Erosit të munguar në stadiumin e Prishtinës, në njërën anë, dhe erosit tonë permanent kulturor, në anën tjetër, u doli përballë me modestinë dhe veçantinë e tyre grupi “Morcheeba”. Në qytetin ku hip-hopi është bërë mënyrë jetese, veshjeje dhe shprehjeje për shumëkënd, trip-hopi i Morcheebas solli një udhëtim të lirë dhe çlirues urban jo nëpërmes “zhargonit urban” me të cilën shprehet hip-hopi ndonjëherë deri në banalitet dhe pa shije, por përmes një gjuhe urbane universale si gërshetim i lirë dhe harmonik i rrymave të shumta muzikore dhe artistike, rrugëtim në të cilin etnitete dhe kultura të ndryshme do ta gjenin pjesën e tyre përbrenda këtij mozaiku.

Edhe urbancat prishtinas u lëshuan në “surf”-in e Morcheebas, që të paktën për 2 orë të pushojnë dhe të rrugëtojnë me shijen e tyre të preferuar, larg vulgaritetit, xixave, cd-playerve dhe performansave false e sipërfaqësore.

“Summer URban Festival” apo SURF-i URBAN solli para nesh frymën e munguar prishtinase tash sa kohë, duke dëshmuar me IPKO-n përkrah se në Prishtinë ende ka hapësirë dhe nevojë për mënyra të tjera shprehjeje. Dëshmuan se aty ku është cilësia, edhe muzikore e edhe organizative, nuk ka nevojë për marketing të tipit imponues, i cili shpesh po kalon në irritues. Dëshmuan se pa pompozitet dhe pa shumë zhurmë por me dashuri dhe dëshirë për të bërë diçka të mirë, qyteti ynë mund ta mirëpret denjësisht dikë si “ Morcheeba” duke i dhuruar njëkohësisht qytetarëve të vet një surf-ing freskues në këto ditët e nxehta verore.

Në anën tjetër, duke qenë se trip-hopi kishte qenë një kundërpërgjigje e anglezëve për boom-in e hip hopit amerikan të viteve të ’90-ta , si një mendësi tjetër nga një kontekst tjetër ku hip-hopi nuk kishte bazë për t’u zhvilluar shumë, pikërisht si rezultat i saj apo i një kulture urbane tjetër por duke ndjekur trendët muzikorë të radhës, erdhi në shprehje trip-hopi. Le të shpresojmë se edhe në Prishtinë mund të ketë lëvizje të tilla, jo për ta mohuar apo zhvlerësuar hip-hopin por për t’i dhënë përgjigje të reja për rrugëtime të reja muzikore që mund ta orientojnë mendësinë e rinisë prishtinase kah një mënyrë më urbane shprehëse, interpretimi dhe identifikimi në të ardhmen.

Dhe, duke e ditur se “Roma nuk u ndërtua brenda një dite”, si e thotë edhe vetë Morcheeba në një nga këngët që i identifikon ata, duhet ta kuptojmë edhe ne se rrugëtimet e bukura, të sigurta, të paharruara dhe që lënë gjurmën e tyre asnjëherë nuk mund të bëhen brenda një dite.

Për një surf-ing të lirë dhe në harmoni me veten e edhe me të tjerët, duhet ta kuptojmë se prapa asaj që duket bukur apo që duket e lehtë për t’u bërë gjithnjë qëndron puna, mundi, ushtrimi, kondicioni, kultura, përmbajtja, vlera, përkushtimi dhe dashuria. Prandaj, për një kulturë të qëndrueshme urbane prishtinase, pamja e jashtme dhe cd-playerat nuk mjaftojnë për një surf-ing të denjë dhe të qëndrueshëm në valët kulturore globale.

Është koha të fillojmë ta kuptojmë se kush është reprezentacioni i vërtetë i surf-it URBAN prishtinas…

(Autorja është kolumniste e rregullt e gazetës “Zëri”)