Vazhdimi i lojës së madhe shpërblyese i gëzoi të gjithë lexuesit e “Zërit”. Ata e mirëpritën këtë gjë dhe iu falënderuan stafit drejtues të gazetës që mori parasysh kërkesën e tyre që loja të mos ndalet, sepse ajo është bërë pjesë e pandashme e përditshmërisë së tyre.

Sipas shumicës së të anketuarve të kryeqytetit gazeta “Zëri” është duke u shitur me të madhe edhe kjo jo vetëm falë lojës së madhe shpërblyese, por edhe për shkak të artikujve të shumtë, cilësorë dhe të paanshëm, por edhe për dizajnin e shkëlqyeshëm.

Nazmi Gashi, është lexues i rregullt i kësaj të përditshme i cili thotë që pa “Zërin” nuk mund ta paramendojë ditën. “Ka kohë të gjatë që kjo gazetë është pjesë përbërëse e ditës sime. ‘Zëri’ është gazetë shumë e mirë, ka shkrime nga të gjitha fushat.

Mua personalisht më pëlqejnë faqet argëtuese dhe ato për të rinj, ku vlen të veçohet shtojca e teknologjisë, e cila është shtojca me e mirë e këtillë në treg”, pohoi ai. Lidhur me lojën shpërblyese ai pohon se është më se e qëlluar, e sidomos vazhdimi i saj. Mendim të njëjtë sikur edhe Gëzimi, ka edhe lexuesi tjetër, Ismet Berisha.

“Gazetën ‘Zëri’ e marr çdo ditë dhe e kaloj një kohë bukur të mirë të ditës duke lexuar se është e mbushur me materiale. Më pëlqejnë shumë faqet e enigmatikës dhe me ëndje e plotësoj fjalëkryqin”, tha ai duke mos harruar të përshëndes vazhdimin e lojës.

Se loja shpërblyese ka ndikuar për të mirë dhe në shitjen e gazetës, pohojnë edhe shitësit e shumtë të Prishtinës. “Gazeta ‘Zëri’ po shitet që në orët e hershme të mëngjesit, dhe kjo para së gjithash falë lojës shpërblyese”, tha Fitim Aliu, shitës në një kiosk. Ai shtoi se përveç lojës, nga kontakti që ka me lexuesit e shumtë, në shitjen e mirë ka ndikuar edhe cilësia dhe paanësia e kësaj gazete.

Deçanasit mirëpresin vazhdimin e lojës

Sadik Nimanaj, njëri ndër shitësit e gazetave dhe zyrtar për distribuimin e gazetave nëpër pikat shitëse në Deçan, thotë se është shumëfishuar numri i lexuesve të gazetës “Zëri”. Kjo rritje sipas Nimanajt vjen në radhë të parë për shkak të temave të trajtuara, sidomos atyre lidhur me dukuritë negative me të cilat po përballet shoqëria jonë, kurse si faktor tjetër të kësaj rritje ai e përmend edhe lojën e madhe shpërblyese, e cila pas kërkesave të lexuesve të shumtë edhe vazhdoi.

Ai ka treguar se pos në qendrën komunale, “Zëri” ka depërtuar edhe në zonat rurale dhe është bërë pjesë e shumë familjeve dhe lexuesve nga të gjitha moshat. “Vendimin për vazhdimin e lojës e mirëpresim të gjithë, sepse gjatë tërë kohës sa po zgjatë kjo lojë, ajo është një atraksion për të gjithë”, thotë Isuf Mazrekaj, njëri ndër fituesit e shpeshtë të mbushjeve “Vala”, i cili tregon se si lexues i rregullt i kësaj gazete ka fituar tri shpërblime, të cilët për të kanë qenë sa modeste aq edhe inkurajuese.

“Zërin’ nuk e marr vetëm sa për shpërblime, por më ka ‘hyrë në gjak’ për temat e trajtuara, të cilat i konsiderojë të guximshme dhe janë në funksion të luftimit të dukurive negative, të cilat nuk janë të pakta dhe paraqesin regres në procesin e shtet ndërtimit të Kosovës.

Jam lexues i pasionuar i temave të tilla, ngase së paku duhet thënë publikisht realitetin, qoftë ai edhe i hidhur, ngase unë këtë e vlerësoj si preventivë dhe si pikënisje të parandalimit të këtyre dukurive”, shprehet Mazrekaj, i cili beson se kjo gazetë do ta ruaj një imazh të tillë. Një lexues tjetër i rregullt i “Zërit”, po ashtu shprehu gëzimin për vazhdimin e lojës shpërblyese dhe tha se këtë e meritojnë lexuesit e shumtë të kësaj gazete.

“Loja bashkë me temat vazhdojnë të rrisin numrin e lexuesve edhe nëpër fshatra”, kështu shprehët nxënësi Shpetim Berisha, nga Rrezari, i cili ndonëse nuk i ka buzëqeshur fati, për të fituar ndonjë shpërblim, prapëseprapë nuk ka hequr dorë nga “Zëri”, i cili siç thotë ai është gazeta më reale në vend, duke mos ia mbajtur krahun asnjë partie politike, pushteteve qendrore dhe lokale.

Edhe lexuesit tjerë deçanas shprehën të kënaqur me rolin e kësaj gazete për informim të drejtë të qytetarëve, i cili në Kosovën e pas luftës, shpesh iu ka munguar. “Vazhdoni kështu, sepse do të mirëpriteni nga të gjithë”, shprehet Violeta Kukalaj nga Vokshi.

Në Mitrovicë, “Zëri” më i lexuari

Ditët e fundit lexuesit e shumtë të gazetës më të lexuar në Mitrovicë, përcollën kërkesa të shumta që të vazhdohet loja shpërblyese dhe kjo dëshirë e tyre edhe u plotësua. Lexuesit mitrovicas kanë fjalë të mira për “Zërin” i cili sipas tyre pos temave të ndryshme, ofron edhe mundësi fitimi të shumë shpërblimeve si ndodhi deri tash.

Prof. Adem Mripa, thotë se gazeta “Zëri” vlen të shfletohet dhe të lexohet. Ai tha se përveç artikujve cilësorë e përmbajtësor, “Zëri” ofron edhe lojën e madhe shpërblyese e cila ka arritur t’i stimulojë lexuesit e vet. “Lexoj të gjitha faqet e gazetës, kurse më pëlqen shtojca e fjalëkryqit që del të dielave”, tha ai.

Adem Çollaku, arsimtar, tha se “Zëri”, së bashku me lojën shpërblyese është ndër gazetat më cilësore në vend, kurse Ali Kadriu, tha se nuk ka ndikuar aspak loja shpërblyese që ka filluar në një gazetë tjetër të Kosovës. “‘Zëri’ është gazeta më e kërkuar në qoshkun tim”, tha shitësi Qerim Voca. “Të gjithë ekzemplarët e ‘Zërit’ shiten në orët e para të mëngjesit.

Kjo është pasojë edhe e lojës shpërblyese”, tha ai. Se kjo e përditshme shitet shpejt dhe që në mëngjes e ka konfirmuar edhe Bajram Rexhepi, shitës i gazetës në qendër të Mitrovicës. Ai tha se tash kur pritet të ndahet vetura tjetër në “Zëri”, kërkesat janë më të mëdha për gazetën, madje ka individ që marrin edhe nga disa ekzemplarë. Situatë e ngjashme është edhe në pikat tjera të shitjes në Mitrovicë, ku vështirë mund të gjesh ndonjë ekzemplar të pa shitur të “Zërit”.