Lojës së madhe shpërblyese në gazetën “Zëri”, çdo ditë i gëzohen rreth 100 fitues, por ata që ditëve të fundit janë gëzuar më shumë, janë Burim Latifi nga Ferizaj dhe Sefer Demiri nga Gjilani, të cilët janë fitues të nga një telefoni të bukur iPhone 4, që ndahen nga sponsori ynë, kompania EuroPrinty.

Burimi ndjehet mjaft i lumtur me shpërblimin e fituar, edhe pse nuk e kishte pritur që të jetë fitues. Ai thotë se tashmë disa muaj është bërë lexues i rregullt i gazetës “Zëri”, por jo për shkak të lojës shpërblyese, por për shkak të artikujve, që, sipas tij, janë tejet atraktiv.

“Ka disa muaj që jam bërë lexues i rregullt i gazetës ‘Zëri’, jo vetëm për shkak të lojës por për shkak të artikujve që më duken gjithnjë e më atraktivë. Sa i përket dhuratës që fitova nga loja “Lexo dhe Fito” t’ju them të drejtën as që e kam pritur sepse gjithnjë në fund e gërvishti këndin e lojës.

Mirëpo, edhe pse s’kam fituar deri më tani, besoj se kjo është shpaguar dje, sepse fitova iPhone 4 që dihet vlera e tij këtu te ne. Për mua kjo është një dhuratë shumë e madhe që as në ëndërr s’e kam parë. Uroj që të fitojnë të gjithë lexuesit e ‘Zëri’-t. Unë ju them atyre lexoni se me të vërtetë në një ditë do të fitoni”, është shprehur Burimi.

“Zëri” gazetë që lexohet dhe komentohet

Nga ana tjetër, e përditshmja “Zëri” tashmë është bërë gazeta më e lexuar në komunën e Skënderajt. Numri i lexuesve është rritur dukshëm, ndërsa kërkesat për vazhdimin e lojës edhe pas përfundimit të edicionit të tretë të lojës shpërblyese, janë të vazhdueshme. “Lexuesit vazhdimisht pyesin, nëse ‘Zëri’ do të vazhdojë edhe më tutje me lojën shpërblyese, pas përfundimit të edicionit të fundit.

Ndonëse ky edicion i lojës shpërblyese ende nuk është në gjysmë, lexuesit sikur brengosen nëse nuk do të vazhdohet me lojën”, thotë Aziz Veliu, shitës i gazetave. Sipas tij, “Zëri” është bërë gazeta me numrin më të madh të lexuesve. Veliu tha se “Zëri” e ka shtuar numrin e lexuesve pas fillimit të lojës shpërblyese, të cilët tek atëherë kishin parë se çfarë materialesh dhe tema interesante ka në të.

Jetullah Meha, avokat, tha se është lexues i rregull i “Zërit” që nga numri i parë në dhjetorin e vitit 1999. “E kam blerë numrin e parë, ka qenë numri festiv i Vitit të Ri. Ne kishim nevojë edhe për një gazetë, ndërsa ‘Zëri” ishte pikërisht ajo gazetë, të cilën ne e kërkonim”, është shprehur ai për të vazhduar: “Prej atëherë jam lexues i rregull i kësaj gazete.

Thjesht, në të gjej gjithçka që më intereson, duke filluar nga politika, ekonomia, kultura, sporti, ka aty materiale edhe për të rinjtë. Gjithçka që i duhet një qytetari për t’u informuar. Gjithsesi më duhet të them, se për dallim nga gazetat tjera, ‘Zëri’ ka materiale shumë interesante edhe për të gjitha komunat, kështu të gjitha informacionet për ngjarjet që ndodhin brenda një dite në gjithë Kosovën i gjejmë aty”, tha avokati Meha.

Ai shtoi, se loja shpërblyese veç sa e ka shtuar oreksin e lexuesve dhe vjen si një ëmbëlsirë në fund të ushqimit. Avokati Meha thekson se ka fituar në lojën shpërblyese dhe se herë pas herë e përcjell fati.

Edhe për afaristin Hajdin Sokoli, “Zëri” është bërë ushqim i përditshëm. “Pa të gjithsesi që nuk mundemi. Sa për vete, hapin e parë që e bëj në mëngjes, e blej “Zëri”-n, e gërvishti dhe shikoj nëse kam fituar.

Pastaj e lexoj pjesë-pjesë. Si i ri që jam, më interesojnë temat që trajtohen për të rinjtë, për bizneset dhe për gjithçka tjetër që hyn në zhvillimin e ekonomisë, të infrastrukturës dhe në kulturë.

