Loja e madhe shpërblyese në Gazetën “Zëri”, nuk kishte përfunduar më datën 31 dhjetor 2011, pasi redaksia e gazetës kishte paraparë shpërblime edhe për ata që nuk kishin pasur fatin të gërvishtin kuponë fitues gjatë lojës së madhe shpërblyese, gjatë së cilës gazeta ka shpërblyer me mijëra lexues me shpërblime të ndryshme, duke përfshirë edhe veturën Peugeot 206, që ishte edhe çmimi kryesor, pastaj shumë iPhone 4, PlayStation 3, DVD, para të gatshme, kuponë për blerje dhe mijëra mbushje telefoni.

Dhe të premten në lokalet e redaksisë së gazetës “Zëri”, është bërë tërheqja e fituesve të lojës shpërblyese me zarfe, që ishte pjesë e lojës së madhe shpërblyese të gazetës gjatë vitit të kaluar. Rregulla për të marrë pjesë në këtë lojë, ishte dërgimi i një zarfi me 10 kuponë të cilët nuk ishin fitues gjatë lojës së rregullt dhe të cilët duhet të ishin të datave të ndryshme. Dhe në redaksinë e gazetës “Zëri”, kishin arritur me mijëra zarfe nga lexuesit e rregullt të gazetës.

Në praninë e shumë qytetarëve, apo më mirë të themi shumë lexuesve të gazetës “Zëri” si dhe të komisionit i cili përbëhej nga tre anëtarë, ku kryetar i komisionit ishte z.Sedat Uka nga Ministria e Financave, pastaj Agon Osmani, redaktor i ueb-faqes “Zeri.info”, dhe Shpend Krasniqi, zyrtar për marketing në gazetën “Zëri”, u bë tërheqja e fituesve fatlumë të çmimeve mjaft tërheqëse, duke përfshirë DVD, 2 PlayStation 3, iPhone 4 dhe ekstra-pushim, fundjavë në Mavrovë për çift, ku fituesit do të pushojnë në hotelin “Alpina”.

Tërheqjen e zarfeve e kanë bërë disa nga të pranishmit në këtë ceremoni të tërheqjes. Fituesi i parë i kësaj loje, një DVD, ishte Lorent Konjusha nga Fushë Kosova, i cili kishte dërguar 10 kuponë me data të ndryshme. Shpërblimi tjetër ishte Playstation 3, i cili ka shkuar për fituesin Agim Cana nga Prishtina, derisa fituesi i PlayStation të dytë, ishte Florian Bytyçi po ashtu nga Prishtina.

Fatlumja tjetër në këtë tërheqje, ishte Majlinda Islami nga Prishtina, e cila është fituese e shpërblimit të mrekullueshëm, një iPhone 4. Por ai që do t’i gëzohet më së shumti shpërblimit, gjithsesi se është Ismet Osmani nga Dardana (ish-Kamenica), i cili do ta ketë mundësinë që së bashku me një person tjetër që ai e zgjedh, të kënaqet tre ditë pushim në Mavrovë, në hotelin “Alpina”.

Loja shpërblyese vazhdon

Gjithsesi se këto nuk do të jenë shpërblimet e fundit që ndahen nga gazeta “Zëri”, pasi lexuesit e gazetës do ta kenë sërish mundësinë të fitojnë shumë çmime të tjera. Redaksia e gazetës “Zëri”, së shpejti do të vazhdojë me lojën e madhe shpërblyese, gjatë të cilës do të ndahen edhe mijëra shpërblime të tjera nga më të ndryshmet dhe me të cilat do të befasohen lexuesit.

Ky është një përkushtim i gazetës për të shpërblyer lexuesit e saj të shumtë, të cilët çdo ditë janë të shoqëruar me gazetën “Zëri” dhe të cilët këtë gazetë e kanë si burim informacioni. Edhe lexuesit e gazetës e kanë mirëpritur paralajmërimin për vazhdimin e lojës, ku shumica thonë se tashmë janë mësuar me këtë lojë. I një mendimit të tillë është edhe Agron Fejza nga Prishtina, i cili është shprehur se sa herë e blen gazetën, sytë fillimisht i shkojnë në pjesën ku gjendet kuponi për gërvishtje.

“Gërvishtja e kuponit në gazetën ‘Zëri’, është bërë një shprehi për mua dhe për anëtarët e familjes sime. Dhe kur kemi mësuar se loja do të vazhdojë, jam ndjerë i lumtur, pasi përveç informimit të saktë dhe të paanshëm të gazetës ‘Zëri’, po kemi mundësi edhe të argëtohemi dhe të fitojmë”, është shprehur z.Fejza. Edhe Zymer Demolli e ka mirëpritur vazhdimin e lojës shpërblyese.

“Është një vendim i mirë i gazetës ‘Zëri’ për të vazhduar me lojën, sepse jemi mësuar me të. Unë e kam blerë gazetën që nga fillimi, jo vetëm prej se ka filluar loja, mirëpo, me lojën, ka ndodhur që unë dhe familja ime të blejmë edhe deri në 3 ekzemplarë. Prandaj jam i lumtur që sërish do të kemi mundësi për të fituar, përveç informimit të saktë”, është shprehur z. Demolli.