Çdo ditë në lojën e madhe shpërblyese në gazetën “Zëri”, u buzëqesh fati me dhjetëra lexuesve besnikë të gazetës. Edhe pse fondi i shpërblimeve është tejet i madh dhe vlera e shumicës së shpërblimeve është e lartë, shumica e fituesve thonë se për ta nuk ka rëndësi vlera e shpërblimit, por vetë fakti se e kanë një kujtim të bukur nga gazeta e tyre e preferuar.

I një mendimi të tillë është edhe Meriton Veliu nga Skënderaj, fitues i Sony Play Station 3. “Jam i nderuar që me anë të lojës ‘Lexo dhe Fito’ arrita të fitoj Sony Play Station 3. Është një dhuratë modeste dhe mjaft e vlerësuar nga unë dhe një kujtim i mirë për mua nga kjo gazetë.

Jam lexues i rregullt i gazetës ‘Zëri’ dhe të them të drejtën gazetën nuk e blej vetëm për shkak të lojës por për shkak të informimit që marrë në të”, është shprehur Meritoni për të shtuar: “Si çdo ditë tjetër edhe në mëngjesin kur fitova, duke shkuar në punë bleva gazetën dhe pasi e lexova të tërën, në fund gërvishta këndin e lojës dhe e pash që kisha fituar një dhuratë të mirë.

Për mua e përditshmja ‘Zëri’ vazhdon të mbetet gazeta më e mirë në treg, lidere me shumë materiale interesante që të shtyjnë ta lexosh. Uroj që ky sukses i ‘Zëri’-t të vazhdoj gjithnjë”. Ndoshta më i lumturi me shpërblimin e fituar në gazetën “Zëri”, mund të jetë Edmond Vllasaliu, i cili ka fituar në PS3, çka vërtet i përshtatet moshës së tij të re.

Edhe ai ka shfaqur falënderimin dhe gëzimin e tij, që tani e tutje do ta ketë mundësinë që të kënaqet me videolojëra të ndryshme, pasi vërtet është një adhurues i madh i tyre. Shpërblimet e tyre të vlefshme, i kanë tërhequr edhe Shemsije Ademaj, e cila është fituese e një DVD Player-i, pastaj, Adrian Berisha 50 euro nga MiniMax, Bujar Muharremi 50 euro po ashtu nga MiniMax, sikurse që ka fituar edhe Dëshira Sllamniku, pastaj Feride Paçarizi fituese e 50 eurove nga Raiffaisen Bank, e shumë të tjerë.

K.Bajrami

“Zëri” ka krijuar vartësi te lexuesit ferizajas

Lexues të shumtë nga Ferizaj, të anketuar ditëve të fundit, janë shprehur me plot gojën se gazeta që më së tepërmi u pëlqen, dhe sikur janë “lidhur” me të, është ditorja “Zëri”. Përderisa në anën tjetër Sami Krosa, shpërndarës i shtypit në Ferizaj, ashtu si edhe shitës nëpër qoshqet e sapovendosura nëpër pikat më të frekuentuara të qytetit, thanë se ‘Zëri”, vazhdon të dominojë tregun, pavarësisht krizave të leximit dhe skamjes që ka përfshirë shoqërinë tonë.

Sipas të anketuarve, padyshim se loja shpërblyese ka bërë të veten, nga e cila qindra ferizajas kanë qenë përfitues, duke filluar nga mbushjet telefonike, fanellat me mbishkrimin “Zëri”, e deri te televizori. Por kjo gazetë para së gjithash i tërheq me lajme të shpejta, të sakta, të paanshme, si dhe temat problemore që sipas tyre, shtron për trajtim, duke filluar prej zhvillimeve politike deri tek ato sociale.

Shefqet Maliqi nga Ferizaj tha se “Zëri”, është gazeta më e preferuar prej tij. “Jam fans i futbollit dhe sporteve të tjera dhe nuk më intereson politika. Andaj veten e kam gjetur me ‘Zëri’-n, dhe nuk po mund të ndahem prej saj, si prej një lloji të cigareve që blejë.

Më është shndërruar në vartësi”, ka deklaruar ky lexues ferizajas, duke i shprehur sukses edhe më të madh gazetës sonë. Vlora Hyseni, nga fshati Prelez i Ferizajt, studente e biologjisë në Prishtinë, u shpreh se gazetën “Zëri” e blen vazhdimisht, sepse aty gjen dhe lexon gjera shumë interesante. “Me ta thënë të drejtën më tërheq më shumë faqja e VIP-ve, por edhe shkrimet e lira, si këshillat për shëndet, dieta për trup më të mirë, por edhe shkrime për dashurinë, që kujtoj se ky motiv nuk i lë të qetë të rinjtë”, tha Vlora, e cila ka përmendur edhe faktin se loja shpërblyese po i shton radhët e lexuesve për ketë gazetë.

Ndërkaq Rrahman Sadriu, veteran i arsimit nga fshati Talinoc i Jerlive, dhe njëkohësisht sekretar i Organizatës Komunale të Pensionistëve në Ferizaj, thotë sepër moshën e tretë, gazeta “Zëri”, është më interesantja. “Kjo gazetë, kam përshtypjen është më e pavarura më realja në Kosovë, informon shpejt dhe drejtë. Merret me tema përmbajtjesore dhe me interesa jetik për publikun. Nuk bën anime partiake si shtypi tjetër dhe kjo e bë në më afër me hallet tona”, u shpreh Rrahman Sadriu. Gazeta “Zëri”, mësuam se është prezent gjithashtu nëpër të gjitha tavolinat e kafiterive dhe lokaleve të tjera hoteliere në Ferizaj.

Xh. Rexhepi