Muharrem Nitaj

Akrepi, i cili ndodhej në një kep që mbulohej nga uji, i kërkonte bretkosës ta shpëtonte dhe ta kalonte në breg, por kjo e fundit nuk bindej, sepse i frikësohej kafshimit të tij. Pas premtimeve, që ngjanin elektorale të akrepit, bretkosa i bëhet urë atij që e kafshon më pas, duke e ditur se do të përmbyteshin që të dy. Akrepi e kishte në gjak kafshimin edhe atëherë kur ai mund të ishte i kobshëm për të.

Do të ishte krejt logjike që një filozofi e tillë të ishte edhe në gjakun e opozitës, edhe të shoqërisë civile, edhe të elitave intelektuale... të cilët duke mos i mbajtur anë të fortit, do ta kafshonin qeverinë sa herë që do t’u jepej mundësia. Por, në rastin e Kosovës, vazhdimisht ka ndodhur e kundërta. Opozita dhe shoqëria civile dhe elitat intelektuale, jo vetëm se nuk ka ndodhur ta kafshojnë qeverinë, por i kanë dhënë jetë asaj, i kanë dhënë fuqi e garanci se ajo do të mbetej në pushtet, pavarësisht performancës së saj, bile deri në 2013-ën.

Në javët dhe në muajt e fundit, nuk ka pasur një ditë të vetme që opozita dhe shoqëria civile nuk e kanë akuzuar qeverinë për keqqeverisje, për hajni, për diktaturë, e deri për tradhti. Por, asnjëherë nuk kanë shkuar përtej sulmeve verbale e të kenë bërë qoftë edhe një përpjekje të vetme të përbashkët për t'i dhënë fund kësaj keqqeverisje. Lideri i partisë më të madhe opozitare, në këtë fundjavë, deklaronte se opozita do të mund ta rrëzonte qeverinë që nesër, sikur ajo të ishte unike.

Por, ai nuk shpjegonte arsyet reale pse opozita nuk ishte e bashkuar, e aq më pak nëse rrëzimi i qeverisë, të cilësuar nga opozita si qeveri e keqe për vendin, ishte qëllim i opozitës. Megjithëse partitë opozitare nuk e kanë fshehur asnjëherë se ato po provojnë që të krijojnë infrastrukturën ligjore në mënyrë që të mos mund të vidhet në zgjedhjet e ardhshme, kjo nuk do të duhej t’u krijonte atyre komoditetin që të bashkëjetonin me një qeveri kaq të dëmshme për vendin, e aq më pak t’i amnistonte ata nga përgjegjësia politike për këtë qeverisje.

Qeveria aktuale mund të përmbysej me zgjedhje të reja, të cilat opozita nuk i do, sepse nuk është e sigurt se do t'i fitojë, me një koalicion të ri për të cilin opozita nuk i ka numrat ose edhe po t'i sigurojë nuk mund të merren vesh për ndarjen e pushtetit, sepse secila parti është lidhur për postin e kryeministrit dhe së fundi për “interesin e proklamuar për shtetin”. Duket që ky i fundit është më i parëndësishmi, sepse asnjë nga partitë opozitare nuk duken të vendosura për ta përmbysur qeverinë për këtë interes, por vetëm me kusht që kjo përmbysje të nënkuptonte ngjitjen e tyre në pushtet. Ata po presin ditë më të mira për vete.

Një koleg imi, në një analizë të tij, shkruante se opozita po e ndihmonte kryeministrin të shndërrohej në diktator. Kjo, me gjasë, sepse lufta e saj ndaj qeverisë nuk bëhej për interesa shteti, por pushtetit dhe prandaj unifikimi i saj është “mission impossibile”. Është e mundur që kryeministri ta ketë kuptuar se opozita nuk e ka me gjithë mend, prandaj edhe është kaq shpërfillës ndaj saj. Pas zgjedhjeve të fundit, ku opozita kishte vërejtje serioze për manipulimin dhe vjedhjen e votës, që e kishte cilësuar vjedhje industriale, çuditërisht askush nga ata që e kishin fituar mandatin e deputetit në këto zgjedhje, nuk ishte për përsëritjen e tyre.

Këtë e kishin kërkuar vetëm ata që kishin humbur por që ishin të pafuqi edhe brenda partive të veta. Bile, ka pasur përplasje të mëdha brenda partive, pse disa syresh i kishin refuzuar ofertat për të qenë pjesë e koalicionit qeverisës, dhe jo pak prej tyre edhe sot janë opozitë ose kolonë e pestë e partive të veta.

Është në gjakun e opozitës dhe të elitës intelektuale që ta “kafshojnë” qeverinë sa herë që munden, por ka javë dhe muaj që kjo nuk po ndodh dhe gjithçka është shndërruar në "fiction". Tashmë secili po e sheh oborrin e vet dhe po e pret gjahun t’i vjen në shteg, bash “si hutit në zgurë”. Njerëzit po thonë se vendi është me qeverisje dhe me opozitë të keqe, prandaj edhe s’ka çka i thotë Dema-Kadrisë... sepse që të dy po pyesin për pushtetin: “A po doket me babën”?