Vazhdimi i lojës së madhe shpërblyese në gazetën “Zëri” është mirëpritur jashtëzakonisht mirë nga lexuesit e kësaj gazete, e sidomos e vlerësojnë korrektësinë e lojës dhe llojllojshmërinë e çmimeve.

Çdo ditë mbi 80 lexues bëhen fitues të shpërblimeve të ndryshme të gazetës, ku shumë prej tyre janë shpërblime me vlerë të madhe, ndër to edhe Sony PlayStation, shpërblime në vlerë 200 dhe 20 euro nga Banka Ekonomike, kuponë në vlerë 50 euro nga “MiniMax Shopping Center”, DVD, etj.

Vlera e shpërblimit nuk ka rëndësi

Nafije Gashi, nga Prishtina, është njëra nga fitueset e një DVD-je. Ajo ka shfaqur kënaqësinë që ka arritur të fitojë një shpërblim të tillë dhe që thjesht është bërë njëra nga fitueset e kësaj loje.

Ajo gjithashtu ka rrëfyer se si ishte bërë fituese e këtij shpërblimi. “Bashkëshorti im çdo ditë e blen gazetën ‘Zëri’, por jo për shkak të lojës shpërblyese, por se i pëlqen përmbajtja e gazetës, ndërsa unë interesohem më shumë për gërvishtjen e kuponit.

Edhe ditën kur kam fituar, si zakonisht burri im e ka blerë gazetën dhe pasi e ka përfunduar me leximin, ka dashur ta hedhë, por unë i kam thënë se duhet ta gërvishtë kuponin. Ai më tha mos e ço kohën kot, se nuk ka asgjë nga kjo punë, sepse nuk besonte në lojën.

Mirëpo, unë insistova dhe pasi e gërvishta kuponin, pashë se kisha fituar një DVD dhe pastaj fillova të tallem me burrin tim për këtë dhe ai vërtet u bind në korrektësinë e lojës. Nuk ka rëndësi vlera e shpërblimit, por vetëm fakti se kam fituar”, ka deklaruar Nafija.

Një tjetër fituese e një DVD-je ishte edhe Sebehate Gërbeshi, po ashtu nga Prishtina, derisa kuponë në vlerë nga 50 euro nga “MiniMax”, kanë fituar Shemsi Novoberdali dhe Adem Syla nga Prishtina, derisa nga 20 euro nga Banka Ekonomike kanë fituar Muhamer Arllati nga Drenasi, Fahri Jetullahu nga Prishtina, Luan Halilaj nga Drenasi dhe Merita Zariqi nga Prishtina, derisa qindra lexues kanë fituar mbushje me vlerë 5 euro nga VALA gjatë ditëve të fundit.

“Zëri” shitet qysh në mëngjes

Interesimi për gazetën “Zëri” është jashtëzakonisht i madh dhe në shumë kioskë dhe minimarkete, shitet qysh në orët e hershme të mëngjesit. Albert Braholli, shitës në një minimarket në lagjen Bregu i Diellit, thotë se gazeta "Zëri" është gazeta e cila shitet në mëngjes dhe kërkesa është edhe gjate ditës.

“Besoj dhe mendoj që me lojën shpërblyese, lexuesi jo vetëm që informohet me tema dhe me ngjarjet interesante që i bën kjo gazetë, por po shpërblehet edhe me shpërblime atraktive që i ofron kjo.

Gazeta është në hap të mirë dhe pres që të jetë edhe më atraktive në të ardhmen”, është shprehur Alberti. Se gazeta ‘Zëri’ është më e kërkuara dhe më e shitura, e ka konfirmuar edhe Zenel Gashi, gjithashtu pronar i një supermarketi afër shkollës teknike në Prishtinë. “Para 5-6 muajsh unë në minimarketin tim kam marrë nga 10 ekzemplarë të ‘Zëri’-t dhe në ditë shisja 8-9 copë.

Por, tani e kam dyfishuar tirazhin, pra marr 20 copë dhe që të gjitha shiten qysh herët në mëngjes. Kërkesat janë të vazhdueshme dhe së shpejti do ta rris edhe numrin e gazetave.

Tashmë disa lexues që e kanë blerë gazetën tek unë, edhe kanë fituar shpërblime. ‘Zëri’ ka pësuar ndryshime të mëdha si për nga kualiteti, ashtu edhe për nga përmbajtja dhe lexuesve vazhdimisht po u sjell risi të ndryshme”, është shprehur z.Gashi.

Kastriote Bajrami

Kënaqen me befasitë që po ua sjell “Zëri”

Gjilan. Edicioni i tretë i lojës shpërblyese të gazetës “Zëri” është mirëpritur edhe ndër gjilanasit, të cilët vazhdojnë që këtë gazetë ta konsiderojnë si më të lexueshmen e më te besueshmen, e cila përpos shkrimeve interesante, lexuesve po u sjell edhe befasi të mëdha.

Dhjetëra shpërblime ishin fituar nga lexuesit gjilanas në edicionet e kaluara të lojës, kurse tashti kur fondi i shpërblimeve është rritur, me të është rritur edhe interesimi për gazetën.

Burim Kadriu, lexues i rregullt i gazetës, thotë se i pëlqejnë shkrimet që kanë të bëjnë me sportin dhe sidomos ato ku flitet për sportin vendor, e ai nuk e fsheh faktin se është lojtar i rregullt në lojën shpërblyese.

Ai nuk beson se do të arrijë ndonjërin nga shpërblimet e mëdha, por thotë se do të ishte shumë i kënaqur nëse ia del të fitojë ndonjë çmim, që do t’i mbetej si kujtim nga gazeta e tij e preferuar.

Afrim Selimi, punëtor, gjithmonë ka qenë lexues i rregullt i gazetës “Zëri” e atë e lexon edhe tashti, kur sipas tij gazeta ka marrë një pamje krejt tjetër, ofron befasi për lexues dhe çka jo tjetër.

Afrimi thotë se do të jetë lexues edhe në të ardhmen, përderisa gazeta të mbajë këtë formë, kurse për lojën shpërblyese thotë se ajo është edhe një motiv shtesë që e shtyn ta blejë gazetën “Zëri”.

Edhe Burim Musliu, i cili vazhdimisht lexon gazetën “Zëri”, thotë se pret që në numrat në vijim të jetë fitues i ndonjërit nga shpërblimet që i ndan gazeta “Zëri”. Siç thotë ai, më me dëshirë do të donte të fitonte ndonjërin nga shpërblimet më të mëdha, por siç ka shtuar ai, edhe nëse nuk fiton, ai do t’i mbetet besnik gazetës “Zëri”.

Shitësit e gazetave në Gjilan thonë se “Zëri” vazhdon të mbetet ndër gazetat më të preferuara tek lexuesit dhe se numri i kërkesave për këtë gazetë po shtohet nga dita në ditë. Ata e pranojnë se përveç shkrimeve me interes, kërkesat për “Zërin” i ka rritur edhe Loja e Madhe Shpërblyese.

E. Sadiku