Se loja e madhe shpërblyese në gazetën “Zëri”, tashmë është bërë pjesë e pandashme e përditshmërisë së shumë lexuesve të kësaj gazete, tregon edhe anketa e bëra me disa prej tyre.

Të gjithë të anketuarit tanë ishin këmbëngulës që kjo lojë të vazhdojë edhe më tutje, pasi ata tashmë janë mësuar që çdo ditë ta gërvishtin kuponin e lojës shpërblyese.

Sabit Selimi nga Prishtina, një lexues i rregullt i gazetës tashmë disa vjet, thotë se në asnjë mënyrë loja nuk duhet të ndërpritet sepse, tashmë janë mësuar me të.

“Assesi nuk duhet loja të ndërpritet, sepse e ka bërë ‘Zërin’ një gazetë më të kompletuar dhe më argëtuese. Unë dhe familjarët e mi çdo ditë bëjmë gara se cili ta gërvishtë kuponin dhe shpesh blejmë edhe më shumë se vetëm një gazetë. Nuk ka të bëj me atë që domosdo të fitosh diçka, por gërvishtja e kuponit e ka të veçantën e saj. Prandaj, shpresojmë se loja do të vazhdojë dhe ne do të kemi mundësi të luajmë më tutje”, është shprehur z.Selimi.

Edhe Arjeta Shala është e të njëjtit mendim. “Unë e blej Zërin edhe para lojës shpërblyese, sepse mendoj se është gazeta që ofron më së shumti, sidomos gjatë vitit të fundit, pasi ka pësuar shumë ndryshime si në dizajn, ashtu edhe në përmbajtje të informacione. Unë më shumë i pëlqej faqet e argëtimit dhe Zëri i sjell lajmet më të freskëta nga bota e shoubizit. Por loja shpërblyese duhet të vazhdojë, sepse ajo për mua, por besoj edhe për lexuesit e tjerë, është bërë pjesë e jetës së përditshme”, është shprehur Arjeta.

Sadik Berisha, i cili tashmë ka fituar dy shpërblime në lojën e Zërit, thotë se loja doemos duhet të vazhdojë, sepse dëshiron të fitojë një çmim më të madh. “Loja duhet të vazhdojë, sepse dua të fitoj një çmim më të madh, ngase deri tani kam fituar një bluzë dhe një mbushje”, ka thënë ai duke qeshur.