Prishtinë. “Medalja humanitare Nëna Terezë”, dekorata me numër rendor shtatë, në listën e dekoratave të presidentit të Republikës së Kosovës Fatmir Sejdiut, do të jepet më 4 shtator, në ceremoninë qendrore që do të mbahet në katedralen që do të mbajë emrin e Nënës Terezë, në shenjë të 100 vjetorit të lindjes së Nënë Terezës, që po shënohet edhe në Kosovë me vendim të presidentit të Republikës së Kosovës. Xhavit Beqiri, këshilltar i presidentit Sejdiu e ka konfirmuar se atë ditë do të jepet kjo dekoratë, mirëpo, se kush do të nderohet me “Medalja humanitare Nëna Terezë”, mbetet të zbulohet pikërisht më 4 shtator. “Se kush do të dekorohet me këtë medalje është vendosë qysh herët, mirëpo vendimi është marrë që mos të bëhet publike deri më 4 shtator”, ka thënë Beqiri.

Në anën tjetër, se nëse do të jepet kjo dekoratë edhe viteve të tjera, sipas burimeve të gazetës “Zëri”, mësohet se kjo dekoratë nuk llogaritet të jepet në datë të caktuar në vitet e ardhme, por varësisht prej rasteve kur përkohet edhe me ngjarjet që mund të ndërlidhen me Nënë Terezën.

Të njëjtën gjë nuk e ka konfirmuar as Shefki Ukaj, koordinator i aktiviteteve kulturore për shënimin e 100 vjetorit të lindjes së Nënë Terezës, pos asaj se kjo dekoratë është në listën e dekoratave të presidentit të vendit.

Në këtë ceremoni që do të fillojë në ora 11:00, pritet të paraqiten me fjalimet e tyre edhe krerët e vendit dhe të Ipeshkvisë së Kosovës, ndërkohë, sipas një informate më të hershme të Don Lush Gjergjit, këtë ditë pritet të jetë edhe një përfaqësues i Vatikanit, pasi që ftesa i është bërë Papa Benediktit të XVI.

Ndërkohë, pas ceremonisë zyrtare, më pas Filarmonia Opera e Kosovës do të prezantohet me koncertin solemn të quajtur “Koncert solemn me rastin e 100 vjetorit të lindjes së Nënë Terezës”.

“Tash e sa kohë kemi filluar përgatitjet për koncertin e 4 shtatorit që do të mbahet në katedralen “Nëna Terezë”. Koncerti solemn po realizohet në bashkëpunim me Fakultetin e Arteve të Kosovës”, ka thënë Baki Jashari, drejtor i këtij institucioni kulturor, i cili ka njoftuar edhe orientimin e këtij koncerti në veprën e Moxartit.

“Koncerti qendror për këtë përvjetor të rëndësishëm për popullin tonë është fokusuar në veprën e kompozitorit të mirënjohur Moxart, “Requiem””, ka thënë Jashari.

Sipas tij, në këtë koncert do të përfshihet edhe kori dhe orkestra e Filarmonisë Opera e Kosovës. “Pos korit dhe orkestrës në këtë koncert do të prezantohen edhe katër solistë: Elbenita Kajtazi, soprano, Flaka Goranci, mexosoprano, Liridon Kadriu, tenor, dhe Shkumbin Krasniqi, bariton. Krejt ky koncert do të jetë nën dirigjimin e dirigjentit Bajar Berisha”, ka thënë Jashari.

Ndërkohë, në objektin e sapo ndërtuar të katedrales, shënimi i 100 vjetorit të lindjes së Nënës Terezë do të vazhdojë edhe ditën e diele. Në këtë ditë do të vazhdon manifestimi me ritet fetare, ku do të mbahet mesha për Nënën Terezë, pikërisht me 5 shtator, datë kjo kur edhe ka ndërruar jetë Nëna e Botës, në vitin 1997.