niste së pari me ata që synojnë ta adresojnë peizazhin e ri kosovar në mënyrë që ta kuptojnë dhe të hapen më pas edhe ndaj nismave, brengave dhe ideve qytetare për një mjedis dhe jetë më të mirë për të gjithë.

Kampanja kosovare në formatin “Një politikan, Një dru” do t’ju bënte nder të gjithë juve të nderuar politikanë, por edhe të gjithë neve në Prishtinë a kudo në Kosovë. Ju do ta kuptonit procesin natyral që për të dhënë frytin e mirë do të duhet së pari të keni rrënjë të forta dhe trung të shëndoshë e të ushqyer mirë ndër vite, ndërsa Kosova do të ushqehej e do të lulëzonte bashkë me ju në këtë proces ndërgjegjësimi dhe përparimi fizik e shoqëror. Dhe, dikur, kur fytyrat tuaja më nuk premtojnë, nëse për asgjë tjetër do të mund ta kishit drurin tuaj të rritur mjaftueshëm nën hijen e të cilit do të mund të pushonit e të freskoheshit në qetësi, pa frikë, pa turp, duke frymuar lirshëm dhe në harmoni me të gjithë.

(Autorja është kolumniste e rregullt e gazetës “Zëri”)