“Më e mira, më profesionalja dhe më e guximshmja”. Këtë vlerësim për gazetën “Zëri”, vazhdojnë ta kenë qytetarët e komunës së Gjakovës, të cilët kur pyeten, zgjedhin fjalët më të mira për këtë gazetë.

“Është gazetë që lexohet nga të gjitha shtresat e shoqërisë, e veçmas nga intektualët. Jam lexues i rregullt, mbase qysh nga ditët e para të kësaj gazete dhe rrallë ka ndodhur që të mos e blej e lexoj me kënaqësi”, thotë sociologu Sadri Asllani, në një mëngjes teksa e gjetëm duke lexuar “Zërin”, në njërin nga lokalet e qytetit të Gjakovës.

Profesori Asllani, duke shprehur kënaqësinë e tij me materialet e botuara në gazetë, thotë se megjithatë, do të kishte qenë mirë që në të ardhmen “Zëri” të ketë edhe shkrime apo publikime shkencore, të cilat, sipas tij, do të kishin ndikim pozitiv në zhvillimin e të rinjve në Kosovë.

Vlerësime pozitive për të përditshmen “Zëri”, ka edhe miku i sociologut Sadri Asllani, ish-deputeti i Kuvendit të Kosovës, Halil Ahmeti. Edhe ai thotë se është lexues i rregullt i “Zëri”-t, ndërsa vlerësime pozitive jep për guximin dhe paanshmërinë që çdo ditë e më tepër po e dëshmojnë gazetarët dhe stafi i “Zërit”.

“Padyshim që mund të quheni gazeta më e pavarur dhe këtë po e dëshmoni çdo ditë me shkrimet tuaja të guximshme dhe tejet të paanshme”, thotë Ahmeti. Ai ka fjalë miradie edhe për temat e përditshme që i lexon në gazetën “Zëri”.

“Jeni gjithmonë afër qytetarëve dhe halleve të tyre, prandaj për këtë kam vetëm fjalë të mira për ju”, përfundon ai. Ndryshe, përveç përmbajtjes, e përditshmja “Zëri”, po çmohet e vlerësohet edhe për lojën shpërblyese, e cila herë pas here po sjell gëzim te lexuesit. “E thashë edhe më herët se e blej ‘Zëri’-n, kryesisht për përmbajtjen që ka, por jam edhe pjesëmarrës në lojën shpërblyese, me ç’rast kam pasur fatin edhe të jam në mesin e fituesve”, thotë Sadri Asllani.

Fituesi i fundit i ndonjërit nga shpërblimet e mëdha në Gjakovë, është gazetari Faton Canhasi, konkretisht i biri i tij Darsei, i cili e ka fituar një Sony Play Station 3. Ndryshe gazetari Canhasi, ka qenë i intervistuari i sondazhit të kaluar në gazetën “Zëri”. Artan Z. Haraqia

“Zëri” , gazeta më objektive

Edhe në komunën e Malishevës, “Zëri” vazhdon të jetë gazeta më e vlerësuar dhe më e lexuar. Ali Paçarizi, punëtor i arsimit nga Lubizhda, shprehet se gazetën “Zëri” e blen dhe e lexon që nga numri i saj i parë. “Më duket gazeta më serioze, prandaj e blej dhe e lexoj që nga numri i saj i parë”, thotë Paçarizi, përderisa edhe më tej vlerëson se kemi të bëjmë me

gazetën më serioze në vend.

“Unë do të vazhdoj ta blej dhe ta lexoj gazetën “Zëri” pasi edhe më tej vlerësoj se kemi të bëjmë me gazetën më serioze dhe të paanshme”, vazhdon Paçarizi. “Një ndër arsyet më të mëdha që e marr gazetën “Zëri” është rubrika e fejtonit, të cilat i kam lexuar rregullisht por edhe informimi është jo partiak dhe i paanshëm”, përfundon Paçarizi, duke porositur që ky orientim i gazetës të ruhet edhe më tutje.

