Gazeta “Zëri” vazhdon rrugëtimin e saj të suksesshëm dhe në këtë gjë me të madhe është duke i ndihmuar loja e madhe shpërblyese. Sipas lexuesve, vendin e parë në mesin e të përditshmeve të Kosovës kjo gazetë e arriti falë cilësisë së shkrimeve, paanësisë si dhe të dizajnit të këndshëm për sy.

Ata apelojnë që kjo politikë redaktuese të vazhdojë edhe në të ardhmen, dhe krahas kësaj të vazhdojë edhe vitin e ardhëm edhe loja shpërblyese.

Gazetë e kohës

Sharr. Meqë i përcjellë trendet më bashkëkohore në shumë lëmenj të jetës, kjo gazetë tashmë, me plot meritë, mund të quhet gazetë e kohës, e cila në këtë mënyrë është bërë mjaft joshëse për lexuesit e të gjitha moshave, duke filluar prej më të vegjëlve e deri te më të moshuarit.

Është ky vlerësim i përgjithshëm i lexuesve të komunës së Sharrit, të cilët janë shtuar mjaft kohëve të fundit, jo vetëm për lojën shpërblyese, por më shumë për cilësinë e saj.

Sipas Adil Shasivarit, shitës gazetash në qoshkun e Bresanës, fshat ky më i madh i Opojës, ku gravitojnë shumica e banorëve të lokaliteteve të kësaj ane, askush nuk ka mundur të paramendojë që për një kohë kaq të shkurtër, kjo gazetë mund të bëhet e përditshmja më e lexuar nga lexuesit opojarë.

“E tëra kjo dëshmon se kjo gazetë është për momentin më e lexuara në trevën e Opojës. Lexuesit, vazhdimisht shprehen të kënaqur me formën dhe përmbajtjen e saj, andaj shitja e ‘Zërit’ nuk paraqet kurrfarë problemi kohëve të fundit”, shprehet, Shasivari.

Ndërkaq, Mirsal Kryeziu, student, pohon se edhe më parë e ka lexuar këtë gazetë, por që kohëve të fundit, ai nuk e lë asnjë numër të saj pa e lexuar. “Rubrika e sportit, është mjaft e pasur, të cilën e lexoj gjithmonë me ëndje, si dhe rubrikat tjera, me mjaft tema interesante, kanë bërë që unë ta lexoj me ëndje këtë gazetë.

Më duhet të pranoj se edhe loja shpërblyese është si motiv shtesë për ta blerë ‘Zërin’ qysh në orët e hershme të mëngjesit, dhe sa herë e gërvishti kuponin, shpresoj gjithnjë se edhe unë një ditë mund të bëhem fitues i ndonjë shpërblimi të madh, pse jo edhe i veturës luksoze, aq lakmuese, sidomos nga të rinjtë”, pohon Kryeziu, të cilin e hasëm duke e lexuar gazetën.

Edhe Sedat Rysheni, ndërtimtar, shprehet me fjalë miradije për “Zërin”, gazetë kjo, të cilën, siç pohon ai, e lexon për çdo ditë, ndonëse puna e tij është mjaft e vështirë. “Sa herë ulem për të pushuar, e shfletoj me ëndje këtë gazetë, e cila kohëve të fundit ka tema mjaft interesante. Natyrisht që edhe loja shpërblyese është motiv shtesë për ta blerë këtë gazetë. Përse të mos më buzëqesh fati edhe mua një ditë...?”, pohoi Rysheni.

S. Kryeziu

Shtohen adhuruesit e “Zërit”

Deçan. Gazeta “Zëri” në Deçan, vazhdon të shtojë adhuruesit dhe bashkë me këtë edhe imazhin e saj. Deçanasit thonë se “Zëri”, është bërë gazetë numër një për ta, ngase pos lojës së madhe shpërblyese, temat e trajtuara janë një realitet me të cilin po përballet vendi.

“‘Zëri’, është nocion që më çon në fëmijërinë e hershme, kurse tani me shumë dashje e adhuroj dhe njëkohësisht e përgëzoj për një jetëgjatësi”, thotë lexuesi i pasionuar i tij, Ali Qufaj, nga Prejlepi, i cili tregon se në faqet e kësaj gazete, temat trajtohen me përkushtim dhe guxim.

“E veçanta e ‘Zërit’, është se ka ruajtur tradicionalen e vet gazetareske, duke e gërshetuar me atë modernen, duke e bërë atë gjithnjë e më atraktive. ‘Zëri’, asnjëherë nuk insiston të jetë krah i grupeve, klaneve a partive.

Me besueshmëri të lartë është vënë në shërbim të së vërtetës dhe popullit dhe më të drejtë mund ta quajë ‘gazetë gjithëpopullore’”, vlerëson Qufaj, i cili tregon se kjo e përditshme ka laramani rubrikash të ndryshme dhe gjithëpërfshirëse.

Megjithatë, sipas tij një faqe poetike do ta kompletojë edhe më shumë këtë gazetë. Një lexuese tjetër e rregullt është edhe Emine Islamaj, nga Irzniqi, e cila thotë se gazeta “Zëri” është bërë edhe gazetë e familjes së saj.

“Pos meje gazetën e blejnë edhe vëllezërit, kurse kur shkojmë në shtëpi atë e lexojnë edhe anëtarët tjerë të familjes. Pos leximit, të rinjtë janë kureshtarë edhe të gërvishtjes, kurse nuk janë të rralla edhe shpërblimet modeste, ndërkohë interesimi i familjarëve është për shpërblime edhe më të mëdha, madje ka pretendime për të fituar edhe veturën”, tha ajo.

“Unë personalisht, më shumë lexoj shtojcën “ZIP”, ngase më intereson të dijë për të arriturat në këtë fushë, dhe sidomos për të arriturat e femrave shqiptare ku në faqet e kësaj shtojce ka mjaft tema të tilla interesante.

Një shtojcë tjetër të cilën e adhuroj është ‘Kultura’, ngase parapëlqej të lexoj fejtonet, por edhe temat tjera që trajtojnë kulturën, artin dhe trashëgiminë kulturore dhe historike të hapësirës mbarë shqiptare.

Nuk mund të mbyll gazetën pa lexuar edhe faqet ‘Rajonale’, ngase dua të informohem për zhvillimet nëpër komuna dhe në veçanti për komunën time, dhe me thënë të drejtën jam e kënaqur me shkrimet në ‘Zëri’ nga kjo komunë.

Temat e trajtuara, larushia e tyre, por edhe loja shpërblyese po e bëjnë edhe më atraktive këtë gazetë, e cila për mua është numër një”, përfundoi kjo lexuese e rregullt, e cila përgëzon për një të ardhme edhe më të fuqishme të kësaj gazete.

C. Mazrekaj