“Gomarët e kufirit”, filmi artistik i metrazhit të gjatë i bazuar në skenar të Jeton Nezirajt dhe regji të Jeton Ahmetaj, më në fund do të prezantohet premierë para publikut kosovarë. I mbështetur financiarisht nga Qendra Kinematografike e Kosovës gjatë vitit 2008, ky film që është xhiruar në një fshat në magjistralen Prishtinë- Gjilan, nuk ka arrite të prezantohet para publikut, edhe përkundër faktit se ka shkelë kontratat e parapara për disa herë, si pasojë e mos posedimit të buxhetit të mjaftueshëm.

Se ka ardhur koha të vlerësohet kjo punë e shumëpritur edhe nga publiku, ka bërë të ditur menaxhmenti i kinemasë ABC, të cilët, kanë thënë se premiera e këtij filmi pritet të jetë në Kosovë pas përfundimit të Festivalit Ndërkombëtarë të Filmit “Prifilm”, që do të mbahet në Kosovë nga datat 22 deri më 29 shtator. “Gomarët e kufirit”, pritet të prezantohet me fillimin e muajit tetor.

“Gomarët e kufirit”, trajton çështjen ndërkufitare në mes ish Jugosllavisë dhe të Shqipërisë dhe me rolet e tyre në këtë film janë angazhuar këta aktorë: Shkumbin Istrefi, Enver Petrovci, Arta Muçaj, Bajrush Mjaku, Hysen Binaku…Filmit “Gomarët e kufirit”, nga QKK-ja i janë ndarë 240 mijë euro dhe sipas deklaratave të mëhershme të Jeton Ahmetajt, këto mjete kanë qenë të pakta për mbulimin e shpenzimeve dhe pikërisht ky problem ka reflektuar edhe në zvarritjen e prezantimit të premierës.

“Gomarët e kufirit”, fillimisht është prezantuar para bordit të Qendrës Kinematografike të Kosovës, të cilët, me dyer të mbyllura kanë parë punën e bërë mbi këtë film, për ti dhënë më pas lejen që mund të prezantohet edhe për publikun e gjerë.

Në anën tjetër, në këtë periudhë pritet të prezantohet edhe një film tjetër premierë, që nuk është me produksion shqiptarë, por që ka tematikë shqiptare. Menaxhmenti i kinemasë “ABC”, ka njoftuar se filmi tjetër që do të prezantohet është filmi “Dosja K”, i regjisorit të njohur flaman Jan Verheyen që flet për shqiptarët dhe flamanët dhe i realizuar nga aktorë belgë dhe shqiptarë. Në këtë film që ka marrë edhe elemente të Kanunit të Lekë Dukagjinit në njërin nga rolet kryesore paraqitet aktori shqiptar, Blerim Destani për tu përcjellë edhe nga aktorët e tjerë: Kushtrim Sheremeti, Fatos Kryeziu, Çun Lajçi, Safete Rugova, Afrim Kasapolli, Jehon Gorani, Eglantina Cumeri...

“Është kënaqësi që filmi “Dosja K”, po zbret në trojet shqiptare, sepse deri më tashti ky film është shfaqë në shtete të ndryshme si: Belgjikë, Spanjë, në një pjesë të Francës dhe në Japoni. Ndërkohë, filmi është shitë edhe në televizionet e 15 shteteve”, ka thënë në një deklaratë më të hershme, aktori Blerim Destani, i cili në këtë film bart rolin e Nazim Tahirit.

Ndërkohë, në kinemanë “ABC”, pos këtyre dy filmave, njëri kosovarë dhe tjetri me tematikë shqiptare, gjatë sezonit vjeshtorë do të prezantohen edhe filmat: “Eat, Pray, Love”, me Julia Roberts dhe “Resident Evil : Afterlife”, me Milla Jovovich, Ali Larter etj. Sipas tyre, muaji nëntor pritet te sjellë edhe kulturën kinematografike turke, gjermane dhe franceze.