Hamide Morina nga Burimi, po ashtu është lexuese e rregullt e gazetës “Zëri”, të cilën e vlerëson në rend të parë për informimin objektiv dhe të paanshëm. “I lexoj vazhdimisht informacionet nga rajoni pasi “Zëri” është ndër gazetat e rralla që mbulon tërë vendin”, thotë kjo e re, e cila lojën shpërblyese e vlerëson si një atraktivitet që ndihmon shitjen.

“Loja shpërblyese më duket mjaft atraktive dhe besoj ka ndikuar edhe në rritjen e shitjes së gazetës”, mendon Hamidja, e cila mendon se kjo gazetë së shpejti do të jetë mjeti kryesor i informimit të shkruar në vend. Granit Gashi nga Mleçani mendon se gazeta “Zëri” është gazetë e cila paraqet realitetin në Kosovë.

“Lexoj politikë, kulturë dhe sport, por më pëlqejnë posaçërisht edhe shtojcat të cilat tash po botohen në secilin nga numrat e gazetës”, thotë ai, duke treguar se me interesim përcjell zhvillimet në teknologji. “Loja shpërblyese e bën edhe më atraktive gazetën”, përfundon ai, përderisa shpreson që ndonjëri prej shpërblimeve të mëdha të vijë në Malishevë.

N. Krasniqi

“Zëri” – gazetë për të gjithë

Një vlerësim jashtëzakonisht i lartë për gazetën “Zëri”, vjen edhe nga lexuesit e sharrjanë. Duke pasur parasysh faktin se kjo gazetë, me rubrikat e saj të zgjedhura mirë, trajton tema interesante për lexuesit e të gjitha moshave, duke filluar që nga më të vegjlit e deri te më të moshuarit, ajo me meritë e ka fituar epitetin “gazetë për të gjithë”, vlerëson, Ibrahim Kryeziu, tregtar, një lexues i pasionuar i “Zërit”, i cili tanimë nuk e lë asnjë numër të saj pa e lexuar.

“Të gjitha ato tema që vazhdimisht u kanë munguar në vazhdimësi të përditshmëve tona, tani janë të pranishme në këtë gazetë, e cila në këtë mënyrë, për një kohë të shkurtër ka arritur t’i joshë lexuesit e shumtë, numri i të cilëve për çdo ditë vjen duke u shtuar, ka konstatuar Kryeziu, duke shtuar se natyrisht që edhe loja shpërblyese është bërë një motiv shtesë edhe për ata lexues, të cilët kurrë më parë nuk janë marrë me lojëra të fatit, por që tashmë kanë fituar mundësinë që edhe ta lexojnë gazetën, edhe ta provojnë fatin, duke shpresuar se një ditë mund të jenë edhe fitues të ndonjë shpërblimi joshës, e pse jo edhe të veturës luksoze, të admiruar aq shumë, sidomos për të rinjtë...”, shprehet Kryeziu.

Ndërkaq, Nehar Selimi, student, të cilit më së shumti i pëlqen rubrika e sportit, kulturës, fusha e automobilizmit dhe informatikës, ka bërë të ditur se një gazetë e tillë, siç është kohëve të fundit “Zëri”, me një fizionomi të re dhe mjaft joshëse, deri më tani u ka munguar lexuesve të pasionuar të të përditshmëve të vendit.

“Shumica e të përditshmëve të Kosovës, janë aq të varfra me rubrika dhe tema jointeresante, sa që shfletimi i tyre mund të zgjasë vetëm disa minuta, ndërkaq kjo gazetë, me begatinë e rubrikave dhe temave interesante, që shtjellohen me një profesionalizëm të theksuar, i marrin lexuesit një kohë të konsiderueshme, ngase aty ai gjen mjaft gjëra interesante, me të cilat edhe pasurohet me njohuri të reja nga shumë fusha të jetës”, thekson, pa e harruar edhe lojën shpërblyese, e cila, sipas tij, e bën këtë gazetë edhe më të kërkuar.

S.Kryeziu