Qemajl Morina

Në fund të muajit qershor në kryeqendrën e Kazakistanit, në Astana, u mbajt sesioni i 38-të i Konferencës për Bashkëpunim Islamik në nivel të ministrave të punëve të jashtme, ku në mesin e 115 vendimeve ishte edhe rezoluta për njohjen e Kosovës nga vendet anëtare të organizatës më të madhe ndërqeveritare në botë pas OKB-së. Në rezolutën për Kosovën përveç tjerash thuhet: “Ftojmë të gjitha vendet anëtare të marrin parasysh njohjen pavarësisë së Kosovës, bazuar në të drejtat e tyre të lira dhe sovrane, si dhe në përputhje me praktikat e tyre kombëtare”.

Sipas shkrimit të së përditshmes beogradase “Veçernje novosti” të datës 15.07.2011, nën titullin: ”Prishtina lobon për 50 njohje”, thuhet se përpjekjet e Kosovës për njohje nga ana e vendeve të Konferencës Islamike ka pasur edhe më herët, nëpërmes njërit prej anëtarëve më me ndikim, të Arabisë Saudite për ta “shtyrë” rezolutën për njohjen e saj.

Përpjekja diplomatike e fundit ndodhi në fund të qershorit të kaluar në Kazakistan, në takimin ndërministror të OKI-it. Serbia pati sukses që nëpërmes shteteve me ndikim, si Azerbajxhanit, Algjerisë, Indonezisë të pengojë njohjen.

Kjo u bë duke iu falënderuar amendamenteve të shteteve në fjalë, ku në vend të tekstit të propozuar të rezolutës, ku thuhej: “Ftohen të gjitha shtetet myslimane të njohin pavarësinë e Kosovës”, u inkorporua fjalia: “Secili vend të vendosë në pajtim me interesat dhe qëndrimet e tij”.

Gazeta duke bërë një rezyme të njohjeve të deritanishme të Kosovës, shkruan: “Kosova është njohur nga 76 vende nga 192 sa është numri i shteteve anëtare të OKB-së. Numri më i madh i njohjeve ishte menjëherë pas shpalljes së pavarësisë – 53, gjatë vitit 2009 pati 11 njohje, gjatë vitit të kaluar me gjithë shpalljen e vendimit të GJND-së pati gjithsej 8 njohje, kurse gjatë vitit 2011 deri më sot ka 4 njohje”.

Gazeta informon se menjëherë pas përfundimit të konferencës “nga Beogradi janë “dërguar” emisarët në vendet më me ndikim të botës islame”.

Nga Konferenca për Bashkëpunim Islamik, e cila ngërthen në vete 57 shtete nga të katër kontinentet e botës, deri më tani pavarësinë e Kosovës e kanë njohur 19 shtete. Gjë që është një numër shumë i vogël në krahasim me atë që është pritur nga ky organizim shtetesh, në veçanti kur dihet se shumica e këtyre vendeve kanë pasur një histori të ngjashme me atë të Kosovës si dhe na bashkojnë shumë vlera të përbashkëta.

Kjo rezolutë, është një obligim moral për këto shtete, që ato ta njohin pavarësinë dhe sovranitetin e Republikës së Kosovës, në veçanti pas publikimit të vendimit të GJND-së në korrikun e vitit të kaluar.

Është realitet se bota islame po ballafaqohet me probleme dhe sfida të shumta. Kjo u pa edhe nga temat e shumta që ishin objekt shqyrtimi gjatë tri ditëve sa zgjati edhe sesioni i 38-të i Konferencës për Bashkëpunim Islamik në nivel të ministrave të punëve të jashtme.

Vlen të përmendim se në konferencë u aprovua edhe Deklarata e Astanës për ngjarjet e fundit që po zhvillohen në Lindjen e Mesme dhe Afrikën Veriore, ku iu bë apel qeverive të atyre vendeve të gjejnë kompromise në të mirë të popujve dhe vendeve të tyre.

Temë tjetër me rëndësi ishte edhe mobilizimi i të gjitha vendeve të Konferencës për Bashkëpunim Islamik për njohjen e shtetit palestinez në sesionin e ardhshëm të Asamblesë së Përgjithshme të OKB-së që duhet të mbahet në muajin shtator.

Në këtë aspekt diplomacia kosovare duhet të mobilizohet që të gjitha vendeve anëtare, të cilat ende nuk e kanë njohur Kosovën t’u dërgohen shkresa zyrtare që ta bëjnë atë, duke u thirrur në Rezolutën e Astanës dhe obligimin që qeveritë e atyre vendeve kanë marrë. Por, në të njëjtën kohë të dërgohen edhe delegacione për të kontaktuar direkt me qeveritë e atyre vendeve, për sensibilizimin e opinionit të atyre vendeve.

Me këtë rast vlen të theksohet se sesioni i 38-të i Konferencës për Bashkëpunim Islamik, në nivel të ministrave të punëve të jashtme, bëri disa ndryshime në aspektin organizativ, të cilat sekretari i përgjithshëm, Ekmeludin Ihsan Oglu, në një intervistë për televizionin rus “Rusia sot” tha se “Konferenca Islamike po hyn në fazën e reformimit, katër dekada pas themelimit të saj”.

Kështu tash e tutje Organizata e Konferencës Islamike (OKI) do të quhet Konferenca për Bashkëpunim Islamik (KBI), “Organizaton of Islamic Cooperation” (OIC). Konferenca po ashtu e ndryshoi edhe logon, të cilën e kishte prej themelimit të saj, duke iu përshtatur zhvillimeve të shumta që kishin ndodhur gjatë periudhës së kaluar. Tash e tutje në kuadër të Konferencës do të funksionojë edhe grupi për liritë dhe të drejtat e njeriu si organ i pavarur, i cili do të merret me monitorimin e lirive dhe të drejtave individuale dhe kolektive në kuadër të shteteve anëtare.

Po ashtu u propozua se takimet e nivelit më të lartë, të cilat mbaheshin në çdo tri vjet, tash e tutje do të mbahen për çdo dy vjet, që nënkupton rritjen e përgjegjësisë që po ndiejnë liderët e këtyre vendeve për sfidat me të cilat po ballafaqohen vendet e tyre.

(Autori është kolumnist i rregullt i gazetës “Zëri”)