Nuk kam fituar deri më tani, por e kemi bërë ves që më së pari ta gërvishtim pjesën e caktuar dhe pastaj hyjmë dhe e lexojmë gazetën. Më përpara gazetat i kam lexuar kohë pas kohe, por tani jam i rregullt me ‘Zëri’-n. Pos që lexohet, materialet dhe temat e kësaj gazete komentohen pasi që të lexohen, sepse nxisin interesimin e njerëzve”, pohon Sokoli. Shqipe Hajdini, studente, thotë se më përpara nuk ka qenë shumë adhuruese e gazetave, por tani me “Zëri”-n, siç thotë ajo, “është më ndryshe”.

“Valla kurrë nuk kam lexuar gazetë, sepse krejt i shihnim në televizor, por ‘Zëri’ nisi me lojën shpërblyese dhe unë vendosa që ta blej. Fillimisht vetëm e gërvishtja atë pjesën e lojës, por më vonë fillova ta lexoj dhe vërejta se ka shumëçka interesante, sidomos për ne femrat.

Kam fituar vetëm njëherë dhe vazhdoj të luaj, por përveç kësaj jam bërë edhe lexuese e pasionuar”, është shprehur Shqipja. “Unë e kam një rekomandim për të gjithë ata që nuk lexojnë gazeta, që të fillojnë të lexojnë, sepse njeriu duke lexuar i shton njohuritë e veta. Ka materiale që nuk mund t’i gjesh as në libra.

Vetëm dy tema dua t’i përmend, e që i kam lexuar në ‘Zëri’ që nuk kam mundur t’i gjej askund, ndoshta më herët dikur po, por ne të rinjtë nuk kemi pasur rast t’i dijmë: tema për periudhat e krijimit të shtetit të Izraelit në territoret e Palestinës, si dhe ngritja dhe rënia e Gadafit. Vetëm për këso temash ia vlen të lexohet ‘Zëri’”, tha në fund Shqipja. Kajtaz Gecaj

“Zëri” rrit numrin e lexuesve në Rahovec

Gazeta “Zëri”, kohëve të fundit ka shtuar numrin e lexuesve edhe në komunën e Rahovecit, duke u bërë ndër dy gazetat kryesore të kësaj komune. Sokol Sokoli, koordinator kryesor i shitjes së gazetave në Rahovec, përderisa flet për rënie të interesimit për gazetat në përgjithësi, flet për shtim të interesimit për gazetën “Zëri”, duke bërë me dije se ajo tashmë është ndër dy gazetat kryesore që shiten më së shumti në këtë qytet.

Ai ka folur edhe për korrektësi në shpërndarjen e shpërblimeve, për të cilat thotë se fituesit ato mund t’i tërheqin në Rahovec, për dallim nga ndonjë gazetë tjetër. “Fituesit e gazetës ‘Zëri’ shpërblimet e tyre i tërheqin në Rahovec, për dallim nga ndonjë gazetë tjetër, e cila shpërblimet për fituesit eventual të Rahovecit i ndan në Prizren, që atyre u krijon telashe të konsiderueshme”, thotë Sokoli, duke shpresuar se ndonjëri nga shpërblimet e mëdha të lojës së gazetës të bjerë edhe në Rahovec.

Kimete Dërguti nga Rahoveci po ashtu shprehet të jetë lexuese e rregullt e gazetës përderisa tregon se lexon kryesisht rubrikën për komunat. “Më duket se ndonjëherë rubrika e komunave ka hapësirë të kufizuar”, thotë ajo pasi mendon se është pak hapësirë për mbi 30 komunat e Kosovës.

“Do të doja të lexoj tema nga përditshmëria e jo veç politikë, e cila na ka hipur në kokë”, përfundon kjo e re. Edhe Astrit Mullaaliu që ka një butik në qendër të Rahovecit shpreh fjalë të mira për gazetën, e cila kohëve të fundit po bëhet gazeta kryesore edhe në këtë komunë. “Unë shkoj dhe secilin mëngjes i lexoj të gjitha gazetat pasi më pëlqen sporti”, thotë Astriti, duke e lavdëruar pjesën e gazetës, e cila merret me sport.

Ndryshe, në këtë qytet, gazeta “Zëri” lexohet nga të gjitha shtresat e qytetarëve, kurse pjesa më e madhe e lexuesve të saj shprehen se për së shpejti gazeta do të stabilizohet në krye të mjeteve të shkruara të informimit në Rahovec. N. Krasniqi