Është fjala për administratën shtetërore, që është e vendosur dhe vepruese midis hallkave të drejtimit politik (Parlamentit, Qeverisë dhe Presidentit), që bëjnë ligje, marrin vendime e nxjerrin dekrete dhe, nga ana tjetër, qytetarëve, që janë të ndjeshëm dhe të interesuar për to. Ky pozicion i saj e detyron dhe i jep mundësi administratës:

- Të ndihmojë me ekspertizë dhe punë të përditshme politikanët dhe hallkat shtetërore të drejtimit politik për të ndërmarrë nisma për propozim e miratim ligjesh e vendimesh të reja.

- Të zbatojë ligjet e miratuara nga Parlamenti. Por ky zbatim nuk ndodh dhe nuk mund te bëhet mekanikisht. Zbatimi i ligjit në administrata parakupton përpunimin e hollësishëm të udhëzimeve dhe direktivave për ligjet e miratuara dhe kujdesen që ligjet dhe vendimet e tjera politike të zbatohen më tej nga organet e qeverisjes lokale.

- Të shikojë, shpesh e para, sesi vihen në jetë aktet ligjore dhe nënligjore, të vlerësojë efektin veprues por edhe nevojën e mundshme për rishikimin apo ndryshimin e tyre.

Pra, për t’u shprehur përmbledhtazi, administrata shtetërore është hallka ndërlidhëse ku kërkesat e politikës dhe interesat e qytetarëve përballen me aftësitë “vendimet e formës së prerë” të nëpunësve të shtetit.

E nisa me vendin dhe rolin e administratës shtetërore në një vend demokratik jo për të vënë në dukje shkallën e infektimit të saj në Kosovë nga epidemia e shumëpërfolur dhe, siç thuhet, shumë e përhapur në strukturat politiko-shtetërore, në arsim e shëndetësi dhe në pushtetin gjyqësor. Mendoj se kurrsesi nuk mund të shmanget administrata shtetërore, qoftë qendrore apo vendore (lokale) nga sëmundja e korrupsionit, sepse, duke qenë në rolin e ndërmjetësit mes qytetarit dhe hallkave të drejtimit politik të shtetit, ka “fitimin” e sekserit.

Është sa e lehtë ta paragjykosh këtë dukuri, sa ç’është edhe e vështirë ta gjykosh me argumente atë. Besoj, madje jam i bindur, që shumica e nëpunësve tanë janë dhe punojnë në administratën tonë shtetërore qendrore dhe lokale me përkushtim dhe ndershmëri. Ajo që më shqetëson dhe që më nxiti për të shkruar është aftësia, përgatitja, profesionalizmi i administratës sonë shtetërore.

Kur kemi ndonjë defekt në rrjetin elektrik apo hidraulik të shtëpisë, u drejtohemi specialistëve. Kur kemi halle, që mund të zgjidhen nga Qeveria, Kuvendi, Presidenti, kontaktojmë me përfaqësues përkatës për problemin tonë në administratat e tyre. Por, jo rrallë, një pjesë e konsiderueshme e tyre nuk na kryejnë punë, sepse nuk na kuptojnë. Ata, me rrugë dhe mënyra të ndryshme kanë gjetur një vend pune, por jo një punë që dinë ta bëjnë. Kanë kërkuar te “miqtë” dhe kanë siguruar një vend në administratë, pa ju shkuar nëpër mend që në atë pozicion do të kontaktojnë dhe bashkëveprojnë me shkencëtarë, përfaqësues biznesesh, organizatash, organesh shtetërore e komunale të qeverisjes dhe përfaqësues të organizatave ndërkombëtare.

Ky bashkëveprim është, me shumë anë, detyra kryesore e administratës. Ai mund të ketë motive të ndryshme, si marrja e informacionit, mbulimi i problemeve, përpunimi i propozimeve për ligje dhe masa, dëgjimi i palëve të prekura, vënia në jetë e ligjeve dhe masave të shoqëruara me kontroll dhe mbikëqyrje.

Isha i sigurt, kur u deklarova për “prekjen” e administratës sonë shtetërore nga korrupsioni. Por, e kam të vështirë të deklarohem në të njëjtën mënyrë për paaftësinë e punonjësve të administratës për të kryer detyrën funksionale. E, megjithatë, nuk mund të mos vë në dukje ndikimin dhe peshën e pakundërshtueshme të politikës mbi administratën shtetërore. Fituesit e zgjedhjeve bëjnë “ndryshime”, “reforma”, madje dhe “ristrukturime” institucionesh për t’u gjetur pranë përkrahësve të vet. Administrata shtetërore, qendrore dhe vendore, është i vetmi domen i komanduar dhe i sunduar prej tyre.

Administrata e konsolidon apo e shkatërron shtetin. Ajo qëndron në mes, midis qytetarëve dhe organeve të pushtetit. Si e tillë, ajo përngjason me shtresën e mesme të qytetarëve të çdo kombi, përmasat dhe pesha e së cilës është faktor evident dhe garanci për ndërlidhjen, forcën dhe përparimin e një populli. Administrata jonë shtetërore jo vetëm e ka, por edhe duhet ta luajë këtë rol. Skenari politik dhe “çelësi” përkatës për të luajtur këtë rol nuk është aq lufta kundër korrupsionit, sesa lufta kundër të paaftëve në administratën shtetërore. Qeverisja, që del nga vota e popullit, ndryshon kategorikisht nga rezultati i kësaj vote, kurse administrata s’është dhe s’ka qenë kurrë në dorë të vullnetit popullor. Ajo është funksion i politikës dhe, njëherësh, bazament dhe fytyrë e pushtetit politik.

(Autori është anëtar i Kryesisë së Kuvendit të Kosovës)