Nja dy fjalë autorit Shkëlzen Gashit për librin biografik – të paautorizuar: “Adem Demaçi”. Natyrisht që e bleva aq sa kushtonte (7 euro). E shfletova dhe lexova pjesë të tij. Ishte libër bukur i dizajnuar, bukur i kornizuar, bukur i konceptuar, një libër për merak… Mirëpo, atë vepër që e keni kornizuar ju, nuk është vepra juaj. Ishte vepra e Adem Demaçit me bashkëveprimtarë dhe me bashkëfamiljarë të Adem Demaçit. Pra, i bie, si pa leje të babës me e shitë tokën e babës (disa pjesë të tokës së babës) që do ta trashëgoje me siguri,…, gjersa baba është ende gjallë. Sikur ta lidhësh babën me litar, e të shkosh t’ia shesësh tokën!

Kjo i bie sikur ta ekspozoni në ekspozitë një pikturë shumë të rrallë – vepër të dikujt tjetër – me kornizën e skalitur shumë të bukur tuajën dhe ju të kërkoni vlerësim dhe çmim për kornizën tuaj, duke ia lavdëruar e shfaqur auditorit veprën e piktorit të jashtëzakonshëm.

Ju nuk mundët ta zotëronit tundimin tuaj për botimin e librit, andaj e botuat (botuat disa pjesë) pa lejen e atij që e bëri veprën. Pra, vetë Adem Demaçi (75-vjeç) mund ta zotëronte tundimin e mosbotimit të biografisë së tij, ndërkaq ju (Shkëlzen Gashi) si, 29- vjeç, nuk mundët ta zotëronit atë tundim!

Për më tepër, të gjitha të drejtat e ribotimit të librit dhe materialeve brenda tij (nuk shënohet tirazhi) ia lini autorit të librit (vetes) dhe redaksisë “Rrokullia”, edhe pse nuk e keni të drejtën e plotë ligjore (sepse e keni thyer marrëveshjen ) për vetë botimin e librit. Aty ka materiale familjare si dhe të librave të tjerë, disa prej të cilëve autorë, ndoshta (mund ta kem gabim), as që i keni pyetur kur ua keni reprodukuar fotografitë. Dhe plus, e botoni librin edhe në versionin e përkthyer në anglisht dhe po ashtu doni të fitoni lekë…

Kësaj i thonë gjysmëvjedhje, zotni Shkëlzen, dhe ju rrokullisës. Nuk di ku e keni marrë atë guxim që ta bëni këtë rebelim, por besoj dhe shpresoj se jeni penduar sadopak apo edhe do të pendoheni në të ardhmen e afërt.

Aktualisht nuk ka shtet, në kuptimin zbatues të tij, kështu që si rrëmbyesi e po ashtu edhe shpëtimtari nuk sanksionohen.

Piktura që ekspozove ishte e bukur, por e jotja ishte vetëm montazhi-korniza, gatesa… brumi i takon arës që e (keq)përdore, autorit të vërtetë, andaj duhet ta kthesh, të kërkosh falje dhe ta riparosh dëmin e shkaktuar. Mbase, ashtu do të gjesh qetësi. Në të kundërtën, do të më dhimbsesh, sepse do të kesh brejtje të ndërgjegjes (që besoj se ende e ke), që është më e keqe se çdo dënim.

… Thuhet, më lehtë është të bëhesh mbret…