S’di a e keni vërejtur skemën programore të mesjavës në RTK, por ja një përkujtim se çfarë ka pasur të mërkurën: 20:10 Program muzikor, 21 Zëri ynë, 21:30 Program muzikor, 21:50 Pro et Contra; 22:25 Gruaja sot. E të mos kthehemi tek e marta që as vetë redaksia e RTK-së nuk do t’i binte në fije se çfarë kanë transmetuar. Krejt kjo është pasojë e pushimit të Ligës së Kampionëve, pa të cilën RTK ka një mesjavë të vdekur për nga cilësia e programeve, dhe duket se është dorëzuar karshi serialeve turke në kanalet komerciale.

Goditje e madhe për ta ka qenë humbja e ndeshjeve të Premier Ligës angleze në futboll. Nëse marrim parasysh buxhetin e shpenzuar në “prodhime vendore” që po kërkon qeveria, kinse për të mirën e shikuesit dhe të hollat për Premier Ligën, atëherë s’dyshoj që më shumë kanë kushtuar serialet dramatike pa kurrfarë drame dhe një kamion debate sesa ndeshjet e ligës më të mirë në botë në futboll. Politikë e gabuar e RTK-së?

Ndoshta, por s’duhet t’ua zëmë për të madhe pasi më shumë janë të interesuar për miratimin e ligjit që do të uzurponte pronat e RTP-së pa marrë kurrfarë përgjegjësie ndaj kuadrove që kanë protestuar më shumë se gjysmën e viteve të lirisë për “mëshirë” qoftë nga RTK qoftë nga qeveria jonë që “nuk përzihet në çështjet e brendshme të televizionit publik”! S’jam kundër programeve që po transmetohen në mesjavë në RTK, por jam kundër orarit, ku transmetohen pasi programi i mbrëmjes nuk është vendi i tyre.

Derisa RTK po “vdes” nga mungesa e futbollit, KTV nuk po mund të hapë sytë nga futbolli. Dorën në zemër liga spanjolle ofron 2 ndeshje derbi në vit, dhe nga dy ndeshje në javë, Barcelona dhe Reali. Të vendosësh për shembull ndeshje të Betis, Mallorca, apo diçka të ngjashme në prime-time gjatë fundjavës është mëkat për shikuesit. E gjithashtu edhe gjithë kosovarët nuk janë të identifikuar me Realin ose Barcelona. Ide e mirë do të ishte zhvendosja e disa ndeshjeve në kabllor tek Arta, dhe të sillnin ndonjë program origjinal, jo përsëritje të filmave.

Së fundi është bërë zakon adaptimi i formateve mjaft të suksesshme ndërkombëtare nga televizionet shqiptare. I fundit në këtë vazhdë është X Factor Albania. Versioni origjinal britanik pa dyshim që është njëra ndër gjërat më të mira për momentin në televizion. Por, versioni shqiptar, së paku episodi i parë thjesht nuk meriton as të quhet ashtu. Episodi i parë që u transmetua të dielën në Klan dhe Klan Kosova ishte shkalla më e ulët e produksionit televiziv.

Për dy orë rresht duartrokitjet nuk janë ndalur, as gjatë promove për qytetet e audioneve e as gjatë vlerësimit të jurisë. Ka pasur aq shumë gumëzhinë sa që akoma më duket se dëgjoj tinguj të çuditshëm, edhe pse ka kaluar tashmë një javë. Një problem tjetër ishte edhe montazhi që nuk linte një skenë më shumë se 5 sekonda, që thjesht të prishte nervat. Ndërkaq, juria ka pasur një nivel aq të ulët sa që gjithçka që këndonin konkurrentët shkëlqente. I vetmi që vlerësonte në nivel herë-herë ishte Pandi Laço. Shyqyr që kreatori i këtij formati, Simon Cowell nuk e ka parë këtë episod.

Ndërsa, përgatitja teknike e formatit konkurrent The Voice, është në një nivel të lartë, modern. Por, gabimi që po bën Top Channel është ekspozimi i tepërt i këtij formati. 4 orë në javë është shumë tepër. 170 milionë amerikanëve iu janë nevojitur 24 orë (12 episode) për të gjetur vokalin e tyre, 5 milionë shqiptarë kanë nevojë për më shumë se 50 orë!