Loja e madhe shpërblyese po vazhdon, e se bashku më këtë edhe shpërblimet e shumta të cilat po i gëzojnë çdo ditë lexuesit e shumtë. Kjo javë ishte fatlume për shumë veta, ngase pati të tillë që fituan 500 euro, por edhe iPhone 4. Në të gjitha komunat e Kosovës është entuziazmi i njëjtë, dhe të gjithë njëzëri pohojnë se gazeta “Zëri” është më e mira që gjendet momentalisht në tregun tonë.

“Zëri” komunikon realisht me lexuesit

Deçan. Gazeta “Zëri” vazhdon të rritë komunikimin real me lexuesit, numri i të cilave po shtohet në vazhdimësi, duke krijuar kështu një imazh të veçantë për qytetarët e vendit, por edhe në diasporë.

Kështu thonë të anketuarit e radhës, të cilat shprehen optimistë se një komunikim i tillë, por edhe vazhdimi i lojës shpërblyese rrisin interesimin e qytetarëve deçanas, për të cilët “Zëri”, vazhdon të jetë numër një, përballë gazetave tjera ditore.

Vazhdimi i këtij trendi, e bën gjithnjë e më të fuqishëm, emrin e kësaj gazete, e cila për deçanasit është një dritare e hapur për të gjitha ngjarjet në vend dhe më gjerë. “Zëri”, aktualisht është njëra prej gazetave më reale, e cila guximshëm pasqyron realitetin politik, ekonomik, por edhe dukuritë devijuese në shoqëri, ndërkohë vazhdimi i lojës shpërblyese është një atraksion i shtuar për lexuesit e të gjitha moshave.

Kështu shprehet e anketuara jonë Yllëarta Thaqi, zyrtare për komunikim me publikun në Kuvendin Komunal, e cila njëkohësisht thotë se gazeta në fjalë është e preferuara e saj. “Nuk mund të kalojë asnjë ditë pa shfletuar faqet e kësaj gazete, e cila për mua është njëra ndër më realet përballë problematikave të shoqërisë sonë”, thotë ajo, duke renditur kështu temat e shkruara shkurt e saktë, sidomos për dukuritë devijuese, të cilat po i sjellin regres zhvillimit të vendit.

“Me pëlqen rubrika ‘Rajonale’, sepse informohem për ngjarjet në të gjitha komunat, kurse preferoj që ngjarjet portokolare të publikohen edhe më shkurt dhe të lëshojnë vend për temat që janë shumë më interesante për lexuesit, siç janë përditshmëria jonë, temat sociale, varfëria dhe skamja që po rritet gjithnjë.

Nga ana tjetër, rregullisht përcjell edhe rubrikën ‘shtojca javore për biznes dhe karrierë’. Kosovës i duhen të arriturat e tilla, sepse pa zhvillim ekonomik as që mund të mendohet qëndrueshmëria e shtetit”, mendon Thaqi, e cila thotë se komunikimi me publikun edhe për këto të arritura ka rëndësi të veçantë. I anketuari tjetër, Ibish Gërvalla, nga Duboviku i Deçanit, shprehet në superlativ për gazetën ditore “Zëri”.

“Është kjo një gazetë e përkryer dhe uroj që imazhi i saj të forcohet edhe më shumë”, thotë ai, ku, sipas tij, ky imazh është fituar në saje të shkrimeve reale, të cilat dominojnë, dhe fare nuk kanë ngjyrime politike.

“Mua animet politike dhe përkëdhelja e pushtetit aspak nuk më pëlqejnë, ndaj informimi duhet të jetë në shërbim të qytetarëve dhe opozitë e të gjitha të këqijave me të cilat vazhdon të përballët shoqëria jonë. Politika ditore dhe pushteti, janë të përkohshme, kurse i përhershëm është populli, ndaj informimi duhet të jetë në shërbim të këtij të fundit”, shprehet Gërvalla.

Ai veçon shkrimet ku shkruhet me emër dhe mbiemër për bartësit e dukurive negative, siç janë krimi i organizuar, korrupsioni, familjarizimi edhe në organet e pushtetit dhe dukuritë përçarëse, të cilat, sipas tij, nuk janë të vogla në Kosovën e pasluftës. “Zërit” nuk i mungojnë as temat hulumtuese, dhe kjo ndodh edhe përkundër kërcënimeve të herëpashershme të gazetarëve të kësaj gazete, përkujton ai.

“Unë besoj se imazhi dhe besimi fitohet, vetëm me të vërtetën e qëndrueshme, fitohet dhe jeton gjatë vetëm me prezantimin e realitetit, qoftë ai i mirë apo i keq. Vërtet jemi ngopur nga shkrimet e ‘ngjyrosura politikisht’, dhe redaksinë e ‘Zërit’, por edhe të gjithë gazetarët, mund t’i përgëzoj në përzgjedhjen e rrugës së duhur për misionin që kanë ndaj qytetarëve”, ka thënë në fund Gërvalla.

C. Mazrekaj

Kaçanikasit fitojnë me të madhe

Kaçanik. Nuk ka asnjë dyshim se ndër shtypin e shkruar gazeta “Zëri” në Kaçanik vazhdon të vlerësohet si më e mira në të gjitha aspektet. Kjo gazetë e cila e informon lexuesin me kohë, drejt, paanshëm me të gjitha lajmet dhe zhvillimet në vend dhe jashtë Kosovës, gjendet në duart e shumë lexuesve kaçanikas.

Vazhdimi i lojës shpërblyese është duke u konsideruar si motiv shtesë për ta blerë dhe shfletuar “Zërin”, i cili nga gërvishtja e këndit të majtë të epërm të ballinës së saj, vazhdon të nxjerrë fitues të shumtë dhe të shumëfishtë të shpërblimeve nga më të ndryshmet. Fatmir Koraçi, taksist nga fshati Kovaçec, është blerës dhe lexues i rregullt i “Zërit”.

Në mesin e shumë gazetave të ekspozuara në njërën nga pikat e shitjes, “Zëri” tashmë i është bërë si magnet. “E sheh, sa është lart dhe më tërheq ta marr”, thotë Fatmiri, lexues i rregullt dhe fitues i shumëfishtë i shpërblimeve të lojës së “Zërit”. “Edhe rubrikat tjera i lexoj, por sporti më pëlqen shumë. E lexoj faqe për faqe”, thotë ky adhurues sporti, sidomos i futbollit.

Ai nuk e fsheh dëshirën ta bëjë publike faktin se ka qenë fatlum duke gërvishtur kuponin fitues. “Shtatë herë kam fituar shpërblime të gazetës ‘Zëri’”, tregon Fatmiri. Ndërsa ky shprehet mirënjohës për shpërblimet e shumëfishta, një emnak i tij, i cili sapo e bleu një “Zëri”, por të cilit nuk i linte përshtypje t’i përmendej emri e mbiemri në gazetë, zbuloi se kishte fituar 5 euro mbushje të Vala-s. Edhe Bejtullah Daloshi është lexues i përditshëm i gazetës “Zëri”.

“E lexoj përditë, sepse përmbajtja e kësaj gazete është e saktë dhe e gjithanshme”, thotë ai. Edhe atij i pëlqejnë të gjitha rubrikat, por e veçon atë “ZIP”. Në pikat e shitjes në Kaçanik thonë se për “Zërin” ka interesim të madh të lexuesve. “Tepër të rralla janë rastet kur mbetet ndonjë ekzemplar pa u shitur. Përndryshe ‘Zëri’ shitet shumë”, thotë Shpend Thaçi, shitës gazetash.

K. Sallahu