Luan Morina

Gjatë javës së kaluar më në fund filloi t’i ndihej zëri edhe sindikatës të RTK-së, e cila tashmë mesa duket është ndarë në dysh, si shumica e sindikatave kosovare. Ngjashëm si shumica e sindikatave duket të jenë dy krahë, ai i qeverisë dhe ai kundër qeverisë. Sido që të jetë për të vërejtur keqmenaxhimin e RTK-së nuk nevojitet filozofi e madhe! Mjafton pak reflektim.

Nëse krahasoni cilësinë e shumicës së programeve që transmetohen në këtë kanal dhe krahasoni me shumën që shpenzohet në to, shihni qartë se kemi një zhvlerësim të madh të euros! Shumat marramendëse që ofrohen për serialet dramatike pa kurrfarë drame, shou-programe “legjendare” që riciklojnë programe dhe artist të “plakur” dhe debate e programe informative që përsërisin informata dhe tema me javë të tëra, janë thjesht stratosferike.

E shumica e këtyre parave janë para të popullit, pa marrë parasysh suspendimin e taksës për transmetuesin publik. Furnizimi nga qeveria lehtëson kontrollin e këtij mediumi, por edhe e shpëton nga një krizë financiare pa marrë parasysh që nuk ka kurrfarë disavantazhi nga dy kanalet tjera kombëtare të cilat po mbijetojnë pa ndihmën e qeverisë.

RTK-ja nuk ka kufizim në reklama, ose më mirë të themi ka, por nuk e respekton në tërësi, nuk ka kufizime në programacion, pos atyre minutave të caktuar për minoritete, dhe ka miliona që merr nga qeveria për të ofruar program më “cilësor” për shije të pushtetit jo të qytetarëve. Kjo situatë nuk vështirëson RTK-në, por dy kanalet tjera kombëtare që rrezikojnë të humbin hapësira reklamuese nga transmetuesi publik.

Prandaj, shefat e RTK-së nuk kanë nevojë të vajtojnë për kushtet e punës, pasi janë të barabartë në treg me dy kanalet tjera kombëtare, dhe me shumë miliona të cilat i keqmenaxhojnë dhe thjesht i hedhin në bërllok, pasi një pjesë e konsiderueshme e programeve të tyre janë bërllok.

Të rikujtojmë që brenda këtij mediumi ka njerëz punëtorë e të ndershëm si dhe emisione shumë të qëlluara, por fatkeqësisht këto mbesin në hije nga pjesa tjetër dërrmuese që keqpërdor televizionin publik, ngjashëm siç ndodh me shumicën e ndërmarrjeve publike në Kosovë. Asnjë popull nuk besoj që do të gëzohej ashtu siç janë gëzuar kosovarët me heqjen e taksës për transmetuesin publik. Gëzim ky që ishte racional. RTK ka dështuar të bëjë për vete shikuesit, të krijojë një brend të besueshëm dhe të dashur për popullin.

Në mesin e emisioneve që merr dhjetëra mijëra euro për episod në RTK është edhe Milioneri. Episodi i javës së kaluar ishte përmbledhje e më të mirave. Gjithashtu producentët nuk harruan të na njoftonin që studioja e re e Milionerit do të jetë ultra-moderne, e dyta në Evropë pas asaj që përdoret në Britani të Madhe.

Më vjen mirë që së paku për diçka do të jemi në krye të Evropës, por s’di a e dinë producentët që shpërblimi kryesor në Britani të Madhe është plot 1 milionë funte, derisa me 50 mijë funte shpërblehen ata që arrijnë tek pyetja e shtatë. Gjithashtu milioni arrihet pas vetëm 12 pyetjeve, siç bëjnë shumica e versioneve në vendet e mëdha evropiane.

E shumica e vendeve tjera që ofrojnë nga 1 milionë nuk kanë përparësinë për të shpërndarë emisionin në tri kanale të ndryshme, në tri vende të ndryshme. Nga fqinjët, Maqedonia ofron rreth 48 mijë euro, Serbia 50 mijë, Sllovenia e Bullgaria nga 100 mijë, mirëpo ato nuk e kanë studion e dytë në Evropë, dhe gjysma e tyre kanë më pak shikues potencialë sesa versioni shqiptar. Të ofrohen vetëm 1750 euro për 10 pyetje është turp!!!