Në të vërtetë, një pyetje e tillë e ngritur që në hyrje të këtij opinioni, bëhet në ambiente të ndryshme: në familje, në shoqëri, në ambiente intelektuale, të biznesit, etj. E ngritur dhe e formuluar për shkak të gjendjes së rëndë në të cilën gjendet qytetari dhe vetë shteti i Kosovës.

Kjo qeveri erdhi me shumë premtime. Për qeverisje të mirë, për ulje të papunësisë dhe zhvillim ekonomik, për energji 24 orë, për ulje të shpenzimeve publike dhe luftimin e korrupsionit, për njohje të reja dhe shumë e shumë të tjera, që do të merrnin shumë kohë për t’i përmendur në këtë shkrim.

Por, çfarë bëri në të vërtetë kjo qeveri?

Bëri shumëçka, por vetëm ato që kishte premtuar nuk i bëri. Qeverisje më të keqe nuk kemi pasur. Rritje marramendëse të papunësisë dhe varfërisë, rritje të shpenzimeve qeveritare, ngritje të korrupsionit në sistem, vjedhje dhe zhvatje gjithandej, mosshtrirje të sovranitet në gjithë territorin e vendit. As pas dy e më shumë viteve të premtuara që në 100-ditëshin e parë të shpalljes së pavarësisë për njohje nga 100 vende, nuk u arrit kjo, etj. Por, këtu, në vendin tonë, me sa duket askurrgjë nuk bën më përshtypje.

Sipas të dhënave të Ministrisë së Punës dhe Mirëqenies Sociale, 45% e popullsisë së Kosovës jeton në varfëri me vetëm 1.42 euro në ditë, ndërsa 15-18% prej tyre jeton në varfëri të skajshme me 0.93 euro në ditë. Deri në muajin korrik të këtij viti, janë 35.675 familje me 157.257 anëtarë të familjeve në Kosovë që shfrytëzojnë ndihmën sociale. Shuma mujore e ndihmës sociale, për një familje, sillet prej 45-80 euro, varësisht nga numri i anëtarëve të familjes.

Safet Gërxhaliu, kryetar i Odës Ekonomike të Kosovës (OEK), ka thënë se, po të analizohet kjo situatë në Kosovë, ku shumica e familjeve është në gjendje të rëndë ekonomike, është mjerimi më i madh që mund t’i ndodhë një shteti. (shih www.zeri.info, data 16.08.2010).

Në çdo vend normal demokratik kjo do të ishte jo shqetësuese, por alarmante. Kriza e rëndë ekonomike ndodhet pikërisht në keqqeverisjen e shtetit dhe qeveria nuk mund të fshehë më varfërinë e skajshme ku na ka shtyrë me papërgjegjshmërinë e saj. Nëse qeveria nuk do të veprojë sot, nesër do të jetë tepër vonë. Një gjë është e qartë, sa më vonë të veprohet, aq më shumë rëndohet jeta e përditshme e qytetarëve, aq më shumë do të detyrohen ata të shtrëngojnë rripin e mbijetesës njerëzore. Por, jo vonë, qeveria do të kuptojë se edhe ritmi i mbijetesës së saj politike është shkëputur. Prandaj, qytetarët nuk e meritojnë këtë qeverisje dhe nuk kanë pse të paguajnë çmimin e kësaj qeverisjeje.

Gjatë vitit 2009, investimet e huaja kanë shënuar rënie për rreth 30%, të ardhurat nga diaspora kanë shënuar rënie afër 12%. Eksportet janë zvogëluar në masë të madhe krahasuar me një vit më parë. Në bazë të të dhënave të Bankës Botërore, vetëm 19 vende qëndrojnë më poshtë se Kosova, si vende atraktive për investime.

Kjo qeveri nuk ka vizion për asgjë. Nuk ka programe të mirëfillta zhvillimore. Nuk ka ndërtuar politika fiskale, që do të krijonte ambient atraktiv për investime të jashtme. Si rrjedhim, gjendja sociale vjen duke u rënduar dhe zhvillimi ekonomik do të jetë i papërfillshëm. Nuk mund të ketë investime të huaja, kur mungon energjia elektrike, kur nuk funksionojnë gjykatat, ku të mbytë burokracia, lulëzon korrupsioni dhe krimi i organizuar. Dhe, qeveria vazhdon të mos veprojë. A ka ekuilibër mendor dhe të veprimit kjo qeveri? Shumë dyshoj që nuk ka. Ne, pra, lipset të jemi krenarë për këtë qeveri të dehur nga vetvetja, që nëpërmjet bombardimit intensiv me propagandë, me spote, me fjalime, me reklama, d.m.th. me vetëmburrje, nuk na lejon të ndjejmë jo vetëm krizën ekonomike, po me sa duket as krizën e thellë morale, ku është futur shoqëria jonë.

