Ndërsa lexuesit e gazetës “Zëri” janë nën ethet se kush do të jetë fituesi i çmimit kryesor të lojës së madhe shpërblyese, veturën Citroen C3, të gjithë janë të njëzëri se loja shpërblyese edhe pas ndarjes së këtij çmimi të madh, duhet të vazhdojë, pasi ata tashmë janë mësuar me këtë lojë, për të cilën thonë se është bërë përditshmëri në jetën e tyre.

Dhe gjithsesi se dëshira e lexuesve tanë besnik, është në rend të parë nga drejtuesit e gazetës dhe tashmë është marrë vendimi për vazhdimin e lojës, ku lexuesit tani i presin me mijëra shpërblime jashtëzakonisht të bukura, të cilat do të shpërndahen deri më 31 dhjetor të këtij viti.

Bajram Uka merr shpërblimin e tij

Bajram Uka nga Obranqa e komunës së Podujevës, të cilit të mërkurën i ka buzëqeshur fati që të jetë njëri nga fituesit e shpërblimit njëjavor në Turqi, nuk ka mundur të presë më shumë, por qysh të enjten në mëngjes, me gazetën e cila i ka sjellë fat, është paraqitur në lokalet e redaksisë së “Zërit”.

“Më duhet të shkoj sa më shpejt në pushim, sepse më duhet të kthehem për ta mbledhur pasulen në arë”, ka deklaruar buzagaz z.Uka, i cili edhe njëherë e ka shfaqur gëzimin dhe falënderimin e tij për këtë shpërblim të madh.

“Unë jam shumë i lumtur, pasi siç kam thënë edhe një ditë më herët, më në fund pas 60 vjetësh m’u dha mundësia që për herë të parë të shkoj në det në Turqi. Jam shumë mirënjohës për gazetën për këtë shpërblim të mrekullueshëm”, ka theksuar Bajram Uka me rastin e pranimit të shpërblimit.

Bajrami është në mesin e dhjetëra lexuesve të gazetës “Zëri”, të cilët këtë verë kanë pushuar dhe do të pushojnë në bregdetin e bukur të Turqisë, por gjithsesi se nuk do të jenë edhe të fundit, pasi “Zëri” do të vazhdojë të sjellë edhe më shumë çmime të bukura.

Në Rahovec presin vazhdimin e lojës shpërblyese

“Zëri” vazhdon të mbetet njëra ndër gazetat kryesore dhe ndër më të shiturat në Rahovec, bëjnë të ditur nëpër kiosqet e kësaj komune përderisa qytetarë të shumtë vlerësojnë se ka qenë informimi i paanshëm por edhe loja shpërblyese ajo e cila ka ndikuar që këtë.

Jetmir Fetoshi nga Fortesa e kësaj komune thotë se “Zërin” e lexon që disa vjet dhe tashmë i është bërë shprehi. “Veç faqeve rajonale ku informohemi për ato që ndodhin edhe në komunën tonë. Më pëlqen sporti, por edhe fjalëkryqi i së dielës i cili gjithsesi është një dhuratë e veçantë për mua”, shprehet ai duke vlerësuar se loja shpërblyese ja ka rrit shitjen gazetës.

Edhe Fatjona Haxhijaha, një e re nga Rahoveci vlerëson se loja shpërblyese ia ka rritë shitjen kësaj gazete. “Është mirë pasi përveç që e lexoj gazetën, në të njëjtën kohë më jepet mundësia ta provoj fatin”, thotë ajo duke treguar se deri tash megjithatë nuk i ka shkrepur fati.

E pyetur se ç’ka i pëlqen më shumë në aterialin e kësaj gazete, ajo shprehet se i lexon zakonisht faqet që kanë të bëjnë me të rinjtë dhe VIP-at. Shaqir Mullaabazi nga ana e tij, pret që të vazhdojë loja shpërblyese. “Mirë do të ishte që të vazhdonte loja e gazetës pasi tash na është bërë shprehi”, shprehet ai në të qeshur.

“Po vazhdoj loja, atëherë ndoshta ndonjëri prej shpërblimeve të mëdha do të bije edhe në Rahovec”, thotë ky qytetarë nga Rahoveci i cili “Zërin” e vlerëson gazetë të pa anshme dhe serioze. Ndryshe, edhe qytetarë tjerë të kësaj komune, presin që të vazhdojë loja shpërblyese e “Zërit”, e cila sipas tyre e ka bërë më atraktive gazetën.

“Zëri” më i kërkuari në Malishevë

Gazeta “Zëri” vazhdon të mbetet njëra ndër dy gazetat kryesore në Malishevë thotë Fatmir Morina, shpërndarësi kryesor i gazetave në këtë komunë përderisa nga qytetarët vlerësohet si njëri ndër mjetet më të pa anshme të informimit.

Arben Morina nga Drenofci që është vendbanimi më i madh i kësaj komune, përkundër asaj që me pune të përkohshme ndodhet jashtë vendit, shprehet se “Zërin” e lexon edhe atje. “E lexoj vazhdimisht pasi e konsideroj gazetën më të pa anshme”, shprehet ai duke bërë të ditur se edhe gjatë këtij muaji të pushimeve nuk ka lënë pa e lexuar.

“Më pëlqejnë pothuaj të gjitha rubrikat por në orët e mbrëmjes më shumë çlodhem me enigmatikë”, përfundon Arbeni. Muhamet Kryeziu nga Pagarusha po ashtu “Zërin” e vlerëson gazetën më të pa anshme kurse vlerëson se loja shpërblyese e ka bërë më atraktive atë. “Unë kurdo që blej gazetë, e blej “Zërin” pasi aty i gjej të gjitha ato që i kërkon me një gazetë ditore”, thotë Muhameti.

“Mirë do të ishte që të vazhdoj loja shpërblyese pasi kjo është një motiv më shumë për ta blerë gazetën dhe mua më pëlqen kjo”, përfundon Meti. Edhe Saranda Mazreku, një e re e kësaj komune fletë fjalë të zgjedhura për “Zërin” si një medium informimi.

“Mirë është në përgjithësi pasi e lexoj çdo ditë sepse e blenë vëllai që punon në shkollë”, thotë ajo duke u shprehur se e pëlqen kryesisht faqen për të rinjtë. “Më pëlqen shumë edhe loja shpërblyese e cila dëshiroj që të vazhdoj pasi në të njëjtën kohë përveç që informohesh, e provon nëse ke fat apo jo”, përfundon ajo në të qeshur.