Driton Laifi

Kuvendi i sotëm i Federatës së futbollit të Kosovës (FFK) si asnjë kuvend në më shumë se 20-vjetorin e pavarësimit do t’i ngjajë një kuvendi të kukullave. Edhe në kohën e viteve të 90-ta, janë zhvilluar kuvende më demokratike në ato kohë okupimi që dikush nuk i njeh, ka pasur kundërkandidat, por edhe programe e sfida.

Bllokimi i kundërkandidatëve jo vetëm për kryetar të FFK-së, por me metodë të njëjtë edhe për vendet e tjera në Bord të shtëpisë së futbollit, shton dyshimet e manipulimeve dhe mungesë të demokracisë për sportin më të njohur në planet. Kjo po ndodh në kohën kur po aspirojmë të futemi në UEFA e FIFA në Kosovë, që më shumë se për çfarëdo tjetër ka nevojë për risi, aplikime të metodave më bashkëkohore, njerëz kreativë dhe debate të hapura për probleme reale.

Duke qenë të verbëruar pas këtyre nënshkrimeve, si vetëm në Prishtinë, por sidomos edhe nëpër rajone, këta zotërinj harruan të dërgojnë edhe ftesa për kuvendarët, e besa edhe materialet se çfarë do të diskutohet. Pati edhe reagime se nuk ka nevojë për materiale, por vetëm për ftesë. Po të kishin mundësi këta, nuk do t’i thirrin fare as delegatë dhe do të ndanin “ëmbëlsirën” e pushtetit të futbollit që duket se për të duan të nxjerrin edhe tapitë e pronës.

Dështimet e kësaj Federate i kemi shënuar shumë herë, por po ju kujtojmë sërish disa prej tyre si: mosmbledhja e përfaqësueses prej më shumë se një viti, dështimi për të sjellë Bursasporin e Dinamo Zagreb; premtimi për zhvillimin e ndeshjeve ndërkombëtare; mungesa e transparencës me rastin e shitjes së të drejtës televizive padrejtësisht për katër vite (gjë të cilën ende nuk e ka bërë asnjë Federatë evropiane, pasi që kontratat janë dyvjeçare); thirrjet telefonike të presidentit ndaj arbitrit që rrihet në Gjilan për të vazhduar ndeshjen; thirrjet edhe ndaj gjithë atyre që kanë shprehur një mendim më ndryshe në media për problemet që po ndodhin; harxhimi i gati 70 % të buxhetit të futbollit për rroga, honorare e udhëtime; mashtrimi i opinionit se i kemi punët mirë me FIFA kur u zbuluan dokumentet se aty trajtohemi si Osetia e Qipro turke; për punë lobimi u tentua të mashtrohet opinioni se në Portugali është takuar kinse me sekretarin e përgjithshëm e nënkryetarin e Federatës së Futbollit të këtij vendi; u organizua fushatë e fshehtë duke mbledhur nënshkrimet për të mbajtur postet e tyre jo vetëm kryetari po edhe shumë anëtarë të bordit që vijnë nga rajonet (madje njëri prej tyre nuk ngurroi të marrë nënshkrime edhe nga klubet që më nuk ekzistojnë)...së fundi UEFA as që diskutoi për rastin e Kosovës, dhe ajo madje as që komunikon me FFK-në.

Kuvendi i kukullave si do mbahet mend ky i sotmi vështirë se do t’i shërbejë futbollit të kosovar, pasi që çdo gjë mbetet e njëjtë, kurse problemet që janë gjithmonë në rritje po injorohen. Pasojat do t’i shohim në pranverë, kur të gjithë këta që janë në unitet për president, nuk do të heqin dorë nga largimet prej Superligës apo synimet për t’u inkuadruar në të.

Pas kuvendit sigurisht se do të zgërdhihen ata që mendojnë se ia hodhën duke fërkuar duart për të marrë ato meditje si delegat apo në komisione të ndryshme, por këta po harrojnë se po e tradhtojnë gjithë futbollin kosovar për një interes të tyre shumë të gërditshëm. Të tjerët do të vrapojnë të urojnë të përzgjedhurit pas një “gare shumë të afërt”, por shumë shpejt ky “plebishit demokratik” mund të shpërthejë, sepse në terren të futbollit kosovar gjërat janë shumë të brishta.