Asnjë institucion kushtetues nuk është i pavarur, të gjitha i komandon qeveria (nënkupto Thaçi). Nuk ka siguri jete. Nuk ka vend ku të ankohesh se po vrasin, vjedhin, përdhunojnë, të pushojnë nga puna, të dhunojnë psikologjikisht gjithandej. Me mijëra studentë mbarojnë universitetin e nuk kanë asnjë siguri për punë. Investimet publike nuk llogariten të hapin vende pune atje ku nuk ka, por atje ku luhet TENDERI. Këta vranë ëndrrat e fëmijëve dhe të ardhmen e të rinjve.

Kjo qeveri është vërtetë e inkriminuar, është e ndotur nga një sëmundje e emërtuar si KORRUPSIONI, e cila nuk ka vaksinë për shërim. Dhe, është e qartë se sa më shumë mbushen dhe fryhen xhepat e pushtetarëve, aq herë varfërohen ato të qytetarëve.

Dhe, kjo është ajo që e shqetëson qytetarin. Ajo që i intereson shumicës së qytetarëve është papunësia dhe varfëria që buron nga kjo. Por, më duket se plani i qeveritarëve të sotëm është më djallëzor se thjesht mosdhënia llogari për mënyrën e përdorimit të parave tona. Kam frikë se përdorin teorinë e “tokës se djegur”, duke qenë të sigurt se janë në ikje e sipër. Pra, qeveria e ardhshme do gjejë një ekonomi te shkatërruar, shitje të ndërmarrjeve publike me çmime qesharake, një buxhet të mbytur në borxhe dhe një administratë publike të shtuar tej mase në numër për arsye partiake (elektorale).

Qytetari ynë është shumë i lodhur dhe meriton një qeverisje që përfundimisht do të qeverisë ashtu siç ka ëndërruar ai. Qytetarët dëshirojnë të jenë të qetë shpirtërisht, të kenë portofolin me para për të mbajtur familjen, të hapen vende pune. Kjo qeveri mburret për ato pak punë që ka bërë. Por, a e dinë ata që populli është i paushqyer. A kanë menduar se si të punësojnë qytetarë që nuk kanë mundësi për të mbijetuar? A u shkon mendja të kontrollojnë çmimet e shportës familjare?

Por, a meritojnë qytetarët një qeverisje të tillë, që të trajtohen si një turmë njerëzish të uritur, që s’mendojnë veç t’i mbijetojnë të sotmes, duke gëlltitur gjithë makth e jargë, veçse shifra e shifra të pakuptueshme?

A e meritojnë ata, që i kënduan dhe u gjakosën si rrallë të tjerë për liri edhe kur ishin shumë më tepër të skamur se sot, t’u krekosesh për disa para më shumë, që nuk është veçse një pikë uji para djersës dhe gjakut të tyre gjatë këtyre viteve?

Qytetarët duan transparencë dhe të dinë nga kjo qeveri se si ka mundësi që për një periudhë kaq të shkurtër rreth trevjeçare ka mundur të prodhohet një aktivitet kaq i dëmshëm për ardhmërinë tonë dhe për demokracinë në vend.

Varfëria dhe skamja që ka pllakosur qytetarët nuk ka mundur të zbehë logjikën e tyre, në të kundërt të asaj çka përpiqet kjo qeveri. Ata duan të jetojnë më mirë se dje, pa dyshim. Qytetarët po varfërohen dita-ditës. Por trurin dhe memorien e kanë akoma në vend.

Ndryshe nga ç’mendon qeveria e sotme, ata e meritojnë mirëqenien. Ndaj meritojnë të dinë bilancin e saj në këto tre vite, i cili nuk mund të rrumbullakoset dhe fshihet pas formulave që vetëm ata i kuptojnë. Sepse, mbi të gjitha, këta njerëz të mirë nuk meritojnë më të tallen.

Të gjithë jemi përgjegjës!

Hesht dhe vuaj, apo...?!