Agneta Bytyqi

Thua se nuk po u mungojnë problemet e përditshmërisë studentëve kosovare (e veçanërisht atyre të Gjakovës, duke ditur gjendjen ekonomike shumë të rënduar në këtë qytet), të cilët përballen me një sistem arsimor me shumë probleme, sistem ky që dita ditës po ia rëndon supet kësaj kategorie, e cila në numër është shumë e lartë, duke pasur parasysh faktin se përqindjen më të madhe të popullsisë sonë e përbën rinia, ditëve të fundit atyre u është dhënë edhe një “shuplakë djegëse”.

Nga 3 euro, sa ishte deri më tash çmimi i biletës për relacionin Gjakovë-Prishtinë dhe anasjelltas, ai është ngritur në 4 euro, që do të thotë se nëse studentët e komunës së Gjakovës që studiojnë në Prishtinë duan ta vizitojnë familjen e tyre 1 herë në javë, ata duhet të ndajnë nga buxheti i tyre edhe ashtu i vogël studentor 8 euro.

Meqenëse e kam kaluar edhe vetë këtë fazë, jetën studentore, nuk mund të hesht përballë kësaj çështjeje shumë të rëndësishme, por as ndaj faktit se Komuna e Gjakovës, deri më tani, nuk ka ndarë e as që e ka në plan për vitin 2012 të ndajë ndonjë bursë për rininë e saj. Si këshilltare komunale e kam ngre zërin dhe do të vazhdoj deri në mundësinë time të fundit të luftoj që studentëve të komunës sonë t’u ofrohet ndonjë ndihmë sado modeste.

Ose të ndahen bursa për ata studentë, familjet e të cilëve nuk kanë të ardhura, e që janë në numër të madh, ose Komuna të arrijë marrëveshje me kompanitë transportuese dhe të ulë çmimin e udhëtimit në këtë relacion, për së paku 4 herë në muaj për secilin student.

Në qershorin e vitit 2010, Lidhja Demokratike e Kosovës-Dega në Gjakovë, Forumi Rinor i saj, pati marrë iniciativë për lirimin e çmimit të biletës për studentët e komunës së Gjakovës. Ideja ka qenë që të gjithë studentëve, të cilët e dëshmojnë këtë, t’u zbritet çmimi i biletës për 50%. Qe bërë edhe një peticion me 1.200 nënshkrime të studentëve të komunës së Gjakovës, kërkesë kjo që u aprovua nga kryetari i Komunës, Pal Lekaj, dhe nga Asambleja Komunale.

Pas aprovimit të peticionit, Drejtoria e Arsimit u pati kërkuar studentëve të dorëzojnë një fletëpagesë të semestrit dhe dëshminë që janë studentë të UP-së. Por, fatkeqësisht, kjo iniciativë nuk u fuqizua asnjëherë dhe, pas pak kohësh, Komuna doli me deklaratë se nuk kishte arritur marrëveshje më kompanitë transportuese. Që nga ajo kohë, çmimi i biletës është rritur edhe për 1 euro, por pushteti vendor po vazhdon ende të qëndrojë indiferent përballë këtij problemi. Andaj, mendoj se ky pushtet nuk duhet vetëm të mburret me rininë e tij, por përfundimisht duhet të dëshmojë së është i gatshëm të bëjë të paktën diçka për të në këto vite të qeverisjes së tij, sepse realisht deri më tani ia ka zgjatur shumë pak dorën.