“Zëri” ju lumtë, jeni më të mirët në luftë kundër korrupsionit, i cili si “mortajë” po e godet zhvillimin e vendit. Këto janë fjalët e dy të anketuarve në Deçan, të cilët kërkojnë vazhdimin e këtij imazhi, i cili gjithnjë e më shumë po shton numrin e lexuesve të kësaj gazete.

“‘Zëri’, ashtu si e ka edhe emrin po i qëndron besnik lexuesve të vet me trajtimin real të temave të realitetit kosovar dhe natyrisht është bërë zëri më i fuqishëm në Kosovë në luftë kundër korrupsionit dhe të këqijave tjera që për fat të keq po i sjellin regres vendit. Për më tepër, ‘Zëri’ juaj është bërë edhe zëri i qytetarëve”, ka thënë Shpend Lokaj, nga Lumëbardhi i Deçanit, i cili punon si redaktor në TV “Syri” në Gjakovë.

Këtë vlerësim Lokaj e mbështet edhe në raportin e fundit të Institutit Demokratik të Kosovës, ku “Zëri” në gjashtëmujor ka botuar 68 artikuj për korrupsionin dhe kështu zë vendin e parë në Kosovë. Kjo për Lokajn nuk është rastësi, sepse, sipas tij, edhe pa këtë raport, ka bindjen se “Zëri” edhe për temat tjera është e para.

“Në faqet e kësaj gazete, gjejmë edhe shumë tema të tjera interesante dhe të trajtuara profesionalisht. Jo vetëm për korrupsionin, por edhe për dukuritë tjera negative ‘Zëri’ vë në spikamë bartësit e tyre, madje me emër dhe mbiemër duke mos kursyer as zyrtarë të institucioneve qendrore. Mbi të gjitha imazhi i kësaj gazete po rritet gjithnjë edhe nga aspekti i mosanimeve politike. Kjo e dallon ‘Zërin’ nga disa media tjera të cilat fatkeqësisht ia mbajnë krahun politikës”, shprehet ai, duke besuar se kjo do të krijohet si traditë e kësaj gazete edhe në të ardhmen, ngase vetëm kështu mund të mbahet jetëgjatësia e saj, ngase politikat ndërrojnë, kurse qytetarët janë ata që përgjithmonë qëndrojnë vertikalisht përballë problemeve dhe sfidave të kohës.

“Kam një simpati të veçantë për ‘Zërin’, sepse bërja transparente e realitetit qoftë i mirë apo i keq, shton përgjegjësinë për llogaridhënie të pushtetarëve”, thotë Adelina Çekaj, gazetare e “Top Iliria Radio”, në Deçan.

“Edhe pse punoj në një medium informativ, nuk mundem asnjë ditë pa e shfletuar gazetën ‘Zëri’, e cila në komunën time është e para dhe pa konkurrencë përballë gazetave tjera ditore. Lajmi se është e para me shkrimet për korrupsionin edhe më shumë më ka shtuar simpatinë ndaj kësaj gazete. Vendit për ecje përpara i duhet vetëm puna dhe e vërteta, dhe natyrisht edhe përgjegjësia dhe këto tri parime mbase trajtohen ashtu si janë. Kjo për mua është ‘çelësi’ se kah duhet të shkojnë mediet. Unë faktikisht, mediet dua t’i shoh si opozitë e pushteteve për t’i shtyrë proceset përpara dhe kurrsesi si zëdhënës dhe në shërbim të tyre. Mbase ‘Zëri’ ka gjetur këtë rrugë dhe uroj që të vazhdojë që edhe më tutje të jetë i pari, jo vetëm sa i përket luftës kundër të këqijave por edhe të mobilizimit qytetar për zhvillim dhe mirëqenie”, shprehet Çekaj, e cila veçon rubrikat e kësaj gazete në të cilat shkruhet troç për dobësitë e institucioneve të vendit, sepse sipas saj, duke përfolur këto, dihet se kah duhet shkuar pastaj.

Dy të anketuarit, Lokaj dhe Çekaj, thonë se edhe vazhdimi i lojës shpërblyese ka shtuar numrin e lexuesve në këtë komunë, ndërkohë besojnë se në Deçan, kësaj radhe do të shtohet edhe numri i përfituesve të kësaj loje.

C. Mazrekaj

Gazetë e guximshme

Lexues të rregullt të “Zërit” në komunën e Sharrit pohojnë se kjo gazetë, me formën e përmbajtjen tejet cilësore të saj, u ngjason mjaft të përditshmeve të vendeve më të avancuara evropiane. Mu për këtë, sipas tyre, ajo kohëve të fundit ka krijuar një imazh të lakmueshëm, të cilin po e begaton në vazhdimësi, andaj edhe numri i lexuesve të saj shtohet për çdo ditë, pohojnë ata.

Batjar Kryeziu, student, shprehet se është mjaft i kënaqur me përmbajtjen e kësaj gazete, andaj edhe tashmë është bërë lexues i rregullt i saj. Rubrikat, temat nga të gjitha fushat, si dhe guximi në paraqitjen e të gjitha problemeve, të cilat e preokupojnë shoqërinë tonë, sipas tij, kanë bërë që kjo gazetë tashmë ka arritur nivelin e lakmueshëm, të cilin nuk e kanë pasur gjer më tani të përditshmet e vendit.

Sipas tij, inkurajon fakti se për këtë gazetë, e cila drejtohet nga një staf redaktues profesionist dhe i guximshëm, nuk ka tema tabu, ngase për çdo dukuri negative shkruhet pa drojë dhe pa hezitim.

“Shpresoj se në këtë mënyrë, ata jo vetëm që nuk do të ndalen, por përkundrazi do të vazhdojnë edhe më guximshëm, ngase Kosova veç është ngopur me gazeta partiake. Për këtë e përgëzoj stafin e saj redaktues, duke i dëshiruar suksese edhe në punën e nesërme, ngase vetëm në këtë mënyrë, ajo mund t’i joshë të gjithë qytetarët, të cilët veç janë zhytur në pellgun e thellë të varfërisë ekstreme”, shprehet Kryeziu.

Edhe Fejzulla Trinaku, historian, pohon se edhe më parë e ka lexuar këtë gazetë, por jo rregullisht, ndërkaq kohëve të fundit, kur ajo e ka ndryshuar në tërësi fizionominë e saj, ai është bërë lexues i rregullt i kësaj gazete. Ai, gjithashtu pranon se edhe loja shpërblyese është një motiv shtesë për ta blerë këtë gazetë, ngase në këtë mënyrë mund të provosh edhe fatin.

“Me blerjen e “Zërit” e fitoj mundësinë edhe për të qenë fitues i ndonjë shpërblimi të madh, i cili ende nuk ka arritur në Sharr, por që ne lexuesit e saj të pasionuar, presim që një ditë të arrijë edhe në këtë nënqiell”, pohon duke qeshur, Trinaku. S. Kryeziu