Agim Vuniqi

Prishtina është një qytet i madh, me shumë banorë, është ftohtë e shpesh është errët. Era fishkëllon e di të përplaset në ndonjë gem të zhveshur dhe thuase të pret kur të rrahë në lëkurë cullak. Qielli është i errët e memec dhe bora t'i mbyll sytë dhe të bie fytyrës, mund të rrëshqasësh rrugicave apo të shtyhesh me ndonjë automjet se kush kujt do t’ia lëshojë rrugën, ke shans edhe të rrëzohesh, e pastaj ...priti analizat, reklama shkëlqyese, nuk di nga të orientohesh, në spitale publike apo në ato private, as vetë nuk ke për të kuptuar se ç’të ka gjeteur, sigurisht nëse e ke portfolion e thellë -ke dikë jashtë nuk do të shpëtosh lehtë pa ndonjë stendë, është rregull e pashkruar e shëndetësisë kosovare.

Qyteti ka një treg të gjerë, i cili mbledh një mori njerëzish (gjatë zgjedhjeve këta janë votues) dhe bëhet zhurmë e madhe, aty është vendi ku tregtarët të presin me sharje të llojllojshme, kuptohet nëse prish renditjen e pemëve dhe perimeve, bëhet aq shumë zhurmë sa që munden edhe veshtë të të shurdhohen. Në anën tjetër kupton se ne jemi njerëz të vyeshëm e të urtë me kulturë të lashtë, jemi besnikë dhe degjojmë të huajt-miqtë me shumë gëzim, normalisht edhe tingullin e eurove.

Këtu qeverisin politikanët me vetura të shtrenjta, edhe ata bëjnë shumë zhurmë, prijnë bile alarmet e policëve që bëjnë “eskortë”, sinjalizojnë realitetin kush qeveris këtë vend të çuditshëm, kur ishte sistemi monist "i diktaturës" “no-hit” ndodhitë ishin të rralla, ndërsa tash në kohën e partive shumëmoniste, të ekonomisë së tregut e të demokracisë "sus" e çile gojën janë shpeshtuar, përfundimisht zhurma na ka hije, është “shik”-trend me lashtësinë dhe civilizimin tonë të hershëm, që aq shumë e kemi eksploruar.

II

Ngjarje shumë e rëndësishme në Kosovë është edhe kur tymoset duhani me kamish, më herët ishte edhe “shik“, ngase kamishi qehlibar importohej "incognito" nga Rusia, dhe të gjithë ata dahanxhinj që bënin llafe burrash dhe bënin qefe tymi “tullug” nuk brengoseshin për ambientin, ishin krenarë në atë log burrash, qehlibari i verdhë i mbante kryelartë.

Ashtu si kamishi mjet për të tymosur duhanin, duke u bërë dëm edhe të tjerëve, e...edhe pse me ligj është e lejuar që në gjysmën e lokalit mund të bësh qejf, edhe me nargjile nëse dëshiron, varet si janë të shpërndara take-tuket, njëjtë bëhet edhe interpretimi i ligjit, e... po mirë hapësirën nuk mund ta ndash në dysh, aq është i logjikshëm ligji...njëjtë si Kamishi “shik” i “SHIK-ut“, i cili u bë maraz se akuzave të tij nuk po ua vënë veshin votuesit, herën e parë si deputet i paguar dhe me nam shfrytëzoi foltoren e Kuvendit të Kosovës për të shpjeguar ç'është transparenca, herën e dytë u paraqit si "zëdhënës" qeverie apo i grupit parlamentar të PDK-së, është vështirë për me dallue.., ai i bëri publike informatat sekrete “të ineresit national” se dikush nga informatorët e “SHIK-ut” paska përgjuar nën batanien e Albin Kurtit (nuk dha shpjegime shtesë se ai ishte i veshur apo ndryshe, që është fakt shumë i rëndësishëm për politikën e shtetit) bile ishte angazhuar "kombëtarisht" të futej nën fustanellën e një vajze ministri të Millosheviqit, duke ia futur kot, pa përmendur ndonjë emër të përveçëm..., me rëndesi që ai u bë yll medial, akoma nuk është qartësuar deri në fund se cili nga tabori i informatorëve të tij iu ka “marrë erë” të brendshmeve të gocës së ministrit, nuk do të ishte çudi nëse ai një ditë do të parafrazojë edhe parfumin, le këtë, por po rritet rreziku nëse ky angazhim i deputetit shndërrohet në ligj, qytetarët do t’i kthejë në kohën e hamameve publike, më mirë me u la cullak publikisht, bile-bile është në koherencë me presionet ndërkombëtare të ruajtjes së trashëgimisë kulturore dhe, për më shumë trasparencë, nuk bëhesh gazi i dynjasë, se po qe se merr guxim me u la privatisht në banjo personale mund t’i manipulojnë rezultatet e regjistrimit...

III

Dua të them edhe një gjë që s’e kam thënë më parë, se çfarë burrash jemi. Guximi ynë s'ka shoq në botë. Ata që kanë të drejtë shëtitjeje do të kenë parë shume vende…, me viza shengen, premtim i kohpaskohshëm i qeveritarëve të vendit, jam i sigurt se hundë-lesha më të medhenj se në Kosovë nuk kanë parë. Njëri duke dashur me shpjegue denjësisht këtë dukuri më tha se kishte parë një njeri me njëfarë kapele si hartë, republikë e vizllueshme, dhe me rroba të larme që i kishte “hipur” një njeriu tjetër, veshur me rroba edhe më të pasura thjesht qytetare, kur ishin ndalur para kafenesë ai me republikë të vizllueshme i zdrypi.

Kafexhiu kishte dalë përjashta për t’i nderuar duke u përulur deri në tokë, e ai njeriu me rroba të larme e me republikë të vizllueshme hyri në kafene dhe u ul pranë tavolinës, e cila ishte stolisur në një mënyrë të veçantë, gati njëjtë si në rastin e përgatitjes së planit qeveritar në Bullgari, apo edhe këtë të fundit ngjasues si veza-vezës të gatitjes së rezolutës dalëse nga EULEX-i, që u votua në Kuvendin e Kosovës, duke u kundërshuar bindshëm nga Lëvizja Vetëvendosje.

Ai me rroba qytetare kishte mbetur para kafenesë duke pritur. Kafexhiu e kishte nderuar edhe atë duke u përulur thellë. Ç'do të thotë kjo, kafexhiu kishte shpjeguar ky që hyri është politikan i madh, e ai tjetri është qytetar i përmendur, është atdhetar, kishte pëshperitur kafexhiu. Po pse i lejon me hipë? Kafexhiu ishte mënjanuar me një anë, kishte qeshur me përbuzje dhe kishte thënë: - Kjo te ne çmohet si nderim i madh, i cili rrallëkujt i bie hise! Ky është një shërbim për atdheun, të cilin nuk di as nuk mundet ta çmojë çdo